2 Rəbbik akarna q’ör’esda məxrına muq’addasna deşda,

Ya Rəbb, Ğu sa vorna!

Yişda Allah xhinnena şi havaacena merna deşda!

17 Yiğın cuvab hək’en vodun. Manbı mane hək’ene cuvabıka Yiğneme curee’e.

5 I’sa Masihee nəxbına fıkıriy hav’u, şunab həməxübna fıkır hee’e.

1 Masihıkane ı’mı’ren şos yik’bı hele, Mang’une vukkiykıniyn vuşun yik’bı cigeeqa qalya’a. Allahın Rı’h şoka yuşan ha’a, vuşun yik’bı g’üvənada, şunab rəhı’m haa’a. 2 Mançil-allab şu sa fıkrel vuxhe, sana-sang’us akaran vukkiykıniy hagve. Şu sanab vuxhayka yizın yik' sık’ıldad geed şade’e. 3 Şu, paxılıyvalla haa’ava, şucab-şu axtıba vukkekkava, vuççud hımaa’a. Şu vuk’ul avqa g’a’apçe, mansanbı şole ooqa avqe. 4 Şu vuşdacab hımaa’a, merıng’unab hee’e.

5 I’sa Masihee nəxbına fıkıriy hav’u, şunab həməxübna fıkır hee’e.

6 Vuc hək’ena Allah ixheeyir,

Mana Cune allahiyvalik it’umra at’irq’ın deş.

7 Mang’vee Cuna xəbvalla g’alepçına,

Vuc g’uluk akar qı’ı,

məxür insanaaşik akar qıxha.

İnsanık akar qıxha,

8 Vuc avqana hı’ı.

Allahıl k’ırı alixhxhı, qik’as ark’ın,

çarmıxıl qik’as ark’ın.

9 Mançil-allar Allahee Mana geer ooqana hı’ı,

Mang’us gırgıne dobışile ooqan do huvu.

10 Məxüb xəə, ç’iyel, ç’iyek avud manbışin gırgınbı

I’sayne doyune ögil q’aratsabışil gyuv’recen,

11 gırgıne mizyaaşe Dek Allahne xəbvalinemee

I’sa Masih Rəbb ıxhay eyhecen.

12 Zas geeb vukkananbı, şu gırgıne gahbışil k’ırı iliyxhen xhinne, saccu zı k’anenang’acad deş, zı k’ane deşdang’ad çikana k’ırı alixhxhe. Allahıle qəpq’ı’n, Mang’us hı’rmat gyuvxhe. Udyoozar vuşde işbışika Mang’vee şu g’attivxhan hav’iy hagve. 13 Allahee Vuşde ab iş haa’a. Mançil-alla şos Mang’ul k’ırı alixhes ıkkanan, Cus ıkkananıd şu ha’an. Mang’vee yişin işbı Cune yik’eençe ixhecenva məxüd ha’a.

14 Gırgın kar şikayat hidyav’u, siç’devku he’e. 15 Qopkuynbı, məttınbı vuxha ine quç’opkurne, yəqqı’le qığeepç’iyne insanaaşine yı’q’nee, Allahın məttın uşaxar vuxhe. Miç’axne xəədın xənebı xhinne insanaaşine yı’q’nee hits’aaghar vuxhe. 16 Gırgıne gahbışisde ı’mrene hək’eedın cuvab it’umda aqqe. Manke Masih qalesde yiğıl zı xıliyna masaafa g’adapxhınne idmançee xhinneeyiy yugba iş hav’une işçee xhinne mukaafat alyaat’as. 17 Vuşun iman q’urbaniy ı’bəədat xhinne vod. Yizda eb k’yapk’ınee, vuşde q’urbanna pay xhinne vuxhes. Mançil-allar zı vuşde gırgıng’uka şadexhena. 18 Şunab zaka sacigee şadeepxhe.

19 Zas ıkkanan, şu nəxübiyva ats’axhxha, yizınıd yik' vaxxariy qixhecen. Zı umud haa’ana, Xərne I’see həşdebışee Timotey vuşde k’anyaqa g’axılesda yəq' haagvasda. 20 Timotey xhinnena, vuşda yik’eençe haa’ana, zaqa merna deşda. 21 Avxuyne gırgınbışe I’sa Masihıs ıkkanan deş, cos ıkkanan ha’a. 22 Şok’lecad ats’an, Timoteyee vuc işika hagu. Mang’vee Yugna Xabar zakasana hivxhar hav’u, dixee dekkıs g’ullux haa’an xhinne. 23 Mançil-allab zı umud haa’ana, yizde vuk’lelqa qalesın ats’axhxhamee, zı mana şosqa g’axıles. 24 Zak’le yugda ats’a, Rəbbee zasıb həşdebışee vuşde k’anyaqa ayresda yəq' hevles vuxhay.

25 Həşdemee, Epafrodit şosqa yı’q’əlqa sak’al hı’iy zasqa qotkuda qöö. Mana yizda çoc, zaka sa iş g’oocena, zına xhineena Masihna esker vorna. Şu mana zas kumag ha’as g’axuvu. Epafroditee zas kumag adıyka muq’addasna iş hav’u. 26 Mang’us sayib şu g’avces geeb vukkan, şok’le vuc ık’arva g’ayxhıva mang’vee aq’va qı’ı. 27 Mana hək’erar həməxür ık’iyk’ır, qik’asse axu. Allahna saccu mang’ulqa deş, zalqab abına derd sık’ılbab hexxımooxhecenva, zalqab çikana rəhı’m qabı. 28 Şok’le Epafrodit g’acu, şadeepxhecenva, yizdab derd k’ıl quvxhecenva, zı mana zaara vuşde k’anyaqa g’ıxele. 29 Mana sak’ı qarımee, yik’eençe şadeepxhe. Məxüd Rəbbis iman ha’anbışe ha’as ıkkan. Məxrına axtıra aqqe. 30 Şu yizde k’ane deşdang’a, mang’vee cuna ı’mı’r qivdiykkın zas kumag hı’ı. Məxür mana Masihne muq’addasne işinemee qik’asse axu.

48 Hasre vuşdab yugvalla Xəybışeene Dekkına yugvalla xhinne ç’əvcab dyooxhena vuxhecen.

10 Rəbbile qəpq’ı’niy ats’alyne q’oma ulyozzur,

Muq’addasna qıvaats’ıyid ək’elika ıxhay vodun.

25 Ts’etta Allahıs g’assır,

qiyğa mançina fıkır opxhanang’vee cuscab gugu giviyxhe.