1 Nfen ka Judiyailu lafisaya mɔɔ doilu ko wo rɔ? Faaninta tɔnɔ ye nfen di? 2 Tɔnɔ siyaman ye a la ɲa bɛɛ ma. A fɔlɔ ye mɛn di, Alla ra a la kumailu karifa Judiyailu la. 3 Awa, wo ye di, ni lemɛniya tɛ mɔɔ doilu rɔ, wo ri Alla la landaɲa tiɲan wa? 4 Ɛɛn de! Tuɲa tii le Alla ri hali mɔɔilu bɛɛ wa kɛ wuya fɔlailu ri. A sɛbɛnin Kitabu rɔ ko, «kosa i wa kuma, ile le telennin. I wa makiti, i ri jo sɔrɔn.»*

5 Kɔni ni an na telenbaliya ka Alla la telen nabɔ kɛnɛma, an di nfen fɔ ka bɛn ko wo ma? Alla tɛ telenbaliya le kɛla wo rɔ wa, a wa a la mɔnɛ lajii an ma? N ye kumala ikomin mɔɔilu. 6 Ɛɛn de! Ni a tɛrɛ wo ɲa le ma, Alla ri se dunuɲa makitila di?

7 Kɔni wo ye di? Ni Alla la tuɲa ye lɛnkɛnɛmayala n na wuya le fɛ, a la gbiliya ye makafu, nfenna nde ri jalaki wo rɔ ikomin julumuntii? 8 Wo rɔ, nfenna an tɛ a fɔla ko, «An ye kojuu kɛ kosa koɲuma ye bɔ a rɔ wa?» Wuya fɔla doilu ye wo kuma lala an kun ma. Wo tiilu jalaki ta le.

9 A ye di wo rɔ? Andeilu ka fisa doilu ko wa? Ɛɛn de! An tɛrɛ ra a yiraka ko Judiyailu ni siya gbɛrɛilu bɛɛ ye julumun fanka kɔrɔ, 10 ikomin a sɛbɛnin Kitabu rɔ ɲa mɛn ma ko,

«Mɔɔ telennin si ti ye

hali kelen pe!

11 Mɔɔ si ti ye

mɛn ka ko lɔn.

Mɔɔ si ti ye

mɛn ye Alla ɲininna.

12 Mɔɔ bɛɛ ra sila fara.

Ii bɛɛ ra to fufafu.

Mɔɔ si tɛ a ɲuma kɛla

hali mɔɔ kelen pe!

13 Ii kan woilu lakanin

ikomin kaburu,

janfa kumailu le ii nɛn kan.

Ii kumakanilu diminnin

ikomin fɔngbɛ baa.

14 Ii da lafanin dankailu ni kuma kunanniilu le la.

15 Ii kaliyanin jeli labɔ diya.

16 Gbalo ni tiɲannin de ii la silailu kan.

17 Ii ma jususuma sila lɔn!

18 Ii tɛ silanna Alla ɲɛrɔ muumɛ!»*

19 Awa, an ka a lɔn ko sariya ka mɛn bɛɛ fɔ, a ka a fɔ mɔɔilu yɛ mɛnilu ye sariya kɔrɔ, kosa bɛɛ da ye mira, ka dunuɲa mɔɔilu bɛɛ lɔn tiɲanninna ri Alla ɲakɔrɔ. 20 Wo le rɔ, adamaden si tɛ jate mɔɔ telennin di Alla ɲakɔrɔ sariya mira fɛ, baa sariya ye julumun de dɔrɔn yirakala an na.

21 Kɔni sisɛn, ka bɔ sariya wo ma, Alla la telen da bɔ kɛnɛma, Sariya Kitabu ni kelalaselailu la kitabuilu tɛrɛ ra mɛn sereya bɔ. 22 Mɛnilu bɛɛ wa lemɛniya, Alla ri woilu latelen a ɲakɔrɔ lemɛniya fɛ Isa Ɲenematɔmɔnin dɔ. Ka a masɔrɔn dannafarabɔ tɛ ye, 23 baa mɔɔ bɛɛ ra hakɛ kɛ. Wo le rɔ, ii ma Alla la gbiliya sɔrɔn. 24 Kɔni Alla ye mɔɔilu jatela telenba ri, lafɛrɛ rɔ a la hina le fɛ, ka ii kunka Isa Ɲenematɔmɔnin baraka rɔ. 25 Alla ka ale le kɛ sɔlɔnalila saraka ri, mɔɔ mɛnilu wa lemɛniya a jeli ma. Wo ra a la telen yiraka, baa julumun mɛnilu kɛra sani sinɛn, a tɛrɛ tɛ mɔɔilu julumunilu sarala ii la a la diɲɛ waati rɔ, 26 kɔni a wa kɛ a la telen yiraka ko rɔ waati ɲin dɔ, kosa a ye telen fewu, ka mɔɔilu latelen a ɲakɔrɔ mɛnilu ra lemɛniya Isa ma.

27 Wo rɔ, mɔɔilu ka kan ka ii jɛrɛ matɔɔ nfenna? Foyi! Nfenna? Ii ra sariya mira, ii ye ii jɛrɛ matɔɔla wo le rɔ wa? Ɛɛn, wo tɛ, fɔɔ ii la lemɛniya. 28 Ka a masɔrɔn an lanin a la ko mɔɔ ye telenna Alla ɲakɔrɔ lemɛniya le fɛ, hali ka bɔ sariya mira ma. 29 Judiyailu le dɔrɔn ta ye Alla ri wa? Siya gbɛrɛilu fanan na Alla le tɛ ale ri wa? Siya gbɛrɛilu fanan na Alla le a ri fewu! 30 Alla kelen de a ri mɛn di Judiya kojiikɛninilu latelen a ɲakɔrɔ lemɛniya fɛ a ni siya gbɛrɛilu fanan wo lemɛniya kelen fɛ. 31 Wo kɔrɔ le ko an ye sariya bila lemɛniya fɛ wa? Ɛɛn de! Kɔni, an ye sariya jatela.