1 Pɔli ni Silasi ni Timote le ka ɲin sɛbɛ ka a lawa an Fa Alla ni Ɲenematɔmɔnin Maari Isa la lemɛniya jama ma Tesaloniki so kɔndɔ. 2 An fa Alla ni Maari Isa Ɲenematɔmɔnin ye hina ni jususuma di ai ma.

3 N badenmailu, A bɛnnin de an ye baraka bila Alla yɛ ai la ko rɔ waati bɛɛ. Wo le dahani ka a masɔrɔn ai bɛɛ la lemɛniya ye warala kosɛbɛ, a ni ai la kaninteya fanan ai ɲɔɔn yɛ. 4 Wo le rɔ, an jɛrɛ ye ai matɔɔla Alla la lemɛniya jamailu tɛma ai la tunadiya ni ai la lemɛniya la ko rɔ hali ai tɔrɔni bɛnsɛnkɔlɔnteya rɔ.

5 Wo koilu ye a yirakala le ko Alla la kiti la ɲa telenni mɛn ye a kɛla ai ye jate mɔɔilu ri mɛnilu ye donna Alla la mansaya rɔ, ai ye ɲakankatan dɔ mɛn na ko rɔ. 6 Baa telenni Alla yɛ ka tɔrɔya lase woilu ma mɛnilu ye ai tɔrɔla, 7 aile mɛnilu ɲakankatannin, ka ɲɔɲɔli di ai ma a ni an fanan. Wo ye kɛla le Maari Isa wa a yiraka waati mɛn na, ka bɔ sankolo rɔ a ni a la mɛlɛka fankamailu 8 ta mɛlɛn ba rɔ, ka Alla lɔnbaliilu ɲakankatan mɛnilu tɛ Maari Isa la ko Kibaro Ɲuma kuma mirala. 9 Woilu ri ɲakankatan habadan halaki le la, ii ri mase Maari ɲakɔrɔ a ni a la fanka masilanni. 10 Wo ye kɛla le a wa na lon mɛn na ii tɛma, a la jama sɛniman bɛɛ ri a gbiliya, ii ri kaba a ma mɛnilu bɛɛ lemɛniyani. Ai fanan di tɛrɛn woilu tɛma ka a masɔrɔn an ka sereya mɛn bɔ ai yɛ, ai lara le wo la.

11 Wo rɔ, an ye Alla matarala ai yɛ waati bɛɛ, kosa, a ra ai kili ko mɛn ma, ai ye dafa, ka bɛn wo ma. An ye a matarala fanan kosa, ai ra koɲuma mɛn bɛɛ ɲɛnikɛ, a ni ai wa baara mɛn kɛ ai la lemɛniya rɔ, Alla ye wo bɛɛ lakanbali a fanka fɛ. 12 An ye wo matarali kɛla kosa an Maari Isa tɔɔ ye gbiliya ai rɔ, ai fanan ye gbiliya sɔrɔn ale rɔ, an na Alla ni Maari Isa Ɲenematɔmɔnin na hina baraka rɔ.