1 Nba, Isa banda lalilikan woilu fɔla a la karanden tan ni fila yɛ tuma mɛn na, a bɔra ye ka wa Judiya la soilu kɔndɔ ka mɔɔilu karan, ka ii kawandi.

2 Awa, ka Yaya to kaso la, Ɲenematɔmɔnin na kɛwaliilu fɔra a ɲana. Wo rɔ, a ka a la karanden doilu kelaya Isa ma. 3 Ii wara Isa maɲininka ko: «Alla kɛtɔ mɔɔ mɛn nanala, wo ye ile le ri wa, wala an ye mɔɔ gbɛrɛ makɔnɔ?» 4 Isa ka ii jabi: «Ai ye mɛnilu mɛnna, a ni ai ye mɛnilu yenna, ai ye wa woilu fɔ Yaya yɛ. 5 Ko ɲa funyenilu ɲa ra laka, nambarailu ra taama koɲuma, kunatɔilu ra kɛndɛya, tologbedenilu tolo ra laka, suilu ra wuli ka bɔ saya rɔ, kibaro ɲuma ra lase bolokolonilu ma. 6 Sɛwa ye wo tii yɛ mɛn tɛ bilala fili rɔ n na ko rɔ!»

7 Yaya la keladenilu watɔla, Isa kumara jama yɛ Yaya la ko rɔ. A ka a fɔ ko: «Ai wara nfen dagbɛ diya wula kɔndɔ? Ai ka bin gbansan de ragbɛ wa, fɔɲɔ ye mɛn namaala? Wo kuma tɛ! 8 Ai wara nfen dagbɛ diya wo rɔ? Faanin dagbɛlɛn tii wa? Wo kuma tɛ. Mɛnilu ye faanin dagbɛlɛn donna, woilu ye sɔrɔnna mansabolon de kɔndɔ. 9 Ai wara nfen dagbɛ diya? Ii ma wa keladen fisamante do ragbɛ wa? N di a fɔ ai yɛ ko keladen fisamante le tɛrɛ. Kɔni ale ka bon keladen fisamante ri paaɔn. 10 A la ko sɛbɛnin Alla la kitabu kɔndɔ ko:

‹A ragbɛ, n di n na keladen nawa i ɲɛrɔ.

Wo ri i la sila rabɛn i yɛ.› *

11 «N di tuɲa fɔ ai yɛ: muso si ma den sɔrɔn fɔlɔ mɛn ka bon Yaya ri. Wo bɛɛ ni a ta, mɛn ka dɔɔ a tɔ bɛɛ ri harijeene mansaya rɔ, wo tii ka bon Yaya ri. 12 Ka bɔ Yaya la kawandili kɛ waati ma haan ka na se bi ma, *mɔɔilu ye harijeene mansaya kɛlɛla fanka la. Mɔɔ fadinmailu ye a ɲininna ka a mira, 13 baa sani Yaya ye na, kelalaselailu bɛɛ ni Musa la sariya ka harijeene mansaya ko fɔ. 14 Ni ai sɔnda ka la a la, Eliya tɔɔ mɛn ko fɔra ko a ri na ikɔ tuun, Yaya le wo ri. 15 Tolo ye mɛn ma, wo tii ye a tolo malɔ kuma wo la.

16 «N ye bi mɔɔilu lala nfen ma? Ii bɔnin denninilu le la, mɛnilu siinin lɔfɛ rɔ. Ii ye a fɔla ii duɲɔɔilu yɛ ko:

17 ‹A ragbɛ. An ka fule fɔ ai yɛ,

kɔni ai ma sɔn ka dɔn kɛ.

An ka saya donkili la ai yɛ,

kɔni ai ma kasi.›

18 «Baa Yaya nara, a ma dɔɔnnin kɛ, a ma minnin kɛ. Wo rɔ, mɔɔilu ka a fɔ ko jenatɔ le a ri. 19 Mɔɔ Dencɛ fanan nara. A ye dɔɔnnin kɛla, a ye minnin kɛla. Wo rɔ, ai ka a fɔ ko wo ye noma ni dolominna le ri. Ko a la duɲɔɔilu ye niisɔnkɔmiralailu ni kojuukɛlailu le ri. Kɔni famunyali ri jo sɔrɔn a kɛwaliilu fɛ.»

20 Wo kɔ rɔ, Isa tun ka kabannako siyaman kɛ so mɛnilu kɔndɔ, a wulira wo mɔɔilu jalakila, baa ii tun ma tubi. 21 Isa ka a fɔ ko: «Korasɛnkailu, gbalo ye ai yɛ. Bɛtisayidakailu, gbalo ye ai fanan yɛ. Kabannako ba mɛnilu kɛra ai rɔ, ni woilu tun kɛra Tiri so kɔndɔ, wala Sidɔn so kɔndɔ, ye mɔɔilu tun di kojuu kɛ boloka kɛbi waati jan. Ii tun di buurigbɛ kɛ ii kun dɔ, ka kasanbɔrɔ faanin bila ii kan na, ii la tubi tɔɔmasere ri. 22 Kɔni, n ye a fɔla ai yɛ ko kiti lon wa se, ai la kiti ri gbɛlɛnya ka tamin Tirikailu ni Sidɔnkailu ta la. 23 Kapɛrinahumukailu, ai don? Ai ri yɛlɛ haan ka se sankolo rɔ wa? Wo kuma tɛ! Ai ri jii fɔɔ ka se jahanama kɔndɔ! Baa kabannako mɛnilu kɛra ai tɛma, ni woilu tun kɛra Sɔdɔmu so kɔndɔ, Sɔdɔmu so tun di tɛrɛn ye haan bi. 24 Kɔni n ye a fɔla ai yɛ ko kiti lon wa se, ai la kiti ri gbɛlɛnya ka tamin Sɔdɔmukailu ta la.»

25 Wo tuma, Isa ka a fɔ ko: «N Fa Alla, sankolo ni duukolo Maari, n ye baraka bilala i yɛ, i ka lɔnnin yiraka denninilu la, i ka wo doon mɔɔ famunyaniilu ni hankilimailu ma. 26 Ɔɔn, n Fa. A diyara i yɛ ka wo kɛ.

27 «N Fa Alla ra fen bɛɛ karifa n na a la ko rɔ. Mɔɔ si ma Fa Alla Dencɛ lɔn bɛrɛbɛrɛ kɛ fɔɔ Fa Alla. Mɔɔ si fanan ma Fa Alla lɔn bɛrɛbɛrɛ kɛ fɔɔ a Dencɛ. Dencɛ wo wa a Fa yiraka mɛnilu la, woilu fanan di se a lɔnna.

28 «Ai mɛnilu sɛɛnin ai la donin ba kɔrɔ, ai ye na n ma. N di lafɔɲɔ di ai ma. 29 Ai ye n na donin ta gbeleke* ta, ka n na karan mira, nde n jɛrɛ majiinin, ai ri niilafɔɲɔ sɔrɔn. 30 Baa, n na donin ta gbeleke tɛ gbiliyanin, n na donin fɛya de.»