1 Isa Ɲenematɔmɔnin buruju le ɲin di. Isa tɛrɛ Dawuda ni Iburahima bɔnsɔn de ri.

2 Iburahima ka Isiyaka sɔrɔn. Isiyaka ka Yakuba sɔrɔn. Yakuba ka Juda sɔrɔn, a ni wo kɔrɔcɛilu ni a dɔɔcɛilu. 3 Juda ka Pɛrɛsi ni Serahi sɔrɔn. Woilu na tɔɔ le tɛrɛ ko Tamari. Perɛsi ka Hɛsirɔn sɔrɔn. Hɛsirɔn ka Ramu sɔrɔn. 4 Ramu ka Aminadabu sɔrɔn. Aminadabu ka Nasɔn sɔrɔn. Nasɔn ka Salimɔn sɔrɔn. 5 Salimɔn ka Bɔwasi sɔrɔn. Wo na tɔɔ ko Rahabu. Bɔwasi ka Obedi sɔrɔn. Wo na le tɛrɛ Ruti ri. Obedi ka Jɛsɛ sɔrɔn. 6 Jɛsɛ ka mansa Dawuda sɔrɔn. Dawuda ka Sulemani sɔrɔn. Wo na tɛrɛ Uriya muso le ri. 7 Sulemani ka Rehobowan sɔrɔn. Rehobowan ka Abija sɔrɔn. Abija ka Asafu sɔrɔn. 8 Asafu ka Jusafati sɔrɔn. Jusafati ka Jehoramu sɔrɔn. Jehoramu ka Usiya sɔrɔn. 9 Usiya ka Jotamu sɔrɔn. Jotamu ka Ahasi sɔrɔn. Ahasi ka Hɛsɛkiya sɔrɔn. 10 Hɛsɛkiya ka Manase sɔrɔn. Manase ka Amɔn sɔrɔn. Amɔn ka Josiya sɔrɔn. 11 Josiya ka Jekoniya ni dencɛ gbɛrɛilu sɔrɔn. Awa, Jekoniya tele rɔ, Babilɔnikailu ka Isirayɛlikailu mira ka wa ii ri kɛlɛkɔrɔbori rɔ Babilɔni jamana rɔ.

12 Isirayɛlikailu senin kɔ kɛlɛkɔrɔbori diya Babilɔni jamana rɔ, Jekoniya ka Selatili sɔrɔn. Selatili ka Serobabɛli sɔrɔn. 13 Serobabɛli ka Abihudi sɔrɔn. Abihudi ka Eliyakimu sɔrɔn. Eliyakimu ka Asori sɔrɔn. 14 Asori ka Sadɔki sɔrɔn. Sadɔki ka Akimu sɔrɔn. Akimu ka Eliyudi sɔrɔn. 15 Eliyudi ka Elasari sɔrɔn. Elasari ka Matan sɔrɔn. Matan ka Yakuba sɔrɔn. 16 Yakuba ka Yusufu sɔrɔn. Yusufu ka Mariyamu furu. Mariyamu wo le ka Isa sɔrɔn, mɔɔilu ye a fɔla mɛn ma ko Ɲenematɔmɔnin.

17 Nba, ka bɔ Iburahima ma ka na sii Dawuda la, wo bɛɛ ladɛnnin kɛra farɔkɛ tan ni naanin de ri. Ka bɔ Dawuda ma ka na Isirayɛlikailu lawa waati rɔ kɛlɛkɔrɔbori rɔ Babilɔni jamana rɔ, wo bɛɛ ladɛnnin kɛra farɔkɛ tan ni naanin de ri. Ka bɔ ii wa waati ma kɛlɛkɔrɔbori diya Babilɔni jamana rɔ ka na a sii Ɲenematɔmɔnin na, wo bɛɛ ladɛnnin kɛra farɔkɛ tan ni naanin de fanan di.

18 Nba, Isa Ɲenematɔmɔnin sɔrɔnda ɲa mɛn ma, wo le ɲin di. A na Mariyamu mamiranin tɛrɛ Yusufu bolo. Kɔni sani a ye wa a sii Yusufu wara ka kɛ a muso ri, Nii Sɛniman ka a kɛ Mariyamu ka kɔnɔ ta. 19 Yusufu ka wo yen mɛn kɛ, a tun tɛ a fɛ ka Mariyamu tɔɔ tiɲan mɔɔilu ɲana, baa Yusufu tɛrɛ mɔɔ telennin de ri. Wo rɔ, a ka a latɛɛ ko a ri Mariyamu bila sutura bolo ma. 20 Ka Yusufu to a mirila wo ma, Maari la mɛlɛka ka a jɛrɛ yiraka a la sibo rɔ, ka a fɔ a yɛ ko: «Yusufu, Dawuda bɔnsɔn, i kana silan Mariyamu furu ko rɔ, baa Nii Sɛniman de ka a kɛ a ra kɔnɔ ta. 21 A ri dencɛ sɔrɔn. I ye a tɔɔ la ko Isa*, baa ale le kɛtɔ a la mɔɔilu kisila ii la kojuuilu ma.» 22 Awa, ko woilu bɛɛ kɛnin sa Maari la kuma ri kanbali, a ka mɛn don a la keladen fisamante da rɔ ko: 23 «I ɲa lɔ! Sunkurun mɛn da a jɛrɛ lakandan, wo ri kɔnɔ ta ka dencɛ sɔrɔn. Dencɛ wo tɔɔ ri la ko Ɛmanuwɛli,» mɛn kɔrɔ le ko «Alla ye an tɛma.»

24 Yusufu wulira sunɔɔ rɔ mɛn kɛ, a ka a kɛ ikomin Maari la mɛlɛka tun ka a fɔ a yɛ ɲa mɛn ma. A wara Mariyamu ta ka na a ri a wara, ka a kɛ a muso ri. 25 Kɔni ii ma dɛn fɔɔ Mariyamu moyira dencɛ la. Yusufu ka den tɔɔ la ko Isa.