1 Nba, n badenmailu, ai mako tɛ a la ko n ye sɛbɛli kɛ ai ma ko ɲinilu kɛ waati ni teleilu la ko rɔ, 2 ka a masɔrɔn ai jɛrɛ ka a lɔn fewu, Maari na lon di kɛ ikomin son ye nala su rɔ ɲa mɛn ma. 3 Mɔɔilu ye jususuma ni lakandannin la ko fɔla waati mɛn na, halaki ye jii ii kan wo waati jɛrɛ le rɔ, ka ii latɛrɛnna ikomin muso den sɔrɔn kɔnɔ wa wuli a la. Ii tɛ nala tankala wo ma muumɛ! 4 Kɔni n badenmailu, ai tɛ dibi rɔ, kosa wo lon ye ai latɛrɛnna ikomin son. 5 Ai bɛɛ kɛnin kɛnɛya ni tele rɔ mɔɔilu le ri. Su ni dibi ta tɛ andeilu ri. 6 Wo rɔ, an kana sunɔɔ ikomin doilu, kɔni an ye to an hankili rɔ, ka an jɛrɛ mira! 7 Sunɔɔlailu ye sunɔɔla su le rɔ, dɔlɔ minnailu fanan ye ii minna su le rɔ. 8 Kɔni ikomin andeilu ye tele rɔ mɔɔilu le ri, an ka kan ka an jɛrɛ mira, ka kaninteya ni lemɛniya kɛ an sisi makandan fen di, ka an kisi ko jii kɛ an kun makandan kɛlɛkɛ fula ri. 9 Baa Alla ma an suwandi a la mɔnɛ kanma, kɔni ko an ye kisi sɔrɔn an Maari Isa baraka rɔ, Ɲenematɔmɔnin. 10 A faanin ande le yɛ, kosa ni an faara, wala ni an tora an nii la, an ye to a tɔrɔfɛ. 11 Wo rɔ, ai ye to ai ɲɔɔn fanka donna, ka to ai ɲɔɔn nalemɛniyala, ikomin ai ye a kɛla ɲa mɛn ma ten.

12 Nba, n badenmailu, an ye ai madiyala ai ye woilu gbiliya mɛnilu ye baarala a gbɛlɛnmanna ai tɛma, mɛnilu lɔni ai ɲɛrɔ Maari la ko rɔ, mɛnilu ye ai lalɔnna koilu la. 13 Ai ye ii jate mɔɔ gbiliyaniilu ri kaninteya rɔ ii la baara la ko rɔ. Bɛn ye to ai tɛma.

14 N badenmailu, an ye ai madiyala ai ye salawatenilu lali, ka tunnagboyaniilu fanka don, ka fankatanilu dɛmɛn, ai ye diɲa mɔɔ bɛɛ yɛ. 15 Ai kana sɔn ko mɔɔ si ye kojuu sara kojuu la, kɔni ai ye karan koɲuma kɛla ai ɲɔɔn yɛ a ni mɔɔ bɛɛ yɛ waati bɛɛ rɔ.

16 Ai ye to sɛwani waati bɛɛ. 17 Ai ye Alla matara waati bɛɛ. 18 Ai ye baraka bila Alla yɛ ko bɛɛ rɔ. Alla sawo le wo ri ai yɛ, mɛnilu ye Ɲenematɔmɔnin Isa rɔ.

19 Ai kana Alla la Nii Sɛniman datiɲan a la baara rɔ. 20 Ai kana nabiya kumailu lagboyaɲɛ. 21 Kɔni ai ye ko bɛɛ fɛsɛfɛsɛ, ka a ɲuma lamara. 22 Ai ye ai mataa kojuu su bɛɛ la.

23 Jususuma Alla jɛrɛ ye ai lasɛninya ai kɛɲa bɛɛ rɔ. Alla ye ai sɔnɔmɛ ni ai nii ni ai faribanku to fɛɛtanɲa rɔ an Maari Isa Ɲenematɔmɔnin na waati rɔ. 24 Alla mɛn ka ai kili, wo sabarinin, a ri wo kɛ.

25 N badenmailu, ai ye Alla matara an fanan yɛ.

26 Ai ye badenmailu bɛɛ tuwa ye badenmaya tuwali sunbuli rɔ.

27 N da ai jamari sɛɛbɛ rɔ Maari tɔɔ rɔ, ai ye bataki ɲin karan badenmailu bɛɛ yɛ.

28 An Maari Isa Ɲenematɔmɔnin na hina ye to ai bɛɛ fɛ.