1 Nde Pɔli mɛn kɛnin kasoden di Isa Ɲenematɔmɔnin na ko rɔ, an ni badenma Timote le ka ɲin sɛbɛ an kaninte ni an baaraɲɔɔ Filemɔn ma, 2 a ni Apiya an mamuso a ni Arikipe an kɛlɛkɛɲɔɔ a ni lemɛniya jama mɛnilu ye ii ladɛnna i wara.

3 An Fa Alla ni Maari Isa Ɲenematɔmɔnin ye hina ni jususuma di ai ma.

4 Filemɔn, n wa kɛ n na Alla matarala i la ko rɔ waati si, n di baraka bila a yɛ i la ko rɔ, 5 ka a masɔrɔn n da a lamɛn ko i lemɛniyani Maari Isa ma ɲa mɛn ma, i ra a la jama sɛniman bɛɛ kanin fanan. 6 N ye Alla matarala kosa badenmaya mɛn farani i la lemɛniya la, wo ye a kɛ i ye koɲuma bɛɛ lɔn kosɛbɛ, an ka mɛnilu sɔrɔn Ɲenematɔmɔnin baraka rɔ. 7 Badenma, i la kaninteya ra sɛwa ba di n ma, ka n nalemɛniya, baa i ra jama sɛniman bɛɛ nii ladiya ii ma.

8 Wo le rɔ, hali n di se susula i jamarila Ɲenematɔmɔnin dɔ ko i ye ko kɛ mɛn dahani, 9 kɔni n ye i madiyala kaninteya le rɔ, nde Pɔli cɛmɔɔba, a ni sisɛn kasoden Isa Ɲenematɔmɔnin na ko rɔ. 10 Wo rɔ, n ye i madiyala n den Onesimɔ la ko rɔ, mɛn kɛnin n den di kaso la. 11 A tɔnɔ tɛrɛ tɛ i ma waati taminni rɔ, kɔni sisɛn, a tɔnɔ ri kɛ an bɛɛ ma.

12 N ye a lasɛla i ma sisɛn, ale mɛn duman n yɛ ikomin n jɛrɛ nii. 13 A tɛrɛ duman n yɛ, ka a to n tɔrɔfɛ yan, kosa a ye baara n yɛ i nɔ rɔ, n ye kaso la waati mɛn na Isa la ko Kibaro Ɲuma la ko rɔ. 14 Kɔni n tɛ a fɛ ka foyi kɛ, ka fara i sawo la, kosa i la baara ɲuma kana kɛ diyagboya ri, kɔni a ye kɛ i ɲɛnikɛ la.

15 Tumado, Onesimɔ mataanin i la le waatinin, kosa i ye a sɔrɔn ikɔ tuun habadan, 16 adon jɔn gbansan tɛ a ri butun, kɔni a ra tamin jɔn na, a ra kɛ i diyanan badenma ri. A duman nde yɛ, kɔni a ye diya ile yɛ ka tamin nde la adamadenya rɔ a ni Maari rɔ.

17 Wo rɔ, ni i ka n jate i baaradenɲɔɔ ri, i ye Onesimɔ fanan ramira ikomin i ka n damira ɲa mɛn ma. 18 Ni a ka telenbaliya kɛ i la, wala ni a ka kan ka fen do lasɛ i ma, wo donin la nde kun ma. 19 Nde jɛrɛ le ka ɲin sɛbɛ n bolo la, nde Pɔli. N di i bolo ɲɔɔ lasɛ, kɔni n tɛ a fɛ ka a fɔ i yɛ ko ile ka kan ka i nii don n bolo. 20 N badenma, jaandi wo koɲuma kɛ n yɛ Maari la ko rɔ, n nii ladiya n ma Ɲenematɔmɔnin baraka rɔ.

21 Baa n lani i la ko i ri n kan mira, n ye ɲin sɛbɛla i ma. N ka a lɔn i ri do kɛ ka tamin n na kuma la. 22 I ye jiya bon do fanan dabɛn n ɲɛrɔ ka a masɔrɔn n lani a la, n di n kɔsɛ ai ma ai la Alla matara baraka rɔ.

23 Epafirasi mɛn ye n tɔrɔfɛ kaso la Isa Ɲenematɔmɔnin na ko rɔ, wo ye i tuwala. 24 N baaradenɲɔɔ doilu Marika ni Arisitariki ni Demasi ni Luka, woilu bɛɛ ye i tuwala.

25 Alla ye a kɛ Maari Isa Ɲenematɔmɔnin na hina ye to ai nii rɔ.