1 Tɔ la, an badenmailu, ai ye Alla matara an yɛ kosa Maari la kuma ye jɛnsɛn, ka gbiliya ikomin a ye ai wara ɲa mɛn ma, 2 kosa an ye kunka mɔɔ kɔrɔnilu ni mɔɔ juuilu ma, baa ii bɛɛ lemɛniyanin tɛ.

3 Kɔni Maari telenni, a ri ai fanka don, ka ai latanka Ko Juu Tii ma. 4 An lani ai la Maari la ko rɔ, ko an ka ai jamari mɛn na, ai ye wo kɛla ten, ai ri to a kɛla fanan. 5 Maari ye ai jusu lɔ Alla la kaninteya ni a la Mɔɔ Ɲenematɔmɔnin na tunadiya la.

6 N badenmailu, an ye ai jamarila an Maari Isa Ɲenematɔmɔnin tɔɔ rɔ, ai ye ai mataa ai badenmailu bɛɛ la mɛnilu ra ii jɛrɛ to salaya rɔ, ii tɛ taamanna karan namunilu kan ai ka mɛnilu sɔrɔn an na. 7 Ai jɛrɛ ka a lɔn a bɛnnin ai ye an naden ɲa mɛn ma, ka a masɔrɔn an tɛrɛ tɛ salaya rɔ ai wara. 8 An ma mɔɔ si la dɔɔnnifen dɔɔn an ma a sɔnkɔ di, kɔni an sɔnda le tɔrɔya ni kori ma, ka baara su ni tele rɔ, kosa an donin kana to mɔɔ si kun ma. 9 Wo tɛ wo ri ko an ti se wo sɔrɔnna ai bolo, kɔni kosa ai ye misali ta an ma. 10 Baa, an tɛrɛ ai tɔrɔfɛ waati mɛn na, an ka ai jamari le ko mɔɔ si ti sɔn baarala, wo kana dɔɔnnin kɛ.

11 Adon, an da a mɛn ko mɔɔ doilu ye ai tɛma, salatenilu le woilu ri, ii tɛ baarala fɔɔ ka to ko rabasan na. 12 An da wo mɔɔilu jamari, ka ii lalemɛniya Maari Isa Ɲenematɔmɔnin tɔɔ rɔ, ko ii ye baara jususuma rɔ kosa ii ye ii balo sɔrɔn ii la baara rɔ.

13 Kɔni aile, badenmailu, ai kana kaɲa koɲuma kɛla. 14 Ni mɔɔ do ma sɔn kuma ɲinilu mirala an ka mɛnilu sɛbɛ bataki rɔ, ai ye wo tii lakɔrɔsi, foyi kana to ai le ni wo tii tɛma, kosa a ye maloya. 15 Kɔni ai kana a jate ai juu ri, kɔni ai ye a lalɔn ikomin ai badenma.

16 Maari Alla, jususuma tii ye jususuma di ai ma waati bɛɛ ni ɲa bɛɛ ma. Maari ye to ai bɛɛ fɛ. 17 Nde Pɔli jɛrɛ le ka tuwali kan ɲinilu sɛbɛ. N na tɔɔmasere le ɲin di n na batakiilu bɛɛ kɔndɔ, n bolo nɔ le ɲin di.

18 An Maari Isa Ɲenematɔmɔnin na hina ye to ai bɛɛ fɛ.