1 Baa Alla ra an lahidi ko ɲinilu bɛɛ la, teriilu, an ye an jɛrɛ lasɛninya ko bɛɛ rɔ mɛn ye an faribanku ni an nii lakɔsɔla, ka to an na sɛninya lakanbalila Alla ɲakɔrɔsilan dɔ.

2 Ai jusu rabɛn an yɛ. An tɛ telenbaliya kɛla mɔɔ si la, an tɛ ii lafili, an tɛ ii bolo fen kansonya. 3 N tɛ ɲin fɔla ai jalaki ko la, ka a masɔrɔn n tun da a fɔ a fɔlɔ rɔ ko ai la ko ye an jusu rɔ ɲa mɛn ma, an bɛɛ le siimaya ni saya rɔ. 4 N lanin ai la kosɛbɛ! N ye n wasola aile le rɔ. Ai la ko ye n nalemɛniyala haan ka n dafa. Hali an ye tɔrɔya bɛɛ rɔ, n na sɛwa dan tɛ ye!

5 Baa, an sera Masedoniya waati mɛn na, an ma ɲɔɲɔli si sɔrɔn. An tɔrɔnin tɛrɛ ɲa bɛɛ ma. Komasɔsɔlailu tɛrɛ an naminin dɔ, silan tɛrɛ an na. 6 Kɔni Alla mɛn ye mɔɔ tunnagboilu lalemɛniyala, wo ka an nalemɛniya Tite la na rɔ. 7 A na ko gbansan tɛrɛ tɛ a ri, fɔɔ a ka lalemɛniya mɛn sɔrɔn ai la. A ka a fɔ an yɛ, n lɔɔ ye ai mirala ɲa mɛn ma, ka sunun, n na ko haminya ba tora ai la. Wo le rɔ, n na sɛwa warara.

8 Hali n da ai niilafin n na kuma fɛ bataki kɔndɔ,* nde ma nimisa a sɛbɛ la. Hali n nimisara le, n ka a lɔnnin ko wo sɛbɛ tɛrɛ ra ai niilafin waatinin. 9 Kɔni sisɛn, n sɛwanin, baa ai nimisanin, wo tɛ, kɔni ka a masɔrɔn wo nimisa ra ai la ko kɛ ɲailu yɛlɛman. Alla le ka wo nimisa latɛɛ. Wo le rɔ, ai ma tɔrɔ si sɔrɔn an bolo. 10 Niilafin mɛn faranin Alla la, wo ye a kɛla le mɔɔilu ye ii kɔnkɔ don ii hakɛ la, ka kisi. Wo le rɔ, nimisa si tɛ wo rɔ. Kɔni nimisa mɛn faranin dunuɲa koilu la, wo ye labanna saya le ma. 11 Nimisa ɲin mɛn faranin Alla la, ai ye wo ragbɛ: a ra ai kɛ sɛɛbɛnna mɔɔilu ri. Ai kunfannin ai la sɔnbaliya yiraka ko la. Ai mɔnɛnin kojuu ma, ai jusu ra bɔ, n yen ko kunfan ba ye ai la, koɲuma lɔɔ ra ai mira fewu! Ai ye kojuu kɛlailu hakɛilu sara ii la. Ai ra a yiraka ko bɛɛ rɔ ko fɛɛ si tɛ ai la fewu.

12 Wo rɔ, hali n ka wo bataki sɛbɛ, n ma a sɛbɛ tiɲanninna la ko rɔ wala a ka mɔɔ mɛn tɔrɔ. Kɔni kosa ai ri sɛɛbɛ don an yɛ ɲa mɛn ma, wo ka kan ka bɔ kɛnɛma ai jɛrɛ yɛ Alla ɲakɔrɔ.

13 Wo le bɛɛ ka an nalemɛniya, a ni fanan, ka bɔ an nalemɛniya ko la, ai ka Tite lasɛwa ɲa mɛn ma, an sɛwanin wo fanan na haan! Baa ai bɛɛ ra a nii ladiya a ma. 14 N tun da ai matɔɔ Tite yɛ. Ai ma n namaloya. Baa an da tuɲa fɔ ai yɛ waati bɛɛ, an ye ai matɔɔ mɛn kɛla Tite yɛ, wo fanan da kɛ tuɲa ri. 15 A la ladiyaɲɛ ye tola warala aile le la ko rɔ, a wa labila a la ai bɛɛ kolonin ɲa mɛn ma, a ni ai ka a lasɛnɛ ɲa mɛn ma silan ba rɔ haan ka yɛrɛyɛrɛ. 16 N sɛwanin baa n lanin ai la ko bɛɛ rɔ.