1 Nde Piyɛri, Isa Ɲenematɔmɔnin na talibidenba, nde le ɲin sɛbɛla Alla la mɔɔ suwandininilu ma, mɛnilu lajɛnsɛnni londanya rɔ Pɔnti ni Kalati ni Kapadɔsi ni Asi a ni Bitini jamanailu rɔ. 2 Ai suwandinin le ikomin An Fa Alla hankili tɛrɛ a ma ɲa mɛn ma. A ra ai lasɛninya a la Nii Sɛniman baraka rɔ kosa ai ye kolo Isa Ɲenematɔmɔnin ma, a jeli ye sadisadi ai ma ai lasɛninya kɔrɔ. Alla ye sɔlini ni jususuma sabati ai rɔ!

3 Tando ye kɛ an na Maari Isa Ɲenematɔmɔnin na Fa a ni Alla yɛ. A ra a kɛ a la kininkinin ba rɔ, ka an kɔsɛ, ka sɔrɔn kokura, ka don niilakisi jii rɔ Isa Ɲenematɔmɔnin nawuli fɛ mɛn bɔnin saya rɔ. 4 Cɛ mɛn tɛ tiɲanna, a tɛ kɔrikɔrila, a tɛ tununna ka tamin, wo le lamarani ai yɛ harijeene, 5 ai le mɛnilu kandannin a fanka la lemɛniya fɛ kosa ai ye kisi sɔrɔn, mɛn ye bɔla kɛnɛma waati labanilu rɔ.

6 Wo rɔ, ai ye sɛwa, hali ai tɔrɔni ai kɔrɔbɔ ko su bɛɛ rɔ waatinin ɲin dɔ 7 kosa ai la lemɛniya ye lasɛnsɛn. Hali sanin mɛn di se tiɲanna, wo ye yelenna ta le la, ka lasɛnsɛn. Wo rɔ, ai la lemɛniya mɛn tɔnɔ ka bon sanin di, wo fanan ka kan ka lasɛnsɛn kɔrɔbɔli rɔ, ka tandoli ni gbiliya ni kunnafulen sɔrɔn Isa Ɲenematɔmɔnin di bɔ waati rɔ kɛnɛma. 8 Ai ma Maari yen fɔlɔ kɔni ai ra a kanin. Ai tɛ a yenna sisɛn, kɔni ai ye ai lemɛniyala a ma, ai ye sɛwa ba rɔ mɛn ti se ɲafɔla. 9 Ka a masɔrɔn ai ye ai lemɛniya kun sɔrɔnna, mɛn kɛni ai sɔnɔmɛ kisi ko ri.

10 Keladen fisamante mɛnilu ka sɔlini ko fɔ, mɛn tɛrɛ latɛɛni ai ma, mɛn kɛni kisi ko ri, wo ra kɛ woilu la ko ɲaɲinin ni ko fɛsɛfɛsɛ kun di. 11 Ii tɛrɛ ye karanna waatiilu ni kɛɲailu lɔn kɔrɔ, Ɲenematɔmɔnin na Nii tɛrɛ ye mɛnilu lɛnkɛnɛmayala ii yɛ, baa a tɛrɛ ye ii rɔ, ka Ɲenematɔmɔnin na tɔrɔya ni a la gbiliya natɔla la ko fɔ sani a waati ye se. 12 Alla ka a yiraka le kelalaselailu la, ko ii tɛrɛ tɛ baarala ii jɛrɛ yɛ kɔni ai le, ii tɛrɛ ye koilu fɔla ai ka mɛnilu la ko lamɛn wo mɔɔilu la mɛnilu ka Kibaro Ɲuma lase ai ma Nii Sɛniman baraka rɔ mɛn bɔni harijeene. Hali mɛlɛkailu fanan kunfannin wo ko fɛsɛfɛsɛ kɔrɔ.

13 Wo le rɔ, ai ye ai hankili rabɛn baara la ko rɔ, ka ai jɛrɛ mira, ka ai jii la wo sɔli rɔ ai ye mɛn sɔrɔnna Isa Ɲenematɔmɔnin di bɔ waati rɔ kɛnɛma. 14 Ai ye to ikomin Alla den koloniilu, ai kana sɔn tola ai la kunfan juuilu rɔ, ai tɛrɛ ye mɛnilu rɔ ai la hankilidɔɔya rɔ. 15 Kɔni ikomin Alla sɛniman da aile kili, aile fanan ye sɛninya ai kɛwaliilu bɛɛ rɔ. 16 Ka a masɔrɔn a sɛbɛni, «Ai ye sɛninya, ka a masɔrɔn nde sɛniman.*»

17 Baa ai ye ai Fa Alla matarala, mɛn ye mɔɔilu bɛɛ kɛwaliilu makitila ɲa kelen ma, ai ye to ikomin londanilu dunuɲa ɲin dɔ, ka kolo Alla ma. 18 Ai ka a lɔn ko ai ma kunka ai failu la namun ko fuuilu ma, fen tiɲan tailu la ikomin wodi wala sanin, 19 kɔni ai kunkani Ɲenematɔmɔnin jeli fisamantɛ le la, mɛn bɔni sarakaya la ikomin saa bulan, fɛɛ tɛ mɛn na a ni mɛn ɲatɛɛni tɛ. 20 Alla tɛrɛ ra wo suwandi sani dunuɲa ye dan, ka a labɔ kɛnɛma ai le la ko rɔ waati laban ɲinilu rɔ. 21 Ai lemɛniyani Alla ma ale le baraka rɔ, Alla mɛn ka a lawuli saya rɔ, a ka gbiliya di wo ma, kosa ai la lemɛniya ni jii ye to Alla rɔ.

22 Baa ai ra ai jɛrɛ nii ladahaya tuɲa mira fɛ, ka kaninteya bɛrɛ sɔrɔn ai badenmailu yɛ, wo rɔ, ai ye ai ɲɔɔn kanin ai fanka bɛɛ la, ai sɔnɔmɛ dahanin dɔ. 23 Ka a masɔrɔn ai ra ai kɔsɛ, ka sɔrɔn kuraya fanan, mɛn ma fara adamaden na mɛn ye faala, kɔni ka fara Alla la kuma la mɛn ye niila, a ri to habadan. 24 Baa a sɛbɛnin Kitabu kɔndɔ ko,

«Adamadenilu bɛɛ kɛnin de

ikomin bin,

ii la gbiliya bɛɛ kɛnin

ikomin fen fere.

Binilu ye jala,

ii fereilu ye burunna.

25 Kɔni Maari la kuma ye tola le habadan.»*

Wo kuma kɛnin Isa la Kibaro Ɲuma le ri mɛn naseni ai ma.