1 Ihyo ho avaga Yohana mubatitsi kuhumila, avaga anvikula Ndongwa Nofu mu mbuga ya Wuyawudi na kulonga, 2 "Mupituche na kutsileka ndongwa tsenyu ntsibi, kwasawuli wuntsajila wa Mulungu wuli habehi." 3 Uyuno yo Yohana yoyuyo Isaya muloli va Mulungu alontsile ndongwa tsake, Muhulikitse,

"Munu anchema kuhuma ku mbuga kuta

mumuwuyapile Mutwa ng'asi

Na mwiviche chang'ani kumwanuchila Mutwa ho akuva atsitse."

4 Yohana mwene avaga afwite nyingo ya ngamiya hamwe na musipi gwa nyingo, na chilyo chake chavaga ntsije hamwe na wuchi. 5 Vanu kuhuma kumuji gwa Yelusalemu na kuinyi yeka ya Wuyahudi, hamwe na inyi tseka tsotsili habehi na lulenga lwa Yolidani, vakabitaje kwa Yohana. 6 Nawo vakamupituchilaje Mulungu na kutsileka ndongwa tsawo ntsibi, nayo Yohana akawabatitsaje mu lulenga lwa Yolidani. 7 Yohana hoavaga kuvawona Vafwalisayo hamwe na Vasadukayo vankutsa ili avabatitse, akavaputsaje, "Henye chilelo cha ntsoka, nani yo avalonje muyibilime atsabu ya Mulungu yoyinkutsa? 8 Ihyo muditaje ndongwa nofu kulajila kuta, mulesile ndongwa tsenyu ntsibi. 9 Mulekaje kuhotsa mu numbula tsenyu na kulonga kuta, hetwe tuna Dada vetu yo Ibulahimu, kwasawuli ntsinguvalonjela kuta Mulungu afuluche amupele Ibulahimu vana kuhuma mu maganga gano. 10 Lelo vega mwanga yivisilwe mu ndela tsa mibichi, chila mubichi go sinambe gulele mibawo gukudumulwa na kutotswa mu moto. 11 Heni ntsinguvabatitsa kwa malenga kwasawuli ya kumupituchila Mulungu, lechelelo mwene yo ankutsa kuhuma kumbele kwangu ana wuvetso kundutila heni, na heni sifuluche nambe ntsifilejetse filatu fyake, mwene akuvabatitsa kwa Muhe va Mulungu na u moto. 12 Mwene mwanga ana luhelo lwa kupetela mu mawoko gake, nayo akufyajila luga lwa kubetela filyo, wuhemba akuwuvika mwidoga, na misuyo jeka akujinyanya mu moto go sikutsimaga."

13 Chipindi icho Yesu akawukaje kuhuma kumuji gwa Galilaya, akafikaje mbaka ku lulenga lwa Yolidani, ili abatitswe na Yohana. 14 Lechelelo Yohana akamulonjelaje, "Heni ntsin'ganika kubatitswa na heve, heve unkutsa kwaheni? 15 Lechelelo Yesu akamulonjelaje, widichile sambi, kwasawuli kukolela hino tun'ganika kudita kota fyo an'gana Mulungu." Ihyo Yohana akidichilaje. 16 Luvala lulo Yesu hoavaga kubatitswa akahumaje mululenga, simusika kilanga kukadindukaje nayo akamuwonaje Muhe va Mulungu, ankwika kwa wuwoneko kota wa ng'unda akimaje mwilanga mwake. 17 Luvala lulo litsi likahulikwaje kuhuma kilanga, "Yuno yo Mwanangu mwendi yo an'ngan'ya heni."