1 Farisiilu ni Sadusiilu nara ka Isa kɔrɔbɔ. Ii ka a fɔ ko a ye tɔɔmasere kabannakoma do kɛ ii ɲana, mɛn bɔni sankolo rɔ. 2 Isa ka a fɔ ko: «Ni ai ka sankolo ɲa lawulennin yen fitiri waati, ai ri a fɔ ko sanci tɛna nala sini. 3 Sɔɔma, ni ai ka sankolo ɲa lafinnin yen, ai ri a fɔ ko sanci ri na bi, baa san da fin. Nba, ai kusan sankolo koilu faranfaasila ka woilu famun. A ye di wo rɔ? Tɔɔmasere mɛnilu ye kɛla waati ɲin na, nfenna ai ti se ka woilu famun? 4 Mɔɔ juuilu ni lemɛniyabaliilu ye a fɛ ka tɔɔmasere kabannakoma yen, kɔni tɔɔmasere si tɛ yiraka ai la ni Junusa ta su tɛ.»

Wo kɔ rɔ, a ka ii to ye ka wa.

5 Nba, Isa ni a la karandenilu wara dala kɔma. Kɔni karandenilu ɲinara, ii ma buru ta. 6 Isa ka a fɔ ii yɛ ko: «Ai ɲa lɔ. Ai ye ai janto ai jɛrɛ rɔ Farisiilu ni Sadusiilu la lɛbɛn kanma.» 7 Karandenilu ka a fɔ i ɲɔɔn yɛ ko: «An ma na buru ri. Wo le ka a kɛ, a ka kuma wo fɔ.» 8 Isa ka ii la miriya lɔn. Wo rɔ, a ka a fɔ ii yɛ ko: «Ai la lemɛniya ka dɔɔ! Nfenna ai ye a fɔla a ɲɔɔn yɛ ko buru tɛ ai bolo? 9 Ai ma a ɲayen fɔlɔ wa? N ka burukala loolu ta ka cɛɛ waa loolu (5,000) balo mɛn kɛ, a ni ai ka see jate mɛn nafa buru kunkundun tɔilu la, wo ra bɔ ai kɔndɔ wa? 10 N ka burukala wɔrɔnwula ta ka cɛɛ waa naanin (4,000) balo mɛn kɛ, a ni ai ka see jate mɛn nafa buru kunkundun tɔilu la, wo ra bɔ ai kɔndɔ wa? 11 N kan tun tɛ buru ma. Nfenna ai ma wo ɲayen fɔlɔ? Nba, ai ye ai janto ai jɛrɛ rɔ Farisiilu ni Sadusiilu la lɛbɛn kanma.» 12 Wo rɔ, karandenilu ka a ɲayen ko Isa ma a fɔ ii yɛ ko «ai ye ai janto ai jɛrɛ rɔ buru lɛbɛn kanma.» A ka a fɔ ii yɛ ko «ai ye ai janto ai jɛrɛ rɔ Farisiilu ni Sadusiilu la karan de kanma.»

13 Awa, Isa ni a la karandenilu seni Sesare Filipi mara rɔ, a ka ii maɲininka ko: «Mɔɔilu ye Mɔɔ Dencɛ jatela yon di?» 14 Ii ka a jabi: «Doilu ka a fɔ ko Yaya le. Doilu ka a fɔ ko Eliya le. Dogbɛrɛilu ka a fɔ ko Jeremiya le, wala keladen fisamante gbɛrɛ, mɛn taminda kɔrɔman.» 15 A ka ii maɲininka ko: «Ai don? Ai ye n jatela yon di?» 16 Simɔn Piyɛri ka a fɔ ko: «I ye Ɲenematɔmɔnin de ri, mɛn ye Alla ɲenema Dencɛ ri.» 17 Isa ka a jabi: «Junusa dencɛ Simɔn, i ye barakaden de ri, baa i ka mɛn fɔ ɲin di, adamaden si ma wo fɔ i yɛ. N Fa Alla mɛn ye sankolo rɔ, wo le ka a yiraka i la. 18 N di a fɔ i yɛ fanan ko ile le Piyɛri ri, mɛn kɔrɔ ye ko farakolo. N di n na lemɛniya jama lalɔ farakolo wo kan. Saya ni a fanka ti nala nɔ sɔrɔnna dɛkuru wo ma. 19 N di harijeene mansaya daɲinilu di i ma. Ni i ka fen fen sidi duukolo kan yan, wo ri sidi sankolo rɔ. Ni i ka fen fen fulɛn duukolo kan yan, wo ri fulɛn sankolo rɔ fanan.» 20 Isa ka a fɔ ii yɛ ka a magbɛlɛnya kosɛbɛ ko ii kana a fɔ mɔɔ si yɛ ko ale le Ɲenematɔmɔnin di.

21 A ka a fɔ ii yɛ ko a ka kan ka wa Jerusalɛmu ka tɔrɔya siyaman ba sɔrɔn mɔɔbakɔrɔilu ni sarakalasela kuntiilu ni sariya karanmɔɔilu bolo. A ka kan fanan ka faa, ni tele sawanan, ka wuli ka bɔ saya rɔ. 22 Piyɛri ka a kili ka a mabɔ karanden tɔilu la dɔɔni, ka a makuma damira. A ka a fɔ ko: «Maari, Alla ye i tanka wo ma. Wo ti kɛla fewu!» 23 Kɔni Isa ka a kɔfɛnin ka Piyɛri makuma ko: «Ile, Setana. Bɔ n kɔrɔ! Ile ye n kundatiɲanna le ri, baa Alla sawo ye mɛn di, i tɛ i mirila wo ma, fɔɔ mɔɔilu sawo.»

24 Wo kɔ rɔ, Isa ka a fɔ a la karandenilu yɛ ko: «Ni mɔɔ mɛn ye a fɛ ka a bila n kɔ, fɔɔ wo tii ye a ban a jɛrɛ rɔ ka a gbɔngbɔn jiri mira ka a jɛrɛ bila n kɔ, 25 baa mɔɔ mɛn ye a fɛ ka a nii kisi, wo tii ri bɔnɔ ɲenemaya bɛrɛbɛrɛ rɔ. Kɔni ni mɔɔ mɛn bɔnɔra a nii rɔ nde kosɔn, wo tii ri a jɛrɛ kisi. 26 A ye di? Ni mɔɔ ka dunuɲa bɛɛ sɔrɔn ka bɔnɔ ɲenemaya bɛrɛbɛrɛ rɔ, dunuɲa sɔrɔn di nfen ɲa a ma wo rɔ? Mɔɔ ri se nfen dila ka a nii kunka? 27 Nde Mɔɔ Dencɛ ri na n Fa nɔɔrɔ rɔ, n ni a la mɛlɛkailu. Wo lon, n di bɛɛ sara ka a bɛn a tii kɛwaliilu ma. 28 N di tuɲa fɔ ii yɛ. Doilu ye ai tɛma yan, mɛnilu ti nala sala ni ai ma Mɔɔ Dencɛ natɔla yen ka kɛ mansa ri.»