1 Wo le rɔ, mɔɔ mɛnilu ye Ɲenematɔmɔnin Isa fɛ, Alla tɛ woilu jalakila sinɛn, 2 ka a masɔrɔn, Nii Sɛniman na nii lakisi sariya ra i hɔrɔya julumun ni saya sariya ma Ɲenematɔmɔnin Isa baraka rɔ. 3 Baa sariya tɛrɛ ti se wo kɛla, ka a masɔrɔn faribanku ra a fanka ban. Alla le ka wo kɛ, a ka a jɛrɛ Dencɛ lana adamaden julumuntiilu sawura rɔ julumun sarakaya la, ka julumun jalaki faribanku rɔ. 4 Alla ka wo kɛ le kosa telen mɛn ka kan ka kɛ sariya la ko rɔ, wo ye dafa an dɔ, ande mɛnilu tɛ taamana an faribanku diyanan koilu rɔ, kɔni fɔɔ Nii Sɛniman diyanan koilu. 5 Awa, mɛnilu ye taamanna ii faribanku diyanan koilu rɔ, woilu ye tola ii mirila wo ko suilu le ma, kɔni mɛnilu ye Nii Sɛniman diyanan koilu kɛla, woilu ye tola ii mirila Nii Sɛniman na koilu le ma. 6 Faribanku nata miriyailu wa to i la, saya le wo ri, kɔni ni i miriyailu bɔnin Nii Sɛniman de rɔ, siimaya le wo ri a ni jususuma. 7 Ka a masɔrɔn faribanku nata miriyailu kɛnin Alla juu le ri, baa ii ti ii kolola Alla la sariya kɔrɔ, ii ti se wo kɛla fanan! 8 Mɛnilu ye taamanna ii faribanku diyanan koilu rɔ, woilu ti Alla hɛnɛ muumɛ!

9 Kɔni aile tɛ taamanna ai faribanku diyanan koilu rɔ fɔɔ Nii Sɛniman diyanan koilu, ni tuɲa le ko Alla la Nii Sɛniman ye ai rɔ. Nba, ni Ɲenematɔmɔnin Nii tɛ mɔɔ mɛn dɔ, Ɲenematɔmɔnin ta tɛ wo tii ri. 10 Kɔni ni Ɲenematɔmɔnin ye ai rɔ, ai faribanku faara julumun na ko kosɔn, kɔni ai nii ye ye, ka a masɔrɔn ai ra jate mɔɔ telennin di. 11 Adon, Nii mɛn ka Isa lawuli ka bɔ saya rɔ, ni wo le tonin ai rɔ, ale mɛn ka Ɲenematɔmɔnin nawuli ka bɔ saya rɔ, wo ri nii di ai faribankuilu ma a la Nii baraka rɔ mɛn ye tola ai rɔ.

12 Wo le rɔ, n badenmailu, donin ye an kun ma, kɔni faribanku le donin tɛ an kun ma ka a diyanan koilu kɛ. 13 Baa ni ai tora taamanna ai faribanku diyanan koilu rɔ, ai ri faa; kɔni ni ai ka ai faribanku kɛwalijuuilu faa Nii fɛ, ai ri to nii la. 14 Baa Alla Nii wa mɔɔ mɛnilu bolo mira, Alla la dencɛilu le woilu ri. 15 Baa ai ka Nii mɛn sɔrɔn, wo tɛ ai kɛ silan jɔn di ikɔ tuun, kɔni a ra ai kɛ Alla la dencɛilu mɔɔdennabɔla ri. Nii mɛn ye an lɔla Alla kilila ko, «Baba, n Fa!» 16 Nii jɛrɛ ye sereya bɔla an nii fɛ, Alla la dencɛilu le andeilu ri. 17 Ni an kɛnin Alla la denilu ri, an ye nala le cɛ sɔrɔnna ikomin a denilu baa Alla ka baraji mɛn namara Ɲenematɔmɔnin yɛ, an fanan di wo sɔrɔn. Ni an ni Isa le tɔrɔnin an ɲɔɔn fɛ, an bɛɛ le a la gbiliya sɔrɔnna wo rɔ.

18 N da a lɔn ko an ye tɔrɔya mɛn sɔrɔnna sisɛn, a ni gbiliya mɛn ye nala, woilu tɛma ka jan kosɛbɛ! 19 Baa dalifen bɛɛ gbɛrɛnnin Alla makɔnɔla, a natanin wo waati rɔ haan Alla dencɛilu nɔɔrɔ ye bɔla kɛnɛma waati mɛn na. 20 Baa dalifen tora le kɔrɔntɔnin a kɔrɔ.* A sawo tɛrɛ tɛ wo ri, kɔni Alla sawo le kɛnin wo ɲa ma kosa jii ye sɔrɔn, 21 ko dalifen di hɔrɔya tiɲannin ko jɔnya ma, a nanin Alla la denilu kanhɔrɔya bɛrɛ diya le. 22 Ka a masɔrɔn an di a lɔn, kɛbi a damira haan waati ɲin dɔ, a kɛnin ikomin dalifen bɛɛ kurunna tɔrɔya rɔ ikomin muso mɛn ye tin ma. 23 Wo ko kelen tɛ, kɔni andeilu mɛnilu fanan ka Nii Sɛniman kunfɔlɔ sɔrɔn, an fanan ye kurunna, an ye Alla makɔnɔla waati mɛn na ka an kɛ a denilu mɔɔdennabɔla ri, ka an faribanku kunka. 24 Baa an tɛrɛ ra kisi jii fɛ. Adon, an jii lanin ko mɛn dɔ, ni an di wo yen, wo tɛ kilila ko jii. Yon jii lanin a rɔ, a ra ban mɛn sɔrɔnna? 25 Kɔni an tɛrɛ ma mɛn sɔrɔn, ni an ka an jii la wo rɔ, an ye a makɔnɔla le dɔrɔn.

26 Nii Sɛniman ye andeilu fankatanilu dɛmɛnna wo ɲa kelen de ma, baa an ma a lɔn an ka kan ka Alla matara mɛn ma. Kɔni Nii Sɛniman jɛrɛ ye Alla madiyala an yɛ kurun mɛn ti se fɔla. 27 Alla mɛn ye mɔɔilu jusu rɔ koilu ɲininna, wo ka Nii Sɛniman miriya lɔn, ka a masɔrɔn Nii Sɛniman ye Alla madiyala a la jama sɛniman yɛ ikomin Alla sawo ye ɲa mɛn ma.

28 An ka a lɔn ko Alla ye koilu bɛɛ labanna a ɲuma le ma a kanin mɔɔilu yɛ, a ka mɛnilu kili a la ko latɛɛnin ma. 29 Baa Alla ka mɛnilu suwandi a damira la, a ra a latɛɛ fanan ko a ri woilu kɛ a Dencɛ munuɲailu ri, kosa Isa ye kɛ ikomin den fɔlɔ yɛ a dɔɔni siyaman tɛma. 30 Alla tɛrɛ ra wo latɛɛ mɛnilu ma, a ra woilu kili. A ka mɛnilu kili, a ra woilu latelen a ɲakɔrɔ. A ka mɛnilu latelen a ɲakɔrɔ, a ra woilu gbiliya.

31 Wo rɔ, an ye nfen fɔ wo ko rɔ? Ni Alla ye an fɛ, yon ye wulila an kanma wo rɔ? 32 Ale mɛn ma a jɛrɛ dencɛ latanka, kɔni ka a di an bɛɛ ma, nfenna wo rɔ a tɛ fen bɛɛ donna an bolo ikomin dabundɛ a Dencɛ fɛ? 33 Alla ra mɔɔ mɛnilu suwandi, yon di woilu jalaki? Alla le mɔɔ latelenna. 34 Yon di se an jalakila? Mɔɔ si ti se, baa Ɲenematɔmɔnin Isa ra faa, ka bɔ wo la, a ra lawuli ka bɔ saya rɔ, ka a lɔ Alla bolokinin ma, ka Alla madiya an yɛ. 35 Nfen ye an bɔla Ɲenematɔmɔnin na kaninteya rɔ? Tɔrɔya ni kɔndafili wa, wala bɛsɛnkɔlɔnteya wala kɔnkɔ wala feriyabɔ ko wala gbalo wala saya fanmuru la? 36 Ikomin a sɛbɛnin Kitabu rɔ ko, «Ii ye an faala ile le la ko kosɔn telen gben! Ii ye an kɛla ikomin saailu mɛn ye kannatɛɛ la!»* 37 Kɔni mɛn wa an kanin, an di nɔ sɔrɔn wo fɛ ko ɲinilu bɛɛ rɔ fewu. 38 Baa n da a lɔn fewu, saya wala dunuɲaratɛɛ wala mɛlɛkailu wala jenailu wala waati ɲinilu wala waati rɔ ko natɔilu wala fankamailu 39 wala sankolo rɔ fenilu wala duu kɔrɔ fenilu, wala dalifen si, foyi tɛ wo rɔ, mɛn ye an bɔla Alla la kaninteya rɔ an ka mɛn sɔrɔn an Maari Isa Ɲenematɔmɔnin baraka rɔ.