1 Tɔɔ la, n badenmailu, an ye ai madiyala, ka ai jusu kɔrɔtu Maari Isa baraka rɔ. Ai ra a lɔn an fɛ ai ka kan ka taama ɲa mɛn ma, ka Alla hɛnɛ, ai jɛrɛ ye mɛn kɛla, ko ai ye janfa wo rɔ. 2 Baa ai ka a lɔn an ka jamariliilu mɛn don ai bolo Maari Isa tɔɔ rɔ. 3 Alla sawo le ten, ai ye sɛninya, ai ye mase kaninkɛ la. 4 Ai kelen kelenna bɛɛ ye ai jɛrɛ faribanku mira ɲa lɔn sɛninya ni kunnafulen dɔ. 5 Ai kana kunfan jalonyailu ko fɛ ikomin lemɛniyabaliilu, mɛnilu ma Alla lɔn. 6 Mɔɔ si ti wala a badenma ma janfa rɔ wala ka bɔrɔkɔ don a bolo. An tɛrɛ ra a fɔ ai yɛ, ka a jaserema ai yɛ gben, mɛn wa ɲin doilu kɛ, Maari ri wo ko sara wo tii la. 7 Ka a masɔrɔn, Alla ma an kili ko an ye ko sɛninyabali kɛ, kɔni ko an ye sɛninya. 8 Wo le rɔ, mɛn wa a ban kuma ɲinilu mirala, wo ma a ban mɔɔ yɛ, kɔni a ka a ban Alla le yɛ mɛn ka a la Nii Sɛniman di ai ma.

9 Awa, ka bɛn badenmailu la kaninteya ma, ai mako tɛ wo sɛbɛli la, ka a masɔrɔn Alla jɛrɛ le ka aile karan wo kɛla. 10 Ai ye wo le kɛla badenmailu bɛɛ yɛ Masedoniya jamana yɔrɔ bɛɛ rɔ. Kɔni an ye ai madiyala badenmailu, ko ai ye janfa wo rɔ. 11 Wo ye kɛ kunnafulen di ai yɛ ka to sabari rɔ, ka ai hankili to ai la koilu rɔ, ka baara i bolo la, ikomin an ka ai jamari ɲa mɛn ma, 12 kosa ai taama ɲa ye kɛ gbiliya ri lemɛniyabaliilu tɛma, ai donin ti nala tola mɔɔ si kun ma.

13 N badenmailu, an tɛ a fɛ ai ye to ko lɔnbaliya rɔ mɔɔilu la ko rɔ mɛnilu ra faa, kosa ai kana to sununni ikomin doilu, jii tɛ mɛnilu ma. 14 An lani a la ko Isa ra faa, ka a wuli ka bɔ saya rɔ. Wo rɔ, an lani a la, ko Alla ri mɔɔ faaniilu lana Isa fɛ, mɛnilu lemɛniyara a ma.

15 Awa, an Maari ye kuma ɲin de fɔla ai yɛ: Maari na waati, andeilu mɛnilu ye tɛrɛnna an nii la, andeilu fɔlɔ tɛ yɛlɛla fewu mɔɔ faaniilu ɲɛrɔ. 16 Ka a masɔrɔn, jamarili wa di kan nayɛlɛnin ba rɔ, mɛlɛka kuntii kan wa bɔ, Alla la buru wa fɛ, Maari jɛrɛ ri jii ka bɔ san ma. Wo rɔ, mɔɔ mɛnilu faani ii bilanin Ɲenematɔmɔnin kɔfɛ, woilu le fɔlɔ ye wulila saya rɔ. 17 Wo kɔ rɔ, andeilu mɛnilu wa to an nii la wo waati rɔ, an bɛɛ ri layɛlɛ woilu tɔrɔfɛ duru rɔ san ma jonna, an di wa Maari labɛn san ma. An di to Maari tɔrɔfɛ fanan habadan. 18 Wo rɔ, ai ye ai ɲɔɔn fanka don kuma ɲinilu la.