1 Yesu hamwe na vadahitswa vake hovavaga kufika ku Besifwaje kuchidunda cha Mitseyituni habehi na muji gwa Yelusalemu, Yesu akavatumaje vadahitswa vake vavili, 2 na kuvalonjela kuta, "Mubite ku chijiji cho chili kulutalo, mukuyifika ntsove yiwopitwe hamwe na ntsanage. Mutsiwopole mundetele. 3 Manyi munu yoyuve avaputse lulongwa lo luve, Manyi munu yoyuve avaputse lulongwa lulove, mumulonjele kuta, Mutwa angutsigana," Nayo bahobaho akuvaleka. 4 Lulongwa ulu lukadisilwe ili tsikwile ndongwa tso alialontsile muloli va Mulungu kuta.

5 "Muvalonjele vanu va muji gwa Sayuni, ulole,

Muntsajila vako ankutsa!

Mudeche na ankutsa akwinile ntsove, tsana ya ntsove."

6 Ihyo vala vadahitswa vakaditaje kota fyoavaga avalajitse. 7 Vakamuletelaje Yesu yila ntsove na ntsanage, vakavikaje myenda jawo mwilanga mwa ntsana ya ntsove na Yesu akakwinaje mwilanga mwa ntsana ntsove. 8 Vanu wolofu vakatandikaje myenda jawo mung'asi na vanji vakafibenaje fiputi fya mibichi na kufitandatsa mu ng'asi. 9 Vanu vanji wolofu wovavaga kutalo na vanji wovavaga kumbele. Veka vakatovaje chiyove na kumulumba Mulungu kwa kulonga kuta,

"Atsumitswe Mwana va Dawudi!

Atambichilwe na Mulungu mwene yo ankutsa kwa litawa lya Mutwa!

Ntsumitso kwa Mulungu yo ali Kilanga!"

10 Yesu fyo avaga ankwinjila ku muji gwa Yelusalemu na vanu veka va muji gula vakitinaje na kiputsa kuta, "Uyuno yo nani?"

11 Vala vanu wolofu vakalongaje, "Uyo yo Yesu muloli yo ahumye kwa Mulungu, vakuhuma ku muji gwa Natsaleti, inyi ya Galilaya."

12 Yesu hoavaga kufika ha Nyumba ya Mulungu, akavavingaje vanu wo vavaga van'gula na kugutsa finu ha Nyumba ya Mulungu, akabidulangaje metsa tsa vanu wo vavaga vamfuntsa magobole. Kaha akabidulangaje figoda fya vala wo vavaga van'gutsa ng'unda. 13 Akavalonjelaje yandikwe mu Mandiko ga Mulungu kuta, "Nyumba Yangu yikuchemwa Nyumba ya kusalila. Lechelelo henye muyidisile yive malika ya vawumiyani."

14 Vanu wovali fibofu na fiteve vakabitaje kwa Yesu iho ha Nyumba ya Mulungu, nayo akavaponetsaje. 15 Lechelelo vavina va vatawula nambiko hamwe na vadahitsi va malajitso ga Musa vakavipaje hovavaga kuwona ndongwa tsa ndajilo jo adisile Yesu, na kuvahulika vana fyo vankwimba ha Nyumba ya Mulungu kuta, "Ntsumitso tsive kwa Mwana va Dawudi." 16 Ihyo vakamulonjelaje, "Mbe, sinambe uhuliche vana fyo vankwimba?" Yesu akavajibulaje, "Ee Ntsinhulika, mbe simukasomile mu Mandiko ga Mulungu kuta,

Kwa milomo ja vana vadodo na fyali fyo finkong'a vangukutsumitsa heve?"

17 Kahi Yesu akawukaje na kuhuma kivala kwa muji, na akabitaje ku muji gwa Besaniya na kuvasa kuko.

18 Kung'acha hamilawu, Yesu hoavaga mung'asi kuwuya ku Yelusalemu kuhuma ku muji gwa Besaniya, akawonaje tsala. 19 Akaguwonaje mubichi gwa mutsombe go gwavaga halubali ha ng'asi, lechelelo gwavaga gulihela mibawo ila mihamba ng'ani. Akagukotolaje kwakulonga kuta, "Ulekaje kulela mibawo ng'o!" Luvala lulo gula mutsombe gukakalaje. 20 Vadahitswa vake ho vavaga kuluwona lulongwa ulo vakapomokaje na kulonga, "Yiveye ndawuli mubichi guno gunkala luvala lulu hela?" 21 Yesu akavajibulaje, "Ntsinguvalonjela wukweli kuta, Manyi muve na litumbilo na manyi muve mulihela muhwehwe goguve, si mukudita ndongwa itsi ng'ani tso ndisile, lechelelo henye mukuvetsa kuchilonjela chidunda chino, chigumuche na chibite kitotse ku bahali, navho chikudita hihyo. 22 Manyi muve na litumbilo, chinu chochive cho mukumusuka Mulungu mu suko, mukupelwa."

23 Yesu ho avaga kuwuya kaha ha Nyumba ya Mulungu na kwantsa kudahitsa. Vavina va vatawula nambiko na vavina va Vayawudi vakamuputsaje, "Un'dita ndongwa tsino kwa wuwetso wa nani? Alikwiya yo akupelye wuwetso wuno?" 24 Yesu akavajibulaje, "Na heni nguvaputsa chinu chimwe. Manyi munjibule na heni nguvajibula ntsin'dita ndongwa tsino kwa wuvetso wa nani. 25 Mbe, wubatitso wa Yohana wahumye kwa nani, mbe, wahumye Kilanga kwa Mulungu awu kwa vanu?"

Lechelelo vakantsaje kiputsa vene kwa vene na kulonga, "Manyi tulonje wahumye kwa Mulungu akutuputsa, mbona simwa mutumbye Yohana? 26 Lechelelo manyi tulonje, wuhumye kwa vanu, Tunguwogopa vanu vano chila cho vafuluche vatudite, kwasawuli veka vangumutsela Yohana kuta avaga muloli va Mulungu." 27 Ihyo vakamulonjelaje Yesu, "Hetwe sinambe tutsele." Nayo Yesu akavalonjelaje, "Heni singuvalonjela ntsin'dita ndongwa tsino kwa mamulaka ga nani."

28 "Lechelelo munhotsa ndawuli? Kwavaga na munu yumwe avaga na vana vavili. Akabitaje kwa yula va kwantsa na kumulonjela, abite kumukolela katsi kumugunda gwa mitsabibu. 29 Yula mwana akamujibulaje dade, heni singubita Lechelelo hambele akagalutsaje mahotso gake, akabitaje kukola katsi. 30 Kaha yula dada akamulonjelaje mwana va kavili, nayo akalongaje, akamudichilaje dade, Lechelelo si akahele kukola katsi. 31 Mbe, nani hagati ha iwo vavili yo akwitsitse cho aganaga dadawo?" Vakamujibulaje, "Yula mulongola." Ihyo Yesu akavalonjelaje, "Ntsinguvalonjela wukweli kuta, vakongotsa kodi hamwe na vanu vanya mbwiniyo tsa waafu vakuvalongola henye kwinjila ku Wuntsajila wa Mulungu. 32 Kwasawuli Yohana Mubatitsi akatsitse kwenyu kuvalajila hila fyo mun'ganika kudita kota fyo an'gana Mulungu, lechelelo henye simwamuhulikitse, lechelelo vakongotsa kodi hamwe na vanya miho matali vakamuhulikitse. Lechelelo henye namuvaje mwatsiwene ndongwa tso aditaga ino henye simwihatsile na kuleka ndongwa tsenyu ntsibi na kaha simwa mutumbye."

33 Yesu akavalonjelaje, "Muhulikitse muhwano gunji. Munu yumwe avaga alimile mugunda gwa mitsabibu na kutsenga lwigo, na akayavaje hono ha kukamila tsabibu, na akatsengaje na hono hachanya ho akwima ili amile mugunda gwake. Kaha akavakodetsaje valimi lechelelo mwene akabitaje ku inyi ya kutali. 34 Chipindi cha kubeta ho chavaga kuva habehi, akavatumaje vatantsi vake kwa vala valimi ili vakamutegulile cho an'ganika kupelwa mu mbeto tsila. 35 Vala valimi vakavabataje kwa lilakali vatantsi vala, yumwe vakamutovaje na yumwe vakamukopolaje na yunji vakamutovaje na maganga. 36 Yula munu akavatumaje vatantsi vanji wolofu kulutila vala valongola. Vala valimi vakavaditilaje kota fyo vavaditye valongola. 37 Ihyo hawudugo wake akamutumaje mwanage kuno anhotsa kuta, manyi vakumwidichila mwanangu. 38 Lechelelo valimi vala hovavaga kumuwona mwanage vakalonganaje vene kwa vene kuta, uyuno yo muhali, lelo tumukopole ili tutegule wuhalo wake! 39 Ihyo vakamubataje kwa lilakali na kumuhumya kivala kwa mugunda gwa mitsabibu, vakamukopolaje."

40 Yesu akavaputsaje, "Henye fyo munhotsa yula munya mugunda ho akuva kutsa akuvadita chinu chachi valimi iwo?" 41 Vala vanu vakamulonjelaje kuta, akuvananga valimi iwo na mugunda gula akuvakodetsela valimi vanji wo vakumupela mbeto hovakuva mwanga vabesile.

42 Iho Yesu akavalonjelaje, "Mbe! Simwasomile lulongwa luno mu Maandiko ga Mulungu?

Liganga lya kutsenjela lyo valilemile vatsentsi,

sambi liveye liganga likomi linofu kulutila geka lyo lin'ganika kwa wutsentsi.

Mutwa yo adisile lulongwa luno, nalo luveye lwa kutupomotsa hetwe."

43 "Ihyo ntsinguvalonjela, Wuntsajila wa Mulungu wukuhetswa kwenyu na vakupelwa vanu vanji wosi Vayawudi wo vakudita kota hila fyo an'gana Mulungu."

44 Munu yoyuve yo akugwa mu liganga ilyo akubeneka fipande fipande, na wone limugwile munu yoyuve likumutijina fipande fipande. 45 Vavina va Vatawula nambiko hamwe na Vafwalisayo ho vavaga kuhulika mihwano ijo, vakatselaje kuta anguvalonga vene. 46 Lelo vakantsaje kusaka kuta vakumubata chinya ndawuli, lechelelo vawogopaga vanu. Kwasawuli vanu vatselaga kuta Yesu yo muloli va Mulungu.