1 Baa an tɛrɛ ti se makɔnɔni kɛla butun, wo rɔ, an bɛnda a ma ko an ye to ɲalasuma Atɛni so kɔndɔ, 2 an ka an badenma Timote lawa ai ma, mɛn ye an baaraɲɔɔ ri Alla yɛ a la Ɲenematɔmɔnin na ko Kibaro Ɲuma lase diya kosa an ye wa ai fanka don, ka ai lalemɛniya ai la lemɛniya rɔ. 3 Wo rɔ, aile mɔɔ si kana kɔndafili ɲakankatan ɲinilu la ko rɔ, baa aile ka a lɔn ko wo le latɛɛni an ma. 4 Ka a masɔrɔn an tɛrɛ ai tɔrɔfɛ waati mɛn na, an tɛrɛ a fɔla ai yɛ ko an di ɲakankatan. Ai ka wo lɔn, wo le kɛnin. 5 Wo le rɔ, baa n tɛrɛ ti se makɔnɔnin kɛla butun, n ka Timɔte lawa ai ma kosa a ye wa kibaro sɔrɔn ka bɛn ai la lemɛniya ma, baa n silannin tɛrɛ ko Majuuwalila wa se ai lafilila ko do rɔ, ka an na baara to ai ma fuu rɔ.

6 Kɔni Timote bansan de nala an tɔrɔfɛ, ka bɔ ai tɔrɔfɛ. A ra ai la lemɛniya ni ai la kaninteya la ko kibaro ɲuma lase an ma. Ko, ai ka ai miri an na ko ma sɛwa rɔ waati bɛɛ, ko an yen lɔɔ ye ai la kosɛbɛ ikomin ai fanan yen lɔɔ ye an na ɲa mɛn ma. 7 Wo le rɔ, an badenmailu, hali an ye tɔrɔya ni ɲakankatan dɔ, ai la lemɛniya ye an sɛɛbɛ donna. 8 Baa ai ra an nii ladiya an ma, ni ai ye to Maari rɔ gben gben! 9 Nba, an ka kan ka baraka bila Alla yɛ di ai la ko rɔ, mɛn di bɛn wo sɛwa jate ma mɛn ye an dɔ ai la ko rɔ Alla ɲakɔrɔ? 10 An ye Alla matarala su ni tele gbiliya rɔ kosa an ye ai yen, ko mɛn dɛsɛni ai la lemɛniya rɔ, an di wo lakanbali.

11 Sisɛn, Alla, an Fa Alla, jɛrɛ ni an Maari Isa ye sila rabɛn an yɛ, ka wa ai tɔrɔfɛ. 12 Maari ye a kɛ ko ai la kaninteya ye wara ka sabati ai ɲɔɔn tɛma, a ni bɛɛ tɛma ikomin an ta ye ɲa mɛn ma aile ma. 13 A ye ai jusu fanka don ɲa wo ma, kosa fɛɛ si kana to ai la sɛninya la an Fa ni an na Alla ɲakɔrɔ, an Maari Isa ni a la mɔɔ sɛniman bɛɛ na waati rɔ.