1 Vafwalisayo hamwe na Vasadukayo vakabitaje kwa Yesu kumujela kwa kumusuka avalajile ndongwa tsa ndajilo kuhuma Kilanga. 2 Lechelelo Yesu akavalonjelaje, "Manyi yifiche hamihe henye mulongaga, mitondo kukuva finofu kwasawuli lulanga luveye ludung'u. 3 Hamilawu mulongaga kuta, munyi guno kukuva na ng'ala ngomi kwasawuli lulanga ludung'u na mafuluka gatandite. Henye mufitsele kulava fipindi kwa kulola lulanga fyoluli, lechelelo munlemwa kutsela ndongwa tso tsinhumila sambi tsina mana yachi. 4 Chilelo chino chibi chochinsaka ndongwa tsa ndajilo, ino lelo sichikupelwa, lechelelo ndongwa ya mutinuso gwa Yona ng'ani." Yesu akavalekaje akibitilaje.

5 Vadahitswa vake hovavaga kulowoka ku mwambu gwa lilamba, vakatselaje kuta vasemwe kutegula mabumunda. 6 Yesu akavalonjelaje, "Mwiyangalilaje na hamila ya Vafwalisayo na Vasadukayo." 7 Vakantsaje kulongana vene kwa vene, "Yesu anlonga ihyo kwasawuli tusemwe kutegula mabumunda." 8 Yesu akatselaje chovanlongana ihyo akavaputsaje, "Henye vanu vanya litumbilo lidodo! Mbona munlongana kuta ndawuli simulategula mabumunda? 9 Mbe, Mung'ali kutsela? Mbe, musemwe mabumunda gala gahanu gakwilye kulya vanu elfu tsihanu? Mbe, mwakong'ise fitangula filinga fya filyo fyofyasije? 10 Awu gala mabumunda saba gogakwilye kulya vanu vala elfu tsitayi nafyo mwakong'ise fitangula filinga fya filyo fyofyasije? 11 Yikuva ndawuli sinambe mutsele kuta si ndongije ndongwa tsa mabumunda? Lechelelo cho ndongije kuta, mwiyangalile na madahitso mabi ga Vafwalisayo na Vasadukayo!" 12 Ihyo vadahitswa vake hovakatselaje kuta, siavalonjelaga viyangalile na Vafwalisayo na Vasadukayo na siyo na hamila na mabumunda, ila viyangalile na madahitso mabi.

13 Yesu hamwe na vadahitswa vake hovavaga lubali lwa ku Kayisalia Fwilipi, akavaputsaje, "Vanu vanlonga kuta Mwana va Munu yo nani?" 14 Vakamujibulaje, "Vanji vanlonga kuta yo Yohana Mubatitsi, na vanji valongaga kuta yo Eliya, na vanji kuta yo Yelemiya awu yumwe va valoli va Mulungu." 15 Yesu akavaputsaje, "Henye munlonga kuta heni yo nani?" 16 Simoni Petulo akajibulaje kuta, "Heve yo Chilisito Mukulusi, Mwana va Mulungu yo mumi." 17 Yesu nayo akamulonjelaje, "Utambichilwe heve Simoni mwana va Yona, lulongwa ulo si akugubulye munu yoyuve, ila akugubulye Dada vangu va Kilanga. 18 Yesu akawilaje kulonga kuta, heve yo Petulo, na mwilanga mwa litalawe lino nguchivika chikundi cha vanu wo vangumutumba Chilisito, na wuvetso wa Lihoka siwukuchisuma. 19 Heni ngukupela fungulo tsa Wuntsajila wa Mulungu na chinu chochive cho ukuchidinda mu inyi, chikuva chidindilwe na Kilanga, na kaha chinu chochive cho ukuchidindula mu inyi, chikuva chidinduche na Kilanga."

20 Ihyo Yesu akavalemetsaje ndalahela vadahitswa vake valeche kumulonjela munu yoyuve kuta mwene yo Chilisito muhagulwa.

21 Kuhuma luvala ulo Yesu akantsaje kuvalonjela vadahitswa vake kuta, "Ntsin'ganika kubita ku muji gwa Yelusalemu, uko ngupata ng'odeko ntsolofu kwa vavina va vatawula nambiko, na vadahitsi va malajitso ga Musa, vakung'opola lechelelo siku ya kadatu ngutsilipuka." 22 Petulo akamukwegaje Yesu halubali na akantsaje kumung'anulila akalongaje, "Ndaya Mutwa! Lulongwa ulo silukukupata" 23 Yesu akapitukaje na kumulonjela Petulo kuta, "Uwuche halutalo hangu, Lihoka! Heve yo uli chitindilivasi kwa heni. Mahotso gako si ganhuma kwa Mulungu, lechelelo unhotsa mahotso ga chiwunu." 24 Kaha Yesu akavalonjelaje, "Munu yoyuve manyi an'gana ave mudahitswa vangu, yin'ganika aleche kihotsela mwene, na kitwika musalaba gwake na afwate heni. 25 Kwasawuli munu yoyuve yo an'gana kuwukulusa wumi wake, uyo akuwuyatsa. Lechelelo munu yoyuve yo akuwuyatsa wumi wake kwasawuli ya heni, uyo akuwukulusa. 26 Mbe, munu akupata chichi manyi apate finu fyeka fya muinyi na kuno awuyatsitse wumi wake? Awu akutawula chinu chachi chive badili ya wumi wake? 27 Kwasawuli Mwana va Munu akutsa mu wumelemo wa Dade hamwe na vatantsi va kilanga va Mulungu, na ihyo ho akumuhomba chila munu kota fyo adisile ndongwa tsake. 28 Ntsinguvalonjela wukweli kuta, vamwe venyu hono hano sivafuluche vafwe mbaka hovakumuwona Mwana va Munu ho akuva ankutsa mu Wuntsajila wake."