1 Duve lelo heni yontsili muwopwa kwasawuli ya wutantsi kwa Mutwa, ntsinguvagongola kuta mwikalaje kota hila fyo mwachemilwe na Mulungu. 2 Mun'ganika muvaje vanu va kwika, na vadeche, na vanya kikangatsa, nanye mwifumililaje na kilechela henye kwa henye kwa wugano. 3 Mwikangatsaje kuva na wumwe mu Muhe va Mulungu kuno munguwunanahila wusichimafu. 4 Kuna muvili gumwe na Muhe va Mulungu yumwe hela, kota hila fyo mwachemilwe mu lihuvilo limwe hela. 5 Kuna Mutwa yumwe hela na litumbilo limwe na wubatitso wumwe, 6 kuna Mulungu yumwe nayo yo Dada va hetwe tweka, nayo yo antavala finu fyeka, mugati mwa fyeka.

7 Chila munu apelitwe chifunje cha wiyeka kota hila fyo amugavye Chilisito. 8 Ihyo Mandiko ga Mulungu ganlonga,

"Fyo avaga kubita kuchanya ndalahela,

atweye chikundi cha vanu vawopwa,

na akavatawulaje vave fifunje."

9 Ino lulongwa ulo lwa kulonga kuta, "Fyo avaga kubita kuchanya ndalahela kwa Mulungu," luna mana yachi? Mana yake siyo kulonga kuta, iho hamutalo Chilisito isile mbaka hasi ndalahela ha inyi? 10 Ihyo lelo yula yo isile siyo yo yuyulaga nda yo ahele kuchanya ko kulutye kuchanya kweka ili ave chila hono? 11 Uyo yo agavise fifunje kwa vanu, na vanu vamwe avagavye wutumi, vamwe vave valoli, na vanji vave vavikutsi va Ndongwa Nofu, na vamwe vave vadimi na vamwe vadahitsi va ndongwa tsa Mulungu. 12 Adisile ihyo ili avaviche chang'ani vahagulwa va Mulungu ili vatsidite katsi tso van'ganika kutsidita ili vave na wukangatso kota fyo guli muvili gwa Chilisito. 13 Ihyo kwa kuludita lulongwa ulo, hetwe tweka tuwufichile wumwe wa litumbilo lya kumutsela Mwana va Mulungu, ili tuve vanu wo tukanje na kuva kota hila mwene Chilisito fyoali. 14 Kaha tuleche kuva kota fyali, fyo tunkunugitswa na mavimbi ga lulenga na kuno na kutegulwa na madahitso ga vanu vasugu na kutsifwata ndongwa tsawo tsa wudesi. 15 Lechelelo tuve vanu wo tungilonjela wukweli kwa numbula tsinya wugano, na ihyo tukukalagala kwa chila lulongwa nambe kumufichila Chilisito yo mutavala vetu. 16 Kwa kulongotswa na Chilisito, filungo fyeka fya muvili fivaga fyofimwe kwa midana, na muvili gweka guvaga hamwe kwa kutangwa na filungo fyake. Duve hala filungo fyo fikudita katsi yake finofu kota fyo yin'ganika, nago muvili gweka gunkalagala na kuva finofu kwa wugano.

17 Ino lelo ntsinguvafundani kwa wuvetso wo amelye Mutwa, mulekaje kikala kota vanu vala wo sinambevamutsele Chilisito na kuhotsa ndongwa ntsibi ng'ani, 18 nyala tsawo vanu kota iwo tsigubichwe na jitsa. Nawo vali kutali na wumi wa Mulungu kwasawuli ya wupufi na wudadambafu wowuli mu numbula tsawo. 19 Vanu iwo vagaluche na valihela nyoni, nawo vitotsitse mu ndongwa tsa kuhonga nyoni na vangutsidomboya chila ndongwa ntsibi.

20 Lechelelo henye simwidahitse ndongwa tsinya ihyo kwa Chilisito. 21 Kota hila fyo mwadahitswe ndongwa tsa Chilisito na kuva vafwasi vake, na mukadahitswaje wukweli kukolela mwene. 22 Mwadahitswe kutsileka ndongwa tsenyu ntsibi tso mwatsiditaga iho hamutalo kota hila munu fyo awopolaga mwenda, ndongwa tsila tso mwaditaga hamutalo kwa kufwata mbafya tsa wudesi, 23 na ihyo mun'ganika mugaluche wupya mu numbula tsenyu na mu mahotso genyu. 24 Henye mun'ganika muve na wunu wupya wo wuwumbitwe kwa muhwano gwa Mulungu, vanu wo munlajila kuta mungikala hila fyo yin'ganika na kudita kota fyo an'gana Mulungu.

25 Lelo muleche kuva vadesi! Chila munu an'ganika kumulonjela muyage ndongwa tsa wukweli, kwasawuli hetwe tuli chilungo chimwe mu muvili gwa Chilisito. 26 Manyi muvipe, mulekaje kuyileka mbipo iyo yivambutse kudita ndongwa ntsibi, kahi mulekaje kikala na mbipo iyo munyi gweka. 27 Mwalahogola kulipela nyafwasi Lihoka livasume chinya ihyo. 28 Munu yo avaga muhitsi alahogola kuwupiluchila wuhitsi, ila an'ganika kukola katsi tso tsingidichilwa. Ili ave na finu fya kitanga mwene na fya kuvagavila vagayu. 29 Kaha mulekaje kulonga lulongwa loluve lo luli fibi, chila luvala mulongaje ndongwa nofu ntsa wuwuya tso tsikuvatanga vanu vanji wo vanguvahulikitsa. 30 Mulekaje kumudita Muhe va Mulungu asusutale, kwasawuli uyo yo chitango cha Mulungu kwenyu ya kuta henye muchemilwe na Mulungu, na yo alajila kuta kuna siku Mulungu akutsa kuvagombola nachene. 31 Nachene mulekaje kuvipa, na kuva na ng'alatsi mu numbula tsenyu. Kaha mulekaje kiliga na kihuta matsi ho munlonga, na kiditila wubi wowuve. 32 Mun'ganika muve na numbula nofu na kaha mwiwonelaje lusungu, na chila munu amuhulumilaje muyage kota hila Mulungu fyo avahulumye henye kukolela kwa Chilisito.