1 Isa ka jama yen tuma mɛn na, a yɛlɛra koyinkɛ kan ka a sii. A la karandenilu ka ii madon a la. 2 A ka ii karan damira ko:

3 «Mɔɔ mɛnilu ka a lɔn ko ii mako ye Alla la, woilu ye barakaden de ri, baa harijeene mansaya ye ii ta le ri.

4 Mɔɔ mɛnilu jusumakasani, woilu ye barakaden de ri, baa Alla ri ii jususuma.

5 Mɔɔ mɛnilu sabarinin, woilu ye barakaden de ri, baa Alla ri duukolo di ii ma ka a kɛ ii ta ri.

6 Mɔɔ mɛnilu ye a fɛ ka kɛ telenbailu ri, ni wo lɔɔ ye gbala ii la ikomin dɔɔnnin lɔɔ ni minnin lɔɔ ye gbala mɔɔilu la ɲa mɛn ma, woilu ye barakaden de ri, baa ii ye mɛn ɲininna, Alla ri wo di ii ma.

7 Mɔɔ mɛnilu ye hinala ii mɔɔɲɔɔilu la, woilu ye barakaden de ri, baa Alla ri hina ii la fanan.

8 Mɔɔ mɛnilu kɔndɔ gbɛnin, woilu ye barakaden de ri, baa ii ri Alla yen.

9 Mɔɔ mɛnilu ye hɛrɛ donna ii ni ii mɔɔɲɔɔilu tɛma, woilu ye barakaden de ri, baa Alla ri ii jate a denilu ri.

10 Mɔɔ mɛnilu ye tɔrɔla mɔɔilu bolo ka a masɔrɔn ii ye Alla diyanan koilu kɛla, woilu ye barakaden de ri, baa harijeene mansaya ye ii ta le ri.

11 Mɔɔilu wa ai nanin, ka ai tɔrɔ, ka wuya la ai la, ka kuma juu su bɛɛ fɔ ai ma nde la ko kosɔn, ai ye barakaden de ri. 12 Ai ye sɛwa ka ɲaalen, baa ai ri baraji ba sɔrɔn harijeene rɔ, baa keladen fisamante mɛnilu taminda ai ɲɛfɛ, ii ka woilu fanan tɔrɔ ten de.

13 «Nba, aile le kɔɔ ri duukolo kan. Kɔni ni kɔɔ tunya bɔra a la, a ri se tunyala ikɔ tuun wa? A tɛ foyi ɲala butun. A ri lafili kɛnɛ ma, mɔɔilu tamintɔ ri a radɔn.

14 «Aile le ye yelen di dunuɲa rɔ yan. So mɛn siinin tindi kan, wo ti se doonna. 15 Mɔɔ tɛ fitinna lamɛlɛnna ka a sii see kɔrɔ. Ɛn-ɛn, a ri a sii fitinnasiifen kan sa a ri yelen di bonkɔndɔ mɔɔilu bɛɛ ma. 16 Fɔɔ ai la yelen ye bɔ ten mɔɔilu ɲana, sa ii ri ai la koɲuma kɛnɛninilu yen ka ai Fa gbiliya, ai Fa mɛn ye sankolo rɔ.

17 «Ai kana ai miri ko n nara le ka Musa la sariya wala kelalaselailu la kumailu bɔ ye. Ɛn-ɛn, n ma na ka woilu bɔ ye, fɔɔ ka ii kanbali. 18 N di tuɲa fɔ ai yɛ: haan ka wa se sankolo ni duukolo ban lon ma, foyi ti nala bɔla sariya la hali sariyatonbe kelen wala a sɛbɛli den kelen fɔɔ sariya bɛɛ wa lakanbali. 19 Wo rɔ, mɔɔ mɛn wa jamarili ɲinilu do tiɲan, hali jamarili mɛn ma bon a tɔilu bɛɛ ko, ka mɔɔilu fanan karan jamarili wo tiɲanna, wo tii ri jate bɛɛ rɔ dɔɔmannin di harijeene mansaya rɔ. Kɔni mɔɔ mɛn wa jamarili ɲinilu labato, ka mɔɔilu fanan karan woilu labatola, wo tii ri jate mɔɔba ri harijeene mansaya rɔ. 20 N di tuɲa fɔ ai yɛ ko na ai la telenbaya ma tamin Farisiilu ni sariya karanmɔɔilu ta la, ai ti nala donna harijeene mansaya rɔ fewu.

21 «Ai ka a mɛn ko a fɔra ai benbailu yɛ ko: ‹I kana mɔɔ faa,› ko ‹ni mɔɔ wa mɔɔ faa, a ri a lɔ Alla ɲakɔrɔ a kiti kanma.› 22 Kɔni n ye a fɔla ai yɛ ko ni mɔɔ mɔɔ duɲara a badenma kanma, wo bɛnnin de ka a makiti. Ni mɔɔ mɛn ka a badenma nanin ko a mɔɔ koron, mɔɔilu ka kan ka wa wo tii ri Judiya la kititɛɛ dɛkuru tɛma. Ni mɔɔ mɔɔ ka a fɔ a badenma ma ko a hankilidɔɔ, wo tii bɛnnin jahanama ta le rɔ. 23 Wo le rɔ, i wa kɛ sɔlifen bɔla Alla la saraka bɔ diya ɲakɔrɔ, ni i hankili jiira a la ko ko do ye i ni i badenma tɛ, 24 i ye i la sɔlifen to Alla la saraka bɔ diya ɲakɔrɔ. I ye wa ka i ni i badenma tɛrabɛn fɔlɔ. Wo kɔ rɔ, i ri wa i la sɔlifen di Alla ma.

25 «Ni mɔɔ do wara i ri kititɛɛla wara ko a ye a makasila i kan, ai watɔla, i ye ko bɛɛ kɛ ka kɛlɛ ban jonna. Ni wo tɛ, ni a wara i don kititɛɛla bolo, wo ri i don kaso bon kuntii bolo. Wo fanan di i bila kaso la. 26 N di tuɲa fɔ i yɛ. I ti nala bɔla kaso la fewu, fɔɔ i wa ban wodi fɔnin muumɛ sarala.

27 «Ai ka a mɛn ko a fɔra ko: ‹I kana kaninkɛ.› 28 Kɔni n ye a fɔla ai yɛ ko ni i ka muso do ragbɛ ka kunfan a fɛ, i ra ban kaninkɛ kɛla muso wo fɛ i jusu rɔ. 29 Wo rɔ, ni i bolokininma ɲa kɛra sababu ri ka i lɔ kojuu kɛla, i ye a labɔ ka a lafili, baa ni i bɔnɔra i farikolo yɔrɔ kelen de rɔ, wo le ka fisa i ma sani i farikolo dafanin ye lafili jahanama kɔndɔ. 30 Ni i bolokinin kɛra sababu ri ka i lɔ kojuu kɛla, a tɛɛ a la ka a lafili, baa ni i bɔnɔra i farikolo yɔrɔ kelen de la, wo le ka fisa i ma sani i farikolo dafanin ye wa jahanama kɔndɔ.

31 «A fɔra fanan ko: ‹Ni cɛɛ mɛn ye a fɛ ka a muso bila, fɔɔ a ye furusa sɛbɛ di a ma.› 32 Kɔni n ye a fɔla ai yɛ ko mɔɔ mɔɔ wa a muso bila ka a tɛrɛn muso wo tun ma jalonya kɛ, wo tii ra kaninkɛla sila le bila muso wo kɔrɔ. Mɔɔ mɛn wa muso furusanin furu, wo tii fanan da kaninkɛ.

33 «Fanan, ai ka a mɛn ko a fɔra ai benbailu yɛ ko: ‹I kana i kalilikan tiɲan. I wa dakan mɛn ta Alla yɛ, i ye wo dafa.› 34 Kɔni n ye a fɔla ai yɛ ko ai kana ai kali muumɛ. Ai kana ai kali sankolo la, baa Alla la mansaya siifen de wo ri. 35 Ai kana ai kali duukolo la, baa Alla sen lɔ yɔrɔ le wo ri. Ai kana ai kali Jerusalɛmu la, baa Mansaba Alla la so le wo ri. 36 Ai kana ai kali ai jɛrɛ kun na, baa ai ti se hali ai kunsi kelen gbɛla, wala ka a fin. 37 Ni ai sɔnda ko ma, ai ye a fɔ dɔrɔn ko ‹ɔɔn›. Ni ai ma sɔn ko ma, ai ye a fɔ dɔrɔn ko ‹ɛn-ɛn›. Ai ye dan wo ma. Mɛnilu wa la wo kan, woilu bɛɛ bɔni Setana le rɔ.

38 «Ai ka a mɛn ko a fɔra ko: ‹Ni mɛn ka ai ɲa te, ai ye wo fanan ɲa te. Ni mɛn ka ai ɲin kadi, ai ye wo fanan ɲin kadi.› 39 Kɔni n ye a fɔla ai yɛ ko ai kana ai ta julu sara mɔɔ la mɛn ye a fɛ ka kojuu kɛ ai la. Ɔɔn, ni mɔɔ do ka i bolokininma gbanfudu gbasi, i ni a to kelen fanan lɔ a yɛ. 40 Ni mɔɔ ye a fɛ ka wa i ri kiti diya sa a ri i la duruki kɔrɔbila mira i la, i ye i la durukiba fanan di a ma. 41 Ni mɔɔ ka i diyagboya ko i ye a la donin ta ka kilo kelen taama kɛ a fɛ, i ye a la donin ta ka kilo fila taama kɛ a fɛ. 42 Ni mɔɔ ka i tara fen na, i ye a sɔ. Ni mɔɔ ka a fɔ ko i ye i la fen sinkan a ma, i kana i ban a ma.

43 «Ai ka a mɛn ko a fɔra ko: ‹I ye i mɔɔɲɔɔilu kanin, ka i juuilu kɔn.› 44 Kɔni n ye a fɔla ai yɛ ko ai ye ai juuilu kanin, ka Alla tara ai tɔrɔbailu yɛ. 45 Ni ai ka a kɛ ten, ai ri kɛ sankolo rɔ Fa denilu ri. Baa ale le ye a la tele labɔla mɔɔ juuilu ni mɔɔ ɲuma fila bɛɛ yɛ. A ye sanci nanala mɔɔ telenninilu ni mɔɔ telenbaliilu fila bɛɛ yɛ. 46 Ni wo tɛ, ni ai ka ai kaninbailu dɔrɔn kanin, ai ri baraji ɲuman sɔrɔn wo la? Hali niisɔnkɔmiralailu ye wo ɲɔɔn kɛla. 47 Ni ai ye ai badenmailu le dɔrɔn fola, wo ye ko ba le ri wa? Ɛn-ɛn. Hali Alla lɔnbaliilu ye wo ɲɔɔn kɛla. 48 Ai ye kɛ mɔɔ dafaninilu ri ikomin sankolo rɔ Fa dafanin ɲa mɛn ma.»