1 Yesu akavachemaje vadahitswa vake kumi na vavili, akavapelaje mamulaka ga kujivinga misoka na kuponetsa namwa tsa chila ayina. 2 Matawa ga vadahitswa vake wo avachemile vatumi go iga, mulongola yo Simoni yo achemwaga Petulo, na mung'olotse yo achemwaga Andeleya, na Yakobo mwana va Tsebedayo, na mung'olotse yo achemwaga Yohana, 3 Fwilipo, na Batulomayo, na Tomasi, na Matayo yo avaga mukongotsa kodi, na Yakobo mwana va Alufwayo, na Tadeyi, 4 Simoni yo ayitovanilaga inyi yake, na Yuda Isikaliyote yoamugalwiche Yesu.

5 Yesu akavatumaje iwo vatumi kumi na vavili na kuvalajitsa hino, "Mulekaje kubita kwa vanu wosi Vayawudi, na kaha mulekaje kwinjila mu miji ja Vasamaliya. 6 Lechelelo mubite kwa vanu va Isilaheli yo vanakota ng'olo tsotsiyatsile. 7 Homukuva muhele muvavikulilaje vanu kuta, Wuntsajila wa Mulungu wulihabehi. 8 Muvaponetsaje vatamwa, na muvatsilipulaje vanu, na muvaponetsaje vanu vanya wububa, na muhetsaje misoka, kwasawuli mupasile bule, na henye mutawulaje bule. 9 Mulekaje kutegula tsahabu, awu madini ga fetsa, awu magobole ga saba mu mifuko jenyu. 10 Awu libeji lya myenda, awu myenda ja kubadila, awu filatu fya kubadila, awu ng'weku, kwasawuli munu yo ankola katsi an'ganika kuhombwa."

11 "Muji goguve awu chijiji chochive cho mukwinjila, mumusache munu yo akuvalibulitsa, manyi avalibulitse mwinjile mwikale kwake mbaka homukuwuka. 12 Homukuva mwinje mu nyumba iyo, muvasamuse kwa kuvalonjela kuta, Mulungu avapele wusichimafu. 13 Manyi vanyakaye va nyumba iyo vavalibutse finofu, wusichimafu wenyu wuvaje nawo, lechelelo manyi si ihyo wusichimafu wuvapiluchilaje henye. 14 Manyi munu aleche kuvalibulitsa na kuvahulikitsa ndongwa tsenyu, homukuva munhuma mu nyumba yila awu muji gula mukung'unaje mingundi ja mu magulu genyu, kuvalajila kuta hetwe tulimuduhu kwa chochive chochikuvapata, ili viwukaje." 15 Ntsinguvalonjela wukweli kuta, siku ya wuhigo vanu vanya isho Mulungu akuvahiga ndalahela kulutila vanu wovikalaga ku inyi tsa Sodoma na Gomola.

16 "Mwiyangalilaje! Ntsinguvatuma kota ng'olo hagati ha ngwami. Lelo muvaje na nyala kota ntsoka, na kahi muvaje vadeche kota ngunda. 17 Mwiyangalilaje, kwasawuli vanu vamwe vakuva tebe na henye, vakuvabata na vakuvasindika mu nyumba tsa wuhigo na kuvatova mu nyumba tsa kitang'anila Vayawudi. 18 Nanye mukubulunwa mbaka halutalo ha libalatsa na vantsajila kwasawuli ya heni, ili muvalonjele Ndongwa Nofu na kwa vanu wosi Vayawudi. 19 Lechelelo hovakuvasindika kuko, mulekaje kuhotsa cho mukulonga, kwasawuli luvalalulo mukupelwa cho mukuganika kulonga. 20 Kwasawuli siyo henye yomukuva munlonga, lechelelo Muhe va Mulungu yo Dada venyu akuvatanga cha kulonga"

21 "Munu akumugaluka mung'olotse ili akopolwe, na dada akumugaluka mwanage, nawo vana vakuva tebe na valeli vawo na kuvambutsa vakopolwe." 22 Henye mukuvipilwa na vanu veka kwasawuli ya heni, lechelelo yo akikangatsa mbaka ha wudugo, uyo yo akukuluswa na Mulungu. 23 Lechelelo hala ho vakuvakoda ku muji gumwe, henye mubilimilaje ku muji gunji. Kwakuva ntsinguvalonjelani wukweli kuta, mbaka ho akutsa Mwana va Munu simukusinda miji jeka ja Isilaheli.

24 Mudahitswa si amulutilaga mudahitsi vake, na mupogotsi siamulutilaga muvina vake.

25 Yikwilaje kuta mudahitswa ave kota mudahitsi vake, na mupogotsi kuva kota muvina vake. Manyi muvina va kaye vamuchemile Belitsebuli, mbe! Vala wovali mukaye iyo sivakuchemwa matawa mabi ndalahela?

26 "Ihyo mulekaje kuwogopa vanu wovanfiha finu fyo van'dita, lechelelo kuna chipindi chinkutsa chila munu akutsela chovaditaga."

27 Lulongwa lo tsavalonje ho tuliyena, mukavalonjele vanu na lula lotsivalonjeni kwa kupwepa muluvikule kwa vanu. 28 Mulekaje kuwogopa vanu wovavetsa kuvakopola henye, lechelelo vanlemwa kuvakopola myuhe jenyu. Lechelelo chiba umwogope munu yula yo afuluche avakopole henye na myuhe jenyu mu moto go sigutsimikaga.

29 Mbe, fitolohondo fivili si figutswaga kwa sendi yimwe? Lechelelo nambe chimwe sichigwaga hasi bila Dada venyu kutsela. 30 Lechelelo henye Mulungu avalye nambe fwili tsa mitwi jenyu tseka atsivalye.

31 Ihyo mulekaje kuva na muloto, kwasawuli Mulungu anguvalola ndalahela henye kulutila fitolohondo ifyo.

32 Chila munu yoakindichila heni halutalo ha vanu kuta mwene yo munu vangu, na heni ngumudichila halutalo ha Dada vangu va Kilanga. 33 Lechelelo munu yoyuve yo akung'ana halutalo ha vanu kuta mwene siyo vangu, na heni ngumukana halutalo ha Dada vangu va kilanga.

34 Mulekaje kuhotsa kuta ntsitsitse kuleta wusichimafu mu inyi, heni sintsitsitse kuleta wusichimafu ila ndetite wutelani.

35 Kwasawuli ntsitsitse kuleta wutelani hagati ha munu na dade, na muhintsa na yuve, na kaha mukwi na mukwive, 36 na vatelani va munu wovala wovali mukaye yake. 37 Munu yoyuve yo angumugana yuve awu dade kulutila kungana heni, siafuluche ave mudahitswa vangu. Munu yoyuve yoangumugana mwana vake mukwamitsi awu muhintsa kulutila heni, siafuluche ave mudahitswa vangu. 38 Munu yoyuve yo siakuva chang'ani kukodeka mbaka kufwa kwa kufwata heni, siafuluche ave mudahitswa vangu.

39 Munu yoyuve yo akuhagula kuwukulusa wumi wake uyo akuwuyatsa, na yo akuhagula kuwuyatsa wumi wake kwasawuli ya heni akuwukulusa.

40 Munu yo yuve yo akuvalibulitsa henye akuva andibulitse heni, na yo yuve yo akundibulitsa heni akuva amulibulitse yula yo anumile. 41 Munu yoakumwanuchila muloli va Mulungu kwasawuli ali muloli va Mulungu, uyo akupata chifunje cha muloli va Mulungu, nayo yo akumwanuchila yula yo an'dita kota fyo an'gana Mulungu, uyo akupata chifunje cha munu yo an'dita kota fyo an'gana Mulungu. 42 Ntsinguvalonjela wukweli kuta, munu yoyuve yo akumupela yumwe va vadodo iva nambe chikombe cha malenga matsitsimu kwasawuli ali mudahitswa vangu, Mulungu akumupela nachene chifunje chake.