1 Hojavaga kulutila myaka kumi na jitayi, ngabitaje kaha ku Yelusalemu hamwe na Balinaba, ngamutegulaje na Tito ili tubitase hamwe nayo. 2 Ntsahele uko kwasawuli Mulungu avaga andonje kwa nduntsuchilo kuta ntsin'ganika kubita, ngavalonjelaje kwa wufiho vala wo vavaga vatumi tsila Ndongwa Nofu tso ntsavikwe kwa vanu wosi Vayawudi. Ntsadisile ihyo kwa kogopa kuta katsi yangu yo ntsin'dita yileche kuva yilihela mana. 3 Vakidichilaje kuva na heni, nambe muyangu Tito yo avaga Mujilichi na siavaga inje likumbi hoavaga kufika ku Yelusalemu, vatumi sivamugwagwaditse kwinjila likumbi, 4 nayivaje kwavaga na vanu wo viditaga kuta vamutumbye Chilisito wo vaganaga Tito injile likumbi. Vanu iwo vihantsitse kwa wusugu vatuhime ndalahela wuhulu wetu wo tunawo kwa kula kihantsa na Chilisito Yesu, ili hambele vatudite tuve tuvapogotsi va malanjitso ga Musa, 5 lechelelo tukalemaje nachene kidichila hila fyo van'gana vene nambe lulongwa lumwe, ili wukweli wa Ndongwa Nofu tsa Mulungu wusigale na henye.

6 Filongotsi iwo wo vahemilwaga hilo sivakambwilye mahotso gogave. Kweli vahesimilwaga hilo, lechelelo kwa heni siyo chinu chochive, kwasawuli Mulungu si ahigaga kwa kulola kumiho kwa munu. 7 Tebe na ihyo, vakatselaje kuta Mulungu avaga anumile kuvikula Ndongwa Nofu kwa vanu wosi Vayawudi kota hila Petulo fyo avaga atumilwe kuvikula Ndongwa Nofu tsa Mulungu kwa Vayawudi. 8 Mulungu yula yo amudisile Petulo ave mutumi kwa Vayawudi, yo yuyo yo andisile na heni ntsive mutumi kwa vanu wosi Vayawudi. 9 Ihyo Yakobo, Petulo na Yohana, vawonekaga kuta wo vavina va chikundi cha vanu vanya litumbilo, hovavaga kutsela kuta Mulungu anantsile ntsive na wuwuya uwo, vakidichilaje kuta heni na Balinaba tubite kwa vanu wosi Vayawudi, na vene vave kwa Vayawudi. 10 Ila vakatulonje lulongwa ulu kuta tuviwukaje vagayu, na heni mbeye ntsingikangatsa kuludita lulongwa.

11 Hala Petulo ho avaga kutsa ku muji gwa Andiyochiya ngasumanaje nayo halutalo ha vanu, kwasawuli avaga akosye nachene. 12 Hamutalo vanu wo vavaga vatumilwe na Yakobo hovavaga vang'acha kufika hono iho, Petulo avaga angihanga kulya na vanu wosi Vayawudi. Lechelelo vanu iwo hovavaga kufika akantsaje kikwega na vanu wosi Vayawudi kwasawuli wogopaga Vayawudi vala wo vavagwagaditsaga vanu vinjile likumbi. 13 Vayawudi vanji vanya litumbilo lya Chilisito nawo vakaludichilaje lulongwa lula lwa chipitupitu lo aditaga Petulo, nambe Balinaba nayo akakwegwaje na lulongwa ulo. 14 Lelo ho ntsavaga kuwona kuta chila cho van'dita si chili sava na wula wukweli wa Ndongwa Nofu fyo tsin'gana, ngamulonjelaje Petulo halutalo ha vanu veka kuta, "Heve uli Muyawudi na ungikala kota vanu wosi Vayawudi, na sinambeufwate ntsovelo tsa Chiyawudi. Kwasawuli yachi mun'jela kuvagwagwaditsa vanu wosi Vayawudi vafwate ntsovelo tsa Chiyawudi?"

15 Wukweli kwa kuleleka tuli Vayawudi siyo kota, "Vanu va inyi tsinji wo Vayahudi wo vavachemaga kuta vana ndongwa ntsibi." 16 Tung'acha tun'tsela nachene kuta munu siafuluche adite kota fyo an'gana Mulungu kwa kugafwata malajitso ga Musa, ila kwa kumtumba Yesu Chilisito. Ihyo na hetwe Vayawudi natwe tumutumbye Chilisito Yesu ili twidichilwe halutalo ha Mulungu, kwasawuli kuduhu munu yoyuve yo afuluche adichilwe na Mulungu kwa ng'olwa na kwa kibata malajitso ga Musa. 17 Ino lelo manyi tun'gana kidichilwa na Mulungu kwa kihantsa na Chilisito hetwe tukuwoneka kuta tuna ndongwa ntsibi. Mbe, vanu sivafuluche kuhotsa kuta Chilisito anguvatanga vanu kudita ndongwa ntsibi? Ndaya Chilisito siali ihyo ndaya. 18 Manyi ndeche kugafwata Malajitso ga Musa ili ntsidichilwe na Mulungu, na hambele kaha ntsan'tse kugafwata Malajitso ga Musa. Nguva ntsingilajila nachene kuta heni mwene ntsina ndongwa ntsibi. 19 Kwa kukolela kwa malajitso ga Musa heni ntsafweye, yandisile ntsifwe ili ntsive mumi kwasawuli ya Mulungu. Heni fweye mumusalaba hamwe na Chilisito. 20 Ihyo ntsili mumi, ihyo siyo heni, ila ntsingikala ila Chilisito yo mumi mugati mwangu. Wumi wo ntsinawo sambi wuhumye mu litumbilo lya Chilisito Mwana va Mulungu, yo anganile mbaka akitawulaje wumi wake kwasawuli ya heni. 21 Sinambe ntsiwuleme wuwuya wa Mulungu, kwasawuli manyi wuwuya wuka wuve wupatikanaga kwa kugafwata malajitso ga Musa, duve chifo cha Chilisito chilihela mana yoyive.