Eseciel 32

1 Agus thàrladh, anns an dara-bliadhna-deug, anns an dara-mìos-deug, air a’ chiad là den mhìos, gun tàinig facal an Tighearna am ionnsaigh, ag ràdh,

2 A mhic an duine, tog suas tuireadh airson Phàraoh rìgh na h-Eiphit, agus abair ris, Is cosmhail thu ri leòmhann òg de na cinnich, agus tha thu mar uabheist anns na cuantan; agus thàinig thu a-mach led shruthan, agus chuir thu troimhe chèile na h-uisgeachan led chasan, agus shalaich thu an aibhnichean.

3 Mar seo tha an Tighearna Dia ag ràdh, Sgaoilidh mise uime sin mo lìon os do chionn, le cuideachd mòran chinneach, agus bheir iad a-nìos thu ann am lìon.

4 An sin fàgaidh mi air an talamh thu, tilgidh mi a-mach air an fhaiche luim thu, agus bheir mi air uile eunlaith an adhair laighe ort, agus bheir mi do uile bheathaichean na talmhainn an sàth dhìot.

5 Agus cuiridh mi d’fheòil air na slèibhtean, agus lìonaidh mi na glinn led thulaichean.

6 Uisgichidh mi fòs led fhuil am fearann anns a bheil thu a’ snàmh, gu ruig na slèibhtean; agus bidh na h-aibhnichean làn dhìot.

7 Agus nuair a chuireas mi as thu, falaichidh mi na nèamhan, agus nì mi an reultan dorcha: còmhdaichidh mi a’ ghrian le neul, agus cha toir a’ ghealach seachad a solas.

8 Uile sholais dhealrach nèimh nì mi dorcha os do chionn, agus cuiridh mi dorchadas air d’fhearann, deir an Tighearna Dia.

9 Cuiridh mi fòs doilgheas air cridheachan mòran dhaoine, nuair a bheir mi do lèirsgrios am measg nan cinneach, gus na dùthchannan nach b’aithne dhut.

10 Seadh, cuiridh mi air mòran dhaoine uamhas dod thaobh, agus bidh eagal ro-mhòr air an rìghrean air do shon, nuair a thogas mise mo chlaidheamh nan làthair; agus criothnaichidh iad ann an tiota; gach aon airson a bheatha fhèin, ann an là do leagaidh-sa.

11 Oir mar seo tha an Tighearna Dia ag ràdh, Thig claidheamh rìgh Bhàbiloin ort.

12 Le claidheamhan nan cumhachdach bheir mise air do mhòr-chuideachd tuiteam, leòsan uile as uamhasaiche de na cinnich; agus millidh iad mòrchuis na h-Èiphit, agus bidh a mòr-shluagh gu lèir air an sgrios.

13 Sgriosaidh mi fòs a h-ainmhidhean uile o thaobh nan uisgeachan mòra, agus cha chuir cas duine dragh orra tuilleadh, cha mhò a ghluaisear iad le iongannan ainmhidh.

14 An sin nì mise an uisgeachan domhain, agus bheir mi air an aibhnichean ruith mar ola, deir an Tighearna Dia.

15 Nuair a nì mi tìr na h-Èiphit na fàsach, agus a bhios an dùthaich falamh den nì sin den robh i làn, nuair a bhuaileas mi na h-uile a tha a chòmhnaidh innte, an sin aithnichidh iad gur mise an Tighearna.

16 Seo an tuireadh leis an tuir iad os a cionn: Nì nigheanan nan cinneach caoidh air a son: nì iad caoidh air a son, airson na h-Èiphit, agus airson a mòr-shluaigh uile, deir an Tighearna Dia.

17 Thàrladh mar an ceudna, anns an dara-bliadhna-deug, air a’ chòigeamh-là-deug den mhìos, gun tàinig facal an Tighearna am ionnsaigh, ag ràdh,

18 A mhic an duine, dèan cumha airson mòr-shluagh na h-Èiphit, agus tilg sìos iad, i fhèin agus nigheanan nan cinneach iomraiteach, gu ionadan ìochdarach na talmhainn, maille riùsan a thèid sìos don t-sloc.

19 Cò air a bheil thu a’ toirt barrachd ann am maise? Imich sìos, agus laigh leis na neo-thimcheall-gheàrrte.

20 Tuitidh iad nam meadhon-san a mharbhadh leis a’ chlaidheamh: thugadh thairis don chlaidheamh i: tàirngibh a-mach i fhèin agus a sluagh gu h-iomlan.

21 Labhraidh cinn-fheadhna nan cumhachdach ris o mheadhon an ionaid ìochdaraich, maille riùsan a chuidich leis: chaidh iad sìos, tha iad nan laighe leis na neo-thimcheall-gheàrrte a mharbhadh leis a’ chlaidheamh.

22 Tha Asur an sin agus a chuideachd uile: tha a uaighean-san ma thimcheall: tha iad uile marbh, air tuiteam leis a’ chlaidheamh.

23 Tha an uaighean air an suidheachadh air gach taobh den t-sloc, agus tha a chuideachd mu thimcheall uaighe: iad uile air am marbhadh, air tuiteam leis a’ chlaidheamh, a dhùisg uamhas ann an tìr nam beò.

24 An sin tha Elam agus a shluagh uile mu thimcheall a uaighe, iad uile air am marbhadh, air tuiteam leis a’ chlaidheamh; chaidh iadsan sìos neo-thimcheall-gheàrrte gu ionadan ìochdarach na talmhainn, a dhùisg uamhas ann an tìr nam beò; gidheadh ghiùlain iad an nàire leòsan a chaidh sìos don t-sloc.

25 Ann am meadhon nam marbh shuidhich iad leabaidh dha maille ra uile shluagh: tha an uaighean ma thimcheall, iad uile neo-thimcheall-gheàrrte air am marbhadh leis a’ chlaidheamh: ged a dhùisgeadh an uamhas ann an tìr nam beò, gidheadh ghiùlain iad an nàire leòsan a chaidh sìos don t-sloc: chuireadh e ann am meadhon na muinntir a mharbhadh.

26 An sin tha Mesech, Tubal, agus a shluagh uile; tha an uaighean ma thimcheall: iad uile neo-thimcheall-gheàrrte, air am marbhadh leis a’ chlaidheamh, ged a sgaoil iad an uamhas ann an tìr nam beò.

27 Agus cha laigh iad leis na cumhachdaich, a thuit de na neo-thimcheall-gheàrrte, a chaidh sìos do ifrinn len airm-chogaidh; agus chuir iad an claidheamhan fon cinn, ach bidh an aingidheachd air an cnàmhan, ged a b’iad uamhas nan cumhachdach ann an tìr nam beò.

28 Seadh, brisear thu ann am meadhon nan neo-thimcheall-gheàrrte, agus laighidh tu leòsan a mharbhadh leis a’ chlaidheamh.

29 An sin tha Edom, a rìghrean, agus a phrionnsachan uile, a tha len neart nan laighe ann am fochar na muinntir a mharbhadh leis a’ chlaidheamh: laighidh iad leis na neo-thimcheall-gheàrrte, agus leòsan a thèid sìos don t-sloc.

30 An sin tha prionnsachan na h-àird a tuath, an t-iomlan dhiubh, agus na Sìdonaich uile, a chaidh sìos leis na mairbh, len uamhas tha nàire orra den cumhachd; agus tha iad nan laighe neo-thimcheall-gheàrrte leòsan a mharbhadh leis a’ chlaidheamh, agus a’ giùlan an nàire leòsan a thèid sìos don t-sloc.

31 Chì Phàraoh iad, agus bidh comhfhurtachd aige os cionn a mhòr-chuideachd uile, eadhon Phàraoh agus a fheachd gu lèir air am marbhadh leis a’ chlaidheamh, deir an Tighearna Dia.

32 Oir dhùisg mise m’uamhas ann an tìr nam beò: agus suidhichear esan ann am meadhon nan neo-thimcheall-gheàrrte, leòsan a mharbhadh leis a’ chlaidheamh, Phàraoh agus a shluagh gu lèir, deir an Tighearna Dia.