1 Wo lon kelen, Isa bɔra bon na ka wa a sii dala da la. 2 Jama ba ka ii ladɛn a laminin dɔ. Wo rɔ, a donda kulun do kɔndɔ ka a sii. Jama bɛɛ lɔnin tora gbele ma ye. 3 A ka ko siyaman fɔ ii yɛ kuma kɔrɔlamailu rɔ. A ka a fɔ ko: «Ai ye ai tolo malɔ. Sifoyila do bɔra ka wa si foyi diya sɛnɛ rɔ. 4 Ka a to si foyila, si doilu bera sila dala. Kɔnɔilu nara woilu ta ta. 5 Si doilu bera farama yɔrɔ kan, banku ma siya yɔrɔ mɛn. Si woilu fɛrɛnda jonna, baa banku ma siya ye. 6 Tele bɔra kosɛbɛ tuma mɛn na, ii mɔrɔmɔrɔra. Ii jara, baa ii luluilu ma don duu rɔ kosɛbɛ. 7 Si doilu bera nɔnbɔwɔninma yɔrɔ rɔ. Sumanilu wulira mɛn kɛ, wɔninilu fanan wulira ka ii dɔɔn. 8 Nba, si doilu fanan bera duu ɲuma rɔ. Suman woilu sɔnda kosɛbɛ. Si doilu ka ii ɲɔɔn kɛmɛ (100) kɛ, doilu ka ii ɲɔɔn biwɔɔrɔ (60) kɛ, doilu ka ii ɲɔɔn bisawa (30) kɛ. 9 Tolo ye mɛn ma, wo tii ye a tolo malɔ kuma wo la.»

10 Karandenilu ka ii madon Isa la ka a maɲininka ko: «Nfenna i ye kumala mɔɔilu yɛ kuma kɔrɔlamailu rɔ?» 11 A ka a fɔ ii yɛ ko: «Harijeene mansaya ko mɛnilu doonnin tɛrɛ, woilu lɔnnin da di ai le ma. Kɔni wo ma di ii ma, 12 baa fen ye mɛn bolo, do ri la wo tii ta kan. A ta ri siyaya. Kɔni fen tɛ mɛn bolo, hali fitinin mɛn ye a bolo, wo ri mira a la. 13 Wo le kosɔn, n ye kumala ii yɛ kuma kɔrɔlamailu rɔ, baa ii ye ragbɛli kɛla, kɔni ii tɛ foyi yenna. Ii ye ii tolo malɔla, kɔni ii tɛ foyi mɛnna, ii tɛ foyi famunna. 14 Wo rɔ, ii ka a kɛ, Esayi ka mɛn fɔ, wo ra lakanbali. A ka a fɔ ko:

‹Ai ri ai tolo malɔ kosɛbɛ, kɔni ai tɛna foyi famunna.

Ai ri ragbɛli kɛ kosɛbɛ, kɔni ai ti nala foyi yenna.

15 Baa siya ɲin da ii ban famunyali ma.

Ii ra ii tolo gbeden

ka ii ɲa masidi.

Ni wo tɛ, ii ɲa tun di yennin kɛ,

ii tolo tun di mɛnnin kɛ,

ii hankili tun di famunyali sɔrɔn,

ii tun di ii kɔsɛ ka na nde Alla ma.

Wo rɔ, n tun di ii lakisi.›

16 «Kɔni ai ye barakaden de ri, baa ai ɲa ye yennin kɛla, ai tolo fanan ye mɛnnin kɛla. 17 N di tuɲa fɔ ai yɛ: ai ɲa ye mɛn yenna, a lɔɔ tɛrɛ ye keladen fisamante siyaman ni mɔɔ telennin siyaman na ka wo yen, kɔni ii ma fɛrɛ sɔrɔn ka ii ɲa la wo kan. Ai tolo ye mɛn namɛnna, a lɔɔ tɛrɛ ye ii la ka wo mɛn, kɔni ii ma fɛrɛ sɔrɔn ka ii tolo malɔ a la.»

18 Isa ka a fɔ ko: «Ai tolo malɔ, ai ri sifoyila kuma kɔrɔlama la kɔrɔ lamɛn. 19 Mɛnilu wa harijeene mansaya kuma lamɛn, kɔni ii tɛ a famun, Ko Juu Tii nala wo rɔ, ka a bɔ ii jusu rɔ. Woilu kɛnin de ikomin si mɛnilu bera sila kɔfɛ. 20 Si mɛn bera farama yɔrɔ kan, wo ye mɔɔilu le ri mɛn da Alla la kuma lamɛn, ka a mira i kɔrɔ ka sɛwa. 21 Kɔni lulu ti ye, a ni kuma wo ma sabati ii jusukun dɔ bɛrɛ bɛrɛ kɛ. Ii tɛ mɛn bakɛ lemɛniya sila kan, baa ni gbɛlɛnya ka ii sɔrɔn, wala ni mɔɔilu ka ii tɔrɔ Alla la kuma kosɔn, ii ri sila bila i kɔrɔ. 22 Si mɛn bera nɔnbɔwɔninma yɔrɔ rɔ, wo le mɔɔilu le ri mɛn ka Alla la kuma lamɛn, kɔni dunuɲa koilu hamin da don ii jusukun dɔ. Nanfulu lɔɔ ri ii mira ka ii magbɛrɛn kɛ. Ko woilu bɛɛ kosɔn, Alla la kuma ri mabali ii jusukun dɔ, ka kɛ ikomin sɛnɛ rɔ fen ɲatɔntan, mɛn ma a den. 23 Nba, si mɛn bera duu duman dɔ, wo le mɔɔ ri mɛn ye Alla la kuma mɛnna ka a famun. Kuma wo ri sabati a jusukun dɔ, ka kɛ ikomin suman si mɛn ye ɲala ka i ɲɔɔn kɛmɛ (100) kɛ, wala i ɲɔɔn biwɔɔrɔ (60), wala i ɲɔɔn bisawa (30).»

24 Isa ka kuma kɔrɔlama gbɛrɛ fɔ ii yɛ. A ka a fɔ ko: «Harijeene mansaya ye ikomin cɛɛ do la ko. A ka suman si ɲuma foyi a la sɛnɛ rɔ. 25 Kɔni, ka mɔɔilu bɛɛ to sunɔɔ rɔ su rɔ, a juu nara kɔmɔɔ la maalo kisɛ foyi a la sɛnɛ rɔ. 26 Nba, maalo* fɛrɛnda ka wuli, ka a kisɛ. Wo tuma, mɔɔilu ka kɔmɔɔ la maalo fanan yen. 27 Sɛnɛtii la jɔnilu wara a fɔ a yɛ ko: ‹An tii, i ma maalo si ɲuma le foyi i la sɛnɛ rɔ wa? Kɔmɔɔ la maalo woilu bɔnin min ten?› 28 Sɛnɛtii ka a fɔ ko: ‹N juu do nɔ le.› Ii ka a maɲininka ko: ‹I ye a fɛ an ye wa kɔmɔɔ la maalo mabɔ sɛnɛ rɔ wa?› 29 A ka a fɔ ko: ‹Ɛɛn, ai ye a to ye. Ni wo tɛ, ni ai ka kɔmɔɔ la maalo mabɔ, ai ri maalo doilu fanan mabɔ a fɛ. 30 Ai ye ii bɛɛ to ye. Ii ye wuli ii ɲɔɔn fɛ fɔɔ sumanka waati wa se. Ni sumanka waati sera, n di a fɔ sumankalailu yɛ ko ii ye kɔmɔɔ la maalo fɔlɔ ka, ka a lasidi, ka a janin. Wo wa kɛ, ii ri maalo ka ka a ladon n na bondon kɔndɔ.›»

31 Isa ka kuma kɔrɔlama gbɛrɛ fɔ mɔɔilu yɛ. A ka a fɔ ko: «Harijeene mansaya ye ikomin bɔrɔn fira kisɛ. Cɛɛ do ka bɔrɔn fira kisɛ lan a la sɛnɛ rɔ. 32 Bɔrɔn fira kisɛ wo dɔɔman ka tamin fen kisɛilu bɛɛ kan. Kɔni a wa fɛrɛn ka wuli, a ri bonya ka tamin nakɔfen bɛɛ kan. A ri kɛ ikomin jiri, ka bolon bailu labɔ, fɔɔ waa rɔ kɔnɔilu ri se ii ɲaanilu lala a bolonilu la.»

33 A ka kuma kɔrɔlama gbɛrɛ fɔ ii yɛ. A ka a fɔ ko: «Harijeene mansaya ye ikomin lɛbɛn, muso ka mɛn doonin kɛ farinin muun kilo muwan ni kelen (21) dɔ ka wo kɛ dɛɛba ri. Lɛbɛn wo ka dɛɛba bɛɛ lawuli ka a funun.»

34 Isa ka wo bɛɛ fɔ jamailu yɛ kuma kɔrɔlamailu le rɔ. A ma foyi fɔ ii yɛ ni a ma wo fɔ kuma kɔrɔlama rɔ. 35 A ka a kɛ ten sa keladen fisamante la kuma ri kanbali, mɛn ka a fɔ ko:

«N di kuma kuma kɔrɔlamailu rɔ.

Ko mɛnilu doonnin kɛbi dunuɲa dan waati la, n di woilu fɔ.»

36 Wo kɔ rɔ, Isa bɔra jama rɔ ka wa don bon na. A la karandenilu ka ii madon a la, ka a fɔ a yɛ ko: «Kuma kɔrɔlama mɛn ye bin juu wuli la ko fɔla sɛnɛ rɔ, i ye wo kɔrɔ fɔ an yɛ.» 37 Isa ka ii jabi: «Mɛn ye suman si ɲuma foyila, wo ye Mɔɔ Dencɛ le ri. 38 Sɛnɛ wo ye dunuɲa le ri. Suman si ɲuma, wo ye mansaya denilu le ri. Kɔmɔɔ la maalo ye Kojuu Tii la mɔɔilu le ri. 39 Juu mɛn ka kɔmɔɔ la maalo kisɛilu foyi sɛnɛ rɔ, wo ye Ibulusa jɛrɛ le ri. Sumanka waati, wo ye dunuɲa laban de ri. Sumankalailu ye mɛlɛkailu le ri. 40 Kɔmɔɔ la maalo juuilu ye ladɛnna ɲa mɛn ma ka janin ta la, wo ɲɔɔn di kɛ dunuɲa laban waati. 41 Mɔɔ Dencɛ ri a la mɛlɛkailu kelaya ka na. Mɛnilu ye mɔɔilu bilala kojuu kɛ rɔ, a ni mɛnilu ye kojuu kɛla, a la mɛlɛkailu ri woilu bɛɛ ladɛn ka ii bɔ Mɔɔ Dencɛ la mansaya rɔ. 42 Mɛlɛkailu ri woilu lafili ta ba rɔ, kasi ni ɲin macin ye yɔrɔ mɛn dɔ. 43 Kɔni mɔɔ telenninilu ri bonya sɔrɔn ka mɛlɛnmɛlɛn ikomin tele ii Fa la mansaya rɔ. Tolo ye mɛn ma, wo tii ye a tolo malɔ kuma wo la.»

44 Isa kumara ikɔ tuun ko: «Harijeene mansaya ye ikomin nanfulu mɛn doonnin duukolo kɔrɔ sɛnɛ do rɔ. Lon do rɔ, cɛɛ do ka wo yen. A ka a ta ka a dokon duukolo kɔrɔ kokura. A sɛwanin ba wara a bolofenilu bɛɛ mayira, ka na sɛnɛ wo san.

45 «Harijeene mansaya ye ikomin julacɛ mɛn ye koron kisɛ ɲumailu ɲininna. 46 Lon do rɔ, a ka koron kisɛ ɲuma do yen, mɛn ka ɲin ka tamin. A wara a bolofenilu bɛɛ mayira, ka na koron kisɛ wo san.

47 «Harijeene mansaya ye ikomin jɔɔ fanan, mɔɔilu ka mɛn nafili kɔɔji rɔ, ka jɛɛ su bɛɛ mira. 48 A wa fa jɛɛ la, sɔmɔnɔilu ri a sɔmɔn ka a labɔ gbele ma. Ii ri ii sii ka jɛɛilu rawoloma. Mɛnilu ka ɲin, ii ri woilu bila muranilu kɔndɔ. Mɛnilu ma ɲin, ii ri woilu lafili. 49 A ye kɛla wo ɲa le dunuɲa laban waati. Mɛlɛkailu ri mɔɔ juuilu rawoloma ka ii bɔ mɔɔ telenninilu rɔ, 50 ka ii lafili ta ba rɔ, kasi ni ɲin macin ye yɔrɔ mɛn dɔ.»

51 Isa ka karandenilu maɲininka ko: «Ai ka kuma ɲin bɛɛ famun wa?» Ii ka a fɔ ko: «Ɔɔn.» 52 Wo rɔ, Isa ka a fɔ ii yɛ ko: «Nba, sariya karanmɔɔ mɛnilu ra karan harijeene mansaya la ko rɔ, woilu bɛɛ ye ikomin lutii mɛn ye fen kura ni fen kɔrɔ fila bɛɛ labɔla a la nanfulu lamara diya rɔ.»

53 Nba, Isa bannin kuma kɔrɔlama wo fɔla, a bɔra yɔrɔ wo rɔ ka wa. 54 A wara a wara so kɔndɔ. A tɛrɛ ye mɔɔilu karanna salibon kɔndɔ ye. A lamɛnbailu kabannakoyara, ka a fɔ ko: «Cɛɛ ɲin ka walijiya wo sɔrɔn min? Kabannako kɛ sebaya mɛn ye a bolo, a ka wo sɔrɔn min? 55 Jiribaarala dencɛ le tɛ wa? A na le tɛ Mariyamu ri wa? Yakuba ni Yusufu ni Simɔn ni Juda, a dɔɔcɛilu tɛ woilu ri wa? 56 A dɔɔmusoilu bɛɛ tɛ an wara yan wa? Nba, a ka walijiya ni sebaya ɲin sɔrɔn min?» 57 Miriya wo le kɛra sababu ri ka ii bɛɛ kundatiɲan, ii ma la Isa la. Isa ka a fɔ ii yɛ ko: «Mɔɔilu ye keladen fisamante bonyala yɔrɔ bɛɛ rɔ fɔɔ a jɛrɛ wara, a ni a la denbayailu tɛma.» 58 Isa ma kabannako siyaman kɛ yɔrɔ wo rɔ, mɔɔilu la lemɛniyabaliya la ko rɔ.