1 N badenmailu, ai jɛrɛ ka a lɔn ko an wa ai wara, wo ma kɛ fuu. 2 Hali an tɛrɛ ra tɔrɔya ni ɲakankatan sɔrɔn Filipi so kɔndɔ, ikomin ai ka a lɔn ɲa mɛn ma, an ka an wakali Alla ma, ka a la ko Kibaro Ɲuma lase ai ma hali mɔɔ siyaman ka a kankan wo ko ma. 3 Ka a masɔrɔn an na kililiilu ma bɔ fili rɔ wala kɔsɔ ko wala janfanteya, 4 Alla ra an kɛɲa fɛsɛfɛsɛ ɲa gbɛrɛ ma, ka a la kuma Kibaro Ɲuma karifa an na. An ye kumala wo ɲa le ma. An tɛ a fɛ ka mɔɔilu hɛnɛ, kɔni Alla mɛn ye mɔɔilu jusu fɛsɛfɛsɛla. 5 Baa ai ka a lɔn fewu, ko an ma ai labaara wuya matɔɔ kan fɛ wala ka nata ai la fenilu fɛ dokon dɔ. Alla le an sere ri. 6 An tɛ gbiliya ɲininna mɔɔ si la, ai le wala do gbɛrɛilu, 7 baa Ɲenematɔmɔnin na talibidenbailu le an di, an tun di se an donin lala ai kun ma. Kɔni, an kɛra le mɔɔ sabariniilu ri ai tɛma, ikomin denba tii ye a la den mamirala ɲa mɛn ma. 8 An da ai kanin bakɛ, wo rɔ a diyanin an yɛ ka Alla la Kibaro Ɲuma lase ai ma, wo kelen tɛ, kɔni ka an nii fanan di ai la ko rɔ, ka a masɔrɔn ai tɛrɛ duman an yɛ haan! 9 An badenmailu, ai hankili to an na tele ni an na su baara ɲin ɲabɔ ko. An ka wo baara gbɛlɛn kɛ le kosa donin kana to mɔɔ si kun ma, an wa kɛ Alla la ko Kibaro Ɲuma lasela ai ma waati mɛn na.

10 An sere le ai ri a ni Alla, ko an tɛrɛ sɛninya ni telen ni fɛɛtanɲa le rɔ aile lemɛniya mɔɔilu tɛma. 11 Baa ai ka a lɔn ko an kɛni ai kelen kelenna bɛɛ yɛ le ikomin fa ni a denilu yɛ ɲa mɛn ma. 12 An ka ai fanka don, ka ai masabari, ka ai madiya ko ai tamanɲa ye bɛn Alla ma, ale mɛn ye ai kilila kosa ai ye don a la mansaya ni a la gbiliya rɔ.

13 Wo le ka a kɛ, an ye tola baraka bilala Alla yɛ waati bɛɛ, baa ai ka Alla la kuma lamɛn an na tuma mɛn na, ai ka a lamira le Alla la tuɲa kuma jɛrɛ la, ikomin a bɛnnin ɲa mɛn ma, mɛn ye baarala aile lemɛniya mɔɔilu tɛma. Ai ma a mira ikomin mɔɔilu la kuma. 14 N badenmailu, ai ra Alla la lemɛniya jamailu ladɛn, mɛnilu ye Jude mara rɔ, Isa Ɲenematɔmɔnin na mɔɔilu. Ai wara mɔɔilu ka ai tɔrɔ ɲa mɛn ma, Judiyailu ka woilu fanan tɔrɔ le wo ɲa ma. 15 Iile Judiyailu le ka Maari Isa faa a ni kelalaselailu, ka an fanan tɔrɔya bakɛ. Ii tɛ Alla hɛnɛla! Ii ye adamaden bɛɛ juu le ri. 16 Ii ye a fɛ le ka an dagbɛlɛn Alla la kela lase la siya gbɛrɛilu ma, kosa ii ye kisi. Wo rɔ, ii ye tola ii julumun de makafula haan ka dafa. Kɔni Alla la mɔnɛ ra ban sela ii ma.

17 An badenmailu, wula ra an mataa an ɲɔɔn na waatinin, kɔni an jusu mataanin tɛ ai la. An da karan bɛɛ kɛ kosa an ye na ai tɔrɔfɛ baa ai yen lɔɔ ra an mira haan! 18 An tun ye a fɛ ka na ai tɔrɔfɛ, a gbengben nde Pɔli ra karan siɲa fila. Kɔni Setana ka an da tiɲan. 19 Ka a masɔrɔn yon di kɛ an jii ri a ni an na sɛwa kun di a ni an na kunnafulen tɔɔmasere ri an Maari Isa ɲakɔrɔ a wa na waati mɛn na, ni aile tɛ? 20 Aile le an na gbiliya ni an sɛwa kun di fewu!