1 Hotsavaga kulutila siku sita, Yesu akavatolaje Petulo, na Yohana hamwe na Yakobo mung'olotse, akabitaje nawo kuchanya ku chidunda chitali. 2 Kuko Yesu akagalukaje kumiho kwake halutalo hawo, kumiho kwake kukamelemaje kota litsuva na myenda jake jikavaje jimmelema tswee, kota mwangatsa gwa wumeme. 3 Luvala lulo vakahumilaje Musa na Eliya, vakavaga vanlongana nayo. 4 Iho Petulo akamulonjelaje Yesu kuta, "Mutwa, yika kuva finofu twikale hano, manyi ugane ngutsenga fyuwo fidatu, chimwe cha heve, chimwe cha Musa na chimwe cha Eliya." 5 Petulo hoavaga anlonga ihyo, lifuluka lyolyamelemaga likavagubikaje nawo vakahulikaje litsi kuhuma ku lifuluka linlonga, "Yuno yo Mwana va heni yo ntsimuganile, mun'ganika mumuhulikitse!" 6 Vadahitswa vake hovavaga kuhulika litsi ilyo vakagwaje chinyakipuna kuno vamemile muloto. 7 Yesu akabitaje akavadometsaje na kuvalonjela, "Mwinuche na muleche kuva na muloto." 8 Lechelelo hovavaga kugubula miho gawo, sivamuwene munu yunji ila vakamuwonaje Yesu ng'ani. 9 Ihyo hovavaga van'kwika kuhuma ku chidunda, Yesu akavalemetsaje, "Muleche kumulonjela munu ndongwa tso mutsiwene mbaka Mwana va Munu ho akuvakutsilipuka." 10 Vala vadahitswa vakamuputsaje, "Mbe, kwasawuli yachi vadahitsi va malajitso ga Musa valongaga kuta yin'ganika Eliya atse tandi?" 11 Yesu akavalonjelaje, "Kweli, Eliya akutsa tandi ili kuvika finofu ndongwa tseka. 12 Lechelelo ntsinguvalonjela kuta, Eliya mwanga atsitse, nawo sivakamutselye, nawo vamudisile kota fyo van'gana. Ihyo Mwana va Munu vakumuditila hihyo mu mawoko gawo." 13 Iho vala vadahitswa vakatselaje kuta anlonga ndongwa tsa Yohana Mubatitsi.

14 Hovavaga kufika hono ha vanu wolofu, munu yumwe akabitaje kwa Yesu na kumufugamila, 15 yula munu akalongaje, "Mutwa, ntsinsuka umuwonele lusungu mwanangu mukwamitsi, kwasawuli ankodeka ndalahela kwa namwa ya chintsilisa, na mala ntsolofu agwaga mu moto awu mu lulenga. 16 Ntsimuletite kwa vadahitswa vako, lechelelo valemulwe kumuponetsa." 17 Yesu akavalonjelaje, "Henye chilelo cho chigaya litumbilo na chochin'dita wubi! Ngikala na henye mbaka hanili? Nguvafumilila mbaka hanili? Mumulete hano uyo mwana." 18 Yesu akaling'anulilaje lila lisoka, nalyo likahegaje, na luvala lulo mwana yula akaponaje. 19 Kaha vadahitswa vake vakabitaje kwa Yesu hala hoavaga aliyena vakamuputsaje, "Kwasawuli yachi hetwe tulemilwe kulihetsa lisoka lila?" 20 Yesu akavalonjelaje, "Kwasawuli mwavaga na litumbilo lidodo. Ntsinguvalonjela wukweli kuta manyi muve na litumbilo lidodo kota nyadikwa ya haladali, mufuluche muchilonjele chidunda chino kuta, wuche hano ubite kula, nacho chikubita na kuduhu chinu chochive cho mukulemwa. 21 Lisoka linya hila si lihegaga hihi hela, lechelelo lihegaga kwa kuleka kulya."

22 Vadahitswa hovavaga vakong'ine hamwe ku Galilaya, Yesu akavalonjelaje, "Mwana va Munu akibatika na kusindikwa kwa vanu, 23 nawo vakumukopola, lechelelo siku ya kadatu akutsilipuka." Vadahitswa vake vakasusutalaje ndalahela.

24 Hovavaga kufika ku muji gwa Kalipenaumu, vanu yo vavaga vankongotsa kodi ya Nyumba ya Mulungu vakabitaje kwa Petulo na kumuputsa kuta, "Mbe, mudahitsi venyu ahombaga kodi ya Nyumba ya Mulungu?" 25 Petulo akajibulaje, "Ee, ahombaga." Petulo hoavaga kuwuya kukaye, Yesu akatalaje kumuputsa kuta, "Simoni, heve un'wona ndawuli? Vantsajila va inyi vakongotsaga kodi kuhuma kwa nani? Mbe, vakong'asaga kuhuma kwa vanu vawo awu kwa vajentsi?" 26 Petulo akamujibulaje, "Vakong'asaga kuhuma kwa vajentsi!" Nayo Yesu akamulonjelaje, "Ihyo lelo yiganikaga vanu vake valeche kutawula kodi nda! 27 Lechelelo tuleche kuvatifya, bite ku lilamba ukateje ndovano. Somba ndongola yo yikugwila, uyigubule mulomo ukuliwona ligobole, na utegule ligobole ilyo ukahombe kodi yako na ya heni."