1 Agus chuir an rìgh teachdairean uaithe, agus chruinnich da ionnsaigh uile sheanairean Iùdah, agus Ierusaleim.

2 Agus chaidh an rìgh suas do thaigh an Tighearna, agus daoine Iùdah uile, agus uile luchd-àiteachaidh Ierusaleim maille ris, agus na sagartan, agus na fàidhean, agus an sluagh uile eadar bheag agus mhòr: agus leugh e nan èisdeachd uile bhriathran leabhar a’ choicheangail, a fhuaireadh ann an taigh an Tighearna.

3 Agus sheas an rìgh làimh ri post; agus rinn e coicheangal am fianais an Tighearna gun gluaiseadh iad an dèidh an Tighearna, agus gun gleidheadh iad a àitheantan, agus a theisteis, agus a reachdan len uile chridhe, agus len uile anam, a choileanadh briathran a’ choicheangail seo, a tha sgrìobhte anns an leabhar seo: agus sheas an sluagh uile ris a’ choicheangal.

4 Agus dh’àithn an rìgh do Hilciah an t‑àrd-shagart, agus do shagartan an dara òrdaigh, agus do luchd-gleidhidh an dorais, na soithichean uile a rinneadh do Bhàal, agus don doire, agus do uile armailt nèimh, a thoirt a‑mach à teampall an Tighearna: agus loisg e iad an taobh a‑muigh de Ierusalem ann am machraichean Chidroin, agus ghiùlain e an luath gu Betel.

5 Agus chuir e as do shagartan an iodhal-adhraidh, a dh’òrdaich rìghrean Iùdah a losgadh tùis anns na h‑àitean àrda, ann am mòr-bhailtean Iùdah, agus anns na h‑àitean mu thimcheall Ierusaleim; iadsan mar an ceudna a loisg tùis do Bhàal, don ghrèin, agus don ghealaich, agus do na reultan seachranach, agus do uile armailt nèimh.

6 Agus thug e an doire o thaigh an Tighearna, an taobh a‑muigh de Ierusalem, gu sruth Chidroin, agus mhìn-phronn e gu luaithre e, agus thilg e a luaithre air uaighean clann an t‑sluaigh.

7 Agus bhris e sìos taighean nan Sòdomach a bha làimh ri taigh an Tighearna, far an robh na mnathan a’ fighe chùirteanan don doire.

8 Agus thug e a‑mach na sagartan uile à bailtean Iùdah, agus thruaill e na h‑àitean àrda far an do loisg na sagartan tùis, o Gheba gu Beer-sèba, agus bhris e sìos àitean àrda nan geatachan, a bha ann an dol a‑steach geata Iosua, uachdaran a’ bhaile, a bha air làimh chlì duine ann an geata a’ bhaile.

9 Gidheadh, cha deachaidh sagartan nan àitean àrda suas gu altair an Tighearna ann an Ierusalem, ach dh’ith iad aran neo-ghortaichte am measg am bràithrean.

10 Agus thruaill e Tophet a tha ann an gleann mac Hinnoim, a‑chum is nach faodadh duine air bith toirt air a mhac no air a nighinn dol tron teine do Mholech.

11 Agus thug e air falbh na h‑eich a thug rìghrean Iùdah don ghrèin, o dhol a‑steach taigh an Tighearna, làimh ri seòmar Nàtan-meleich an caillteanach, a bha anns a’ mhach-bhaile, agus loisg e carbadan na grèine le teine.

12 Agus na h‑altairean a bha air mullach seòmar uachdarach Ahais, a rinn rìghrean Iùdah, agus na h‑altairean a rinn Manaseh ann an dà chùirt taigh an Tighearna, thilg an rìgh sìos, agus bhris e o sin iad, agus thilg e an luaithre ann an sruth Chidroin.

13 Agus na h‑àitean àrda a bha fa chomhair Ierusaleim, a bha air an làimh dheis de shliabh na truaillidheachd, a thog Solamh rìgh Israeil do Astarot, gràinealachd nam Mòabach, agus do Mhilcom, gràinealachd chloinn Amoin, thruaill an rìgh.

14 Agus bhris e nam bloighdean na dealbhan, agus gheàrr e sìos na doireachan, agus lìon e an àitean le cnàmhan dhaoine.

15 Os bàrr, an altair a bha aig Betel, agus an t‑àit àrd a rinn Ierobòam mac Nebait, a thug air Israel peacachadh, araon an altair agus an t‑àit àrd; agus mhìn-phronn e gu luaithre e, agus loisg e an doire.

16 Agus nuair a thionndaidh Iosiah mun cuairt, chunnaic e na h‑uaighean a bha an sin anns an t‑sliabh, agus chuir e daoine uaithe, agus thug e na cnàmhan as na h‑uaighean, agus loisg e iad air an altair, agus thruaill e i, a rèir facal an Tighearna, a labhair òglach Dhè a chuir an cèill na briathran seo.

17 An sin thubhairt e, Ciod e an carragh seo a tha mi a’ faicinn? Agus thubhairt daoine a’ bhaile ris, Is i uaigh òglach Dhè a tha ann a thàinig o Iùdah, agus a chuir an cèill na nithean sin a rinn thusa an aghaidh altair Bheteil.

18 Agus thubhairt e, Leigibh leis; na gluaiseadh duine sam bith a chnàmhan-san: agus leig iad tàmh da chnàmhan maille ri cnàmhan an fhàidh a thàinig à Samaria.

19 Agus mar an ceudna, uile thaighean nan àitean àrda a bha ann am bailtean Shamaria, a rinn rìghrean Israeil a bhrosnachadh an Tighearna gu feirg, thug Iosiah air falbh, agus rinn e a rèir nan uile ghnìomh a rinn e ann am Betel.

20 Agus mharbh e uile shagartan nan àitean àrda a bha an sin air na h‑altairean, agus loisg e cnàmhan dhaoine orra, agus thill e gu Ierusalem.

21 Agus dh’àithn an rìgh don t‑sluagh uile, ag ràdh, Cumaibh a’ chàisg don Tighearna ur Dia, mar a tha e sgrìobhte ann an leabhar a’ choicheangail seo.

22 Gu cinnteach cha do chumadh a leithid seo de chàisg o làithean nam britheamhan a thug breith air Israel, no ann an uile làithean rìghrean Israeil, no rìghrean Iùdah:

23 Ach anns an ochdamh-bliadhna-deug de rìgh Iosiah chumadh a’ chàisg seo don Tighearna ann an Ierusalem.

24 Os bàrr, luchd nan leannan-sìth, agus an luchd-fiosachd, agus na dealbhan, agus na h‑iodhalan, agus gach uile ghràinealachd a chunnacas ann an tìr Iùdah, agus ann an Ierusalem, chuir Iosiah air falbh, a‑chum gun coileanadh e briathran an lagha a bha sgrìobhte anns an leabhar a fhuair Hilciah an sagart ann an taigh an Tighearna.

25 Agus cosmhail ris-san cha robh rìgh air bith roimhe, a thill a dh’ionnsaigh an Tighearna le a uile chridhe, agus le a uile anam, agus le a uile neart, a rèir lagh Mhaois uile; agus na dhèidh cha d’èirich a shamhail.

26 Gidheadh, cha do thill an Tighearna o theas a fheirge mòire, leis an do las a fhearg an aghaidh Iùdah, airson nan uile bhrosnachadh leis an do bhrosnaich Manaseh e.

27 Agus thubhairt an Tighearna, Atharraichidh mi Iùdah mar an ceudna as mo shealladh, mar a dh’atharraich mi Israel, agus cuiridh mi cùl gu tur ris a’ mhòr-bhaile seo Ierusalem, a thagh mi, agus ris an taigh mun dubhairt mi, Bidh m’ainm an sin.

28 Agus a’ chuid eile de ghnìomharan Iosiah, agus na h‑uile nithean a rinn e, nach eil iad sgrìobhte ann an leabhar eachdraidh rìghrean Iùdah?

29 Na làithean-san chaidh Phàraoh-necho rìgh na h‑Eiphit suas an aghaidh rìgh Asiria gu abhainn Euphràtes: agus chaidh rìgh Iosiah na aghaidh, agus mharbh esan e aig Megido nuair a chunnaic e e.

30 Agus ghiùlain a sheirbhisich e marbh ann an carbad o Mhegido, agus thug iad e gu Ierusalem, agus dh’adhlaic iad e na uaigh fhèin: agus ghabh sluagh na tìre Iehoahas mac Iosiah, agus dh’ung iad e, agus rinn iad na rìgh e ann an àit a athar.

31 Trì-bliadhna-fichead a dh’aois bha Iehoahas nuair a thòisich e air rìoghachadh; agus rìghich e trì mìosan ann an Ierusalem: agus b’e ainm a mhàthar Hamutal, nighean Ieremiah o Libnah.

32 Agus rinn e olc ann an sùilean an Tighearna, a rèir nan uile nithean a rinn a athraichean.

33 Agus chuir Phàraoh-necho e ann an cuibhrichean aig Riblah ann an tìr Hamait, a‑chum nach rìoghaicheadh e ann an Ierusalem: agus chuir e ceud tàlann airgid agus tàlann òir mar chìs air an tìr.

34 Agus rinn Phàraoh-necho Eliacim mac Iosiah na rìgh an àite Iosiah a athair agus thionndaidh e a ainm gu Iehoiacim, agus thug e air falbh Iehoahas; agus thàinig e don Eiphit, agus dh’eug e an sin.

35 Agus thug Iehoiacim an t‑airgead agus an t‑òr do Phàraoh: ach thug e fa‑near an tìr a mheas a‑chum gun ìocadh iad an t‑airgead a rèir àithne Phàraoh; dh’iarr e an t‑airgead agus an t‑òr o shluagh na tìre, o gach neach a rèir a mheas, gus a thabhairt do Phàraoh-necho.

36 Còig-bliadhna-fichead a dh’aois bha Iehoiacim nuair a thòisich e air rìoghachadh, agus rìghich e aon-bhliadhna-deug ann an Ierusalem; agus b’e ainm a mhàthar Sebudah, nighean Phedaiah o Rumah.

37 Agus rinn e olc ann an sùilean an Tighearna, a rèir nan uile nithean a rinn a athraichean.