1 A ma mɛn ba kɛ wo kɔ, Isa ni a la karandenilu tɛrɛ ye taminna sɛnɛ do tɛma Ɲɔɲɔ Lon do rɔ. Kɔnkɔ tɛrɛ ye karandenilu la. Wo rɔ, ii ka sɛnɛsuman tɔnsɔn doilu kadi ka woilu ɲuun. 2 Farisi doilu ka wo yen tuma mɛn na, ii ka a fɔ Isa yɛ ko: «A ragbɛ, i la karandenilu ye ko mɛn kɛla ten Ɲɔɲɔ Lon, wo dahanin tɛ!»

3 Isa ka ii jabi: «A ye di? Mansa Dawuda ka mɛn kɛ kɔrɔman, ai ma wo karan wa? Kɔnkɔ tɛrɛ ye a ni a taamaɲɔɔnilu la. 4 Wo rɔ, Dawuda donda Alla la bon kɔndɔ ka buru dɔɔn, buru mɛn bilanin Alla yɛ ye. Kɔni ka a bɛn sariya ma, a ni a taamaɲɔɔnilu tun ma kan ka buru wo dɔɔn fɔɔ sarakalaselailu kelen. 5 Ai ma a karan Musa la sariya rɔ ko sarakalaselailu ye baara kɛla Alla batobonba kɔndɔ Ɲɔɲɔ Lon wa? Ii ye Ɲɔɲɔ Lon sariya tiɲanna ten de, kɔni wo tɛ jatela kojuu ri. 6 N di a fɔ ai yɛ ko do ye yan, mɛn ka bon Alla batobonba ri. 7 Alla ye a fɔla a la kitabu kɔndɔ ko: ‹N ye a fɛ mɔɔ ye kininkinin mɔɔ ma. Wo duman n yɛ ka tamin saraka bɔ la.›* Ni ai tun ka kuma wo kɔrɔ lɔn, ai tun tɛ kiti labe mɔɔilu kan, mɛnilu ma kojuu kɛ, 8 baa Mɔɔ Dencɛ* le ye Ɲɔɲɔ Lon tii ri.»

9 A bɔra ye ka wa wo mɔɔilu la salibon na. 10 Wo ka a tɛrɛn cɛɛ bolofaanin do ye ye. Mɔɔ doilu ka Isa maɲininka ko: «Ka mɔɔ lakɛndɛya Ɲɔɲɔ Lon, wo dahanin wa?» Baa ii tɛrɛ ye fɛrɛ ɲininna a ma. 11 Isa ka a fɔ ii yɛ ko: «Ni saa kelen pe ye ai do bolo don? Ni saa wo bera denka kɔndɔ Ɲɔɲɔ Lon, a tii tɛ a labɔ wa? 12 Mɔɔ ka fisa saa ri paaɔn! Wo le rɔ, ka koɲuma kɛ mɔɔ yɛ Ɲɔɲɔ Lon, wo le dahanin.» 13 Isa ka ii jabi mɛn kɛ ten, a ka a fɔ cɛɛ bolofaanin yɛ ko: «I bolo rasɔmɔn.» Cɛɛ ka a bolo rasɔmɔn mɛn kɛ, a bolo kɛndɛyara fewu ka kɛ ikomin a bolo tɔ kelen. 14 Farisiilu bɔra ka wa i ɲɔɔn yen ka Isa faa ɲaɲinin.

15 Ii tɛrɛ ye mɛn kan, Isa ka wo lɔn. Wo rɔ, a bɔra ye ka wa. Jama ba bilara a kɔfɛ. A ka bɛɛ lakɛndɛya. 16 Kɔni a ka a fɔ woilu yɛ ka a magbɛlɛya ko ii kana a la ko fɔ mɔɔ si yɛ. 17 A ka wo kɛ le kosa Alla la kuma ri lakanbali, a ka mɛn don keladen fisamante Esayi da rɔ ko:

18 «N na baaraden de ten, n ka mɛn suwandi.

A duman n yɛ kosɛbɛ, n ye niisɔndiyala a la ko rɔ.

N di n na Nii Sɛniman nana a kan, a ri kiti ko fɔ siya tɔilu yɛ.

19 A ti nala sɔsɔli kɛla, a ti nala sɔnkɔsɔnkɔla.

Mɔɔilu ti nala a kan mɛnna sila kan.

20 A ti nala gbala jaran dakadila, hali mɛn da ratiɲan.

A ti nala fitinna lasala, hali mɛn ta ye sala,

haan telen ye kunnafulen sɔrɔn.

21 Siyailu bɛɛ ri ii jii la ale kan.»*

22 Wo kɔ rɔ, ii nara jenatɔ do ri Isa ma. Jena tun da a ɲa funyen ka a kɛ bobo ri. Isa ka a lakɛndɛya. Jenatɔ kumara, a ɲa lakara. 23 Mɔɔilu bɛɛ kabannakoyara. Ii ka a fɔ ko: «Mɛn di kili ko Mansa Dawuda dencɛ, ale le ɲin di wa?» 24 Farisiilu ka wo mɛn tuma mɛn na, ii ka a fɔ ko: «Jenailu la kuntiiba Ibulusa le ye se dila cɛɛ ɲin ma ka jenailu gbɛn ka bɔ mɔɔilu fɛ.»

25 Kɔni Isa ka ii la miriya lɔn. Wo rɔ, a ka a fɔ ii yɛ ko: «Mansaya mɛn mɔɔilu wa wuli ka i ɲɔɔn kɛlɛ, wo mansaya ri tiɲan fewu. So kelen mɔɔilu, wala denbaya kelen mɔɔilu, wa wuli ka i ɲɔɔn kɛlɛ, so wo ti nala mɛnna, bon wo fanan ti nala mɛnna. 26 Wo ɲa kelen ma, ni Setana ye Setana gbɛnna, a ye a jɛrɛ le kɛlɛla. A la mansaya ri mɛn wo rɔ di? 27 A ye di? Ni n ye jenailu gbɛnna Ibulusa baraka le rɔ, ai la karandenilu ye jenailu gbɛnna yon baraka rɔ? Ai la karandenilu ri ai la kiti tɛɛ. 28 Kɔni ni n ye jenailu gbɛnna Alla la Nii baraka le rɔ, wo ra a yiraka ko Alla la mansaya ra se ai tɛma. 29 Mɔɔ ti se donna cɛɛ fankama la bon kɔndɔ ka wo bolofenilu suɲa na a ma cɛɛ fankama wo mira fɔlɔ ka a sidi, wa di? A wa a sidi, a ri a bolofenilu suɲa.

30 «Nba, mɔɔ mɛn tɛ n fɛ, wo ye n juu le ri. Mɔɔ mɛn tɛ ii ladɛnna n fɛ, wo ye jɛnsɛnna le. 31 Wo le kosɔn n di a fɔ ai yɛ: mɔɔilu la kojuuilu bɛɛ ni Alla tanama kumailu bɛɛ ri se makotola. Kɔni ni mɔɔ mɔɔ ka Nii Sɛniman tanama ko kɛ, Alla ti nala wo tii makotola fewu. 32 Ni mɔɔ ka Mɔɔ Dencɛ mafɔ, a ri se makotola. Kɔni ni mɔɔ ka Nii Sɛniman mafɔ, a ti nala makotola dunuɲa ɲin dɔ yan, a tɛ makoto sini natɔ fanan.

33 «Jiri mɛn ka ɲin, wo den ka ɲin. Jiri mɛn ma ɲin, wo den ma ɲin. Jiri ye lɔnna a den de fɛ. 34 Aile fɔnfɔnnin munuɲailu! Ai ma ɲin. Ai ri se kuma ɲuma fɔla wo rɔ di? Mɔɔ jusukun fanin mɛn na, a da ye wo le fɔla. 35 Mɔɔ ɲuma ri koɲuma kɛ, baa wo ye bɔla a ɲuma yɔrɔ lakandannin de rɔ. Kɔni mɔɔ mɛn ma ɲin, wo ri kojuu kɛ, baa wo ye bɔla a juu yɔrɔ lakandannin de rɔ. 36 N di a fɔ ai yɛ ko Alla la kiti tɛɛ lon wa se, mɔɔilu ka kuma ɲatɔnɔntan mɛnilu fɔ ii da rɔ, ii ri woilu bɛɛ fɔkun fɔ Alla yɛ, 37 baa i la kumailu ri kɛ sababu ri, Alla ri jɔ di i ma, wala a ri kiti labe i kan.»

38 Wo kɔ rɔ, Farisi doilu ni sariya karanmɔɔ doilu ka a fɔ a yɛ ko: «An na karanmɔɔ, an ye a fɛ i ye tɔɔmasere kabannakoma do kɛ an ɲana, ka a yiraka ko Alla ye i fɛ.» 39 Isa ka ii jabi: «Bi mɔɔilu kɛwaliilu juuman. Ii tɛ sɔnna ka to Alla kɔ. Ii ye a fɛ ka tɔɔmasere kabannakoma yen, kɔni tɔɔmasere si tɛ yiraka ii la ni keladen fisamante Junusa ta tɛ. 40 Baa Junusa ka tele sawa ni su sawa kɛ jɛɛ ba kɔndɔ ɲa mɛn ma, Mɔɔ Dencɛ fanan di tele sawa ni su sawa kɛ duu kɔrɔ wo ɲa ma. 41 Alla wa mɔɔilu la kiti tɛɛ lon mɛn, Ninibekailu ri wuli ka sɔn la bi mɔɔilu la, baa Junusa ka woilu kawandi tuma mɛn na, ii ka tubi ka na Alla ma. Sisɛn, mɔɔ do ye yan, mɛn ka bon Junusa ri. 42 Alla wa mɔɔilu la kiti tɛɛ lon mɛn, Seba jamana mansa muso ri wuli ka sɔn la bi mɔɔilu la, baa a bɔra fɔɔ dunuɲa kun do la ka na a tolo malɔ mansa Sulemani la famunyali kumailu la. Sisɛn, mɔɔ do ye yan, mɛn ka bon mansa Sulemani ko.

43 «Jena wa gbɛn ka bɔ cɛɛ do rɔ, a ri yɔrɔ jaranilu taamataama kiɲɛ fufu kɔndɔ ka ɲɔɲɔ diya ɲinin. Kɔni a ri kaɲa. 44 Wo kɔ rɔ, a ri a fɔ ko: ‹N di n kɔsɛ ka wa n bɔ diya rɔ.› A wa se ye, a ri a tɛrɛn ko yɔrɔ wo rakolon de, ka sɛninya ikomin bon mɛn da firan ka a kɔndɔ rabɛn. 45 Wo rɔ, jena ri wa ka jena wɔrɔnwula ladɛn, mɛnilu ka juu a jɛrɛ ri. A ni woilu bɛɛ ri na ka don yɔrɔ wo rɔ ka ii sii ye. A laban, jenatɔ la ko ri juuya ka tamin a fɔlɔman na. Bi mɔɔ juuilu ta ye kɛla wo ɲa le ma.»

46 Nba, ka Isa to kumala jama yɛ, a na a ni a dɔɔcɛilu nara ii lɔ kɛnɛ ma, ko ii ye a fɛ ka kuma a yɛ. 47 Mɔɔ do ka a fɔ Isa yɛ ko: «I na ni i dɔɔcɛilu lɔnin kɛnɛ ma. Ii ye a fɛ ka kuma i yɛ.» 48 Isa ka mɔɔ wo jabi: «Yon ye n na ri? N dɔɔcɛilu ye yon ni yon di?» 49 A ka a bolo lɔ a la karandenilu la. A ka a fɔ ko: «Mɔɔ ɲinilu le n na ni n dɔɔcɛilu ri, 50 baa mɔɔ mɛnilu ye n Fa sawo kɛla, n Fa mɛn ye sankolo rɔ kɔnin, woilu le ye n dɔɔcɛilu ri, a ni n dɔɔmusoilu ni n nailu.»