1 Isa donda kulun kɔndɔ, ka dala tɛɛ, ka wa se a jɛrɛ la so kɔndɔ. 2 Ka a to ye, mɔɔilu nara kɔrɔngbɔbatɔ do ri a ma, wo lanin gbeke ma. Isa ka a yen ko ii ra lemɛniya ko a ri se cɛɛ lakɛndɛyala. Wo rɔ, a ka a fɔ kɔrɔngbɔbatɔ yɛ ko: «N dencɛ, i sɛɛbɛ don. I la kojuuilu ra makoto.»

3 Sariya karanmɔɔ doilu ka wo mɛn ka a fɔ ii jɛrɛ kɔndɔ ko: «Cɛɛ ɲin ye Alla tanama kuma fɔla.» 4 Isa ka ii miriya lɔn. A ka a fɔ ii yɛ ko: «Nfenna miriya juu ɲin ɲɔɔn ye ai jusukun dɔ? 5 A ye di? Ka a fɔ ko ‹i la kojuuilu ra makoto› wala ka a fɔ ko ‹i ye wuli ka taama,› wo fila rɔ ɲuman de fɔ duman? 6 Nba, n di a yiraka ai la ko a se ye nde Mɔɔ Dencɛ yɛ ka kojuuilu makoto dunuɲa rɔ yan.» Wo rɔ, a ka a fɔ kɔrɔngbɔbatɔ yɛ ko: «I wuli ka i la lafen ta ka wa i wara.»

7 Cɛɛ wulira ka wa a wara. 8 Jama ka wo yen tuma mɛn na, ii silanda. Ii ka Alla bonya, baa ale le ka se ba ɲin di mɔɔilu ma!

9 Isa bɔra ye ka wa. A watɔla, a ka cɛɛ do siinin yen niisɔnkɔ mira diya, cɛɛ mɛn tɔɔ ko Matiyu. Isa ka a fɔ a yɛ ko: «I ye na i bila n kɔfɛ.» Matiyu wulira ka a bila Isa kɔfɛ.

10 Lon do rɔ, Isa wara dɔɔnnin diya Matiyu wara. Niisɔnkɔmirala siyaman ni kojuu kɛla siyaman fanan nanin tɛrɛ ye. Woilu tɛrɛ ye dɔɔnninna Isa ni a la karandenilu fɛ. 11 Farisi doilu ka wo yen tuma mɛn na, ii ka a fɔ Isa la karandenilu yɛ ko: «Nfenna ai la karanmɔɔ ye sɔnna ka dɔɔnnin kɛ niisɔnkɔmiralailu ni kojuukɛlailu fɛ?» 12 Isa ka wo mɛn ka ii jabi: «Mɔɔ mɛnilu kɛndɛ, woilu mako tɛ dandalila la. Jankarɔtɔilu le mako ye dandalila la. 13 Kuma mɛn sɛbɛnin Alla la kitabu kɔndɔ ɲin di, ai ye wa ai miri wo kɔrɔ ma. A sɛbɛnin ko: ‹N ye a fɛ mɔɔ ye kininkinin mɔɔ ma. Wo duman n yɛ ka tamin saraka bɔ la.›* Nba, n ma na ka mɔɔ telenbailu kili fɔɔ kojuukɛlailu.»

14 Wo kɔrɔ, Yaya la karandenilu nara Isa tɛrɛn, ka a maɲininka ko: «Andeilu ni Farisiilu dorinin sun donna. Nfenna i la karandenilu tɛ wo kɛla?» 15 Isa ka ii jabi: «A ye di? Ka kɔɲɔcɛ to a duɲɔɔilu tɔrɔfɛ kɔɲɔmalɔ rɔ, kɔɲɔcɛ duɲɔɔilu ri se ii ɲakɔrɔ sidila wa? Wo kuma tɛ. Kɔni lon do natɔ, kɔɲɔcɛ ri bɔ ii tɛma. Wo lon, ii ri sun don.

16 «Mɔɔ tɛ faanin kura kunkundun ta ka faanin kɔrɔ labadi. Ni mɔɔ ka wo kɛ, faanin kura ri faanin kɔrɔ sɔmɔn ka a fara. A faraɲa wo ri juuya ka tamin fɔlɔmanta la. 17 Mɔɔ tɛ rɛsɛnji kura burundun foroko kɔrɔ kɔndɔ. Ni mɔɔ ka wo kɛ, foroko ri fara, rɛsɛnji ri bɔ. Foroko ri tiɲan. Ɔɔn, mɔɔ ri rɛsɛnji kura kɛ foroko kura le kɔndɔ. Wo rɔ, fen si tɛ tiɲan.»

18 Ka Isa to kuma ɲin fɔla, Judiya ɲɛmɔɔ do nara a ɲɔnkin Isa kɔrɔ, ka a madiya ko: «N denmuso sasan de ten ten. I ye na i bolo la a kan. Wo rɔ, a ri to a nii la.» 19 Isa ni a la karandenilu wulira ka ii bila cɛɛ kɔfɛ ka wa. 20 Wo ka a tɛrɛn, muso jankarɔtɔ do ye ye. A ra san tan ni fila kɛ jelibɔ jankarɔ ye a la. A ka a madon Isa la a kɔfɛ ka a maa a la durukiba dakun na, 21 baa a tɛrɛ ye a fɔla a jɛrɛ kɔndɔ ko: «Ni n sera ka n maa a la duruki la gbansan, n di kɛndɛya.» 22 Isa ka a kɔfɛnin ka muso yen. A ka a fɔ a yɛ ko: «N denmuso, i sɛɛbɛ don. I la lemɛniya ra i lakɛndɛya.» Muso kɛndɛyara i kɔrɔ ye.

23 Nba, Isa donda ɲɛmɔɔ la bon kɔndɔ. A ka fulɛfɔlailu tɛrɛn ye, a ni jama mɛn ye mankanba bɔla. 24 A ka a fɔ ii yɛ ko: «Ai ye wa. Sunkurun ma sa, a ye sunɔɔ le rɔ tuun.» Kɔni ii ka a bɔrɔbɔ. 25 Jama bɛɛ labɔra kɛnɛma tuma mɛn na, Isa donda bon kɔndɔ, ka sunkurun su mira a bolo ma. Sunkurun wulira. 26 Mɔɔilu ka wo ko kibaro mɛn wo jamana yɔrɔ bɛɛ rɔ.

27 Isa bɔra ye ka wa. Ɲa funyen fila wulira ka ii bila a kɔfɛ, ii ye wɔyɔla ko: «Dawuda dencɛ,* i ye hina an na.» 28 Isa donda bon na tuma mɛn, ɲa funyen fila ka ii madon a la. A ka ii maɲininka ko: «Ai lanin a la ko n di se ai ɲa lakala wa?» Ii ka a fɔ ko: «Ɔɔn, Maari, an lani wo la.» 29 Wo rɔ, Isa ka a bolo maa ii ɲa la. A ka a fɔ ko: «Ai la lemɛniya kosɔn, ai ɲa ri laka.» 30 Ii ɲa lakara. Isa ka a fɔ ii yɛ ka a magbɛlɛnya ko: «Ai kana ko wo fɔ mɔɔ si yɛ.» 31 Kɔni ii bɔnin kɔ so kɔndɔ, Isa tun ka mɛn kɛ, ii ka wo lakali mara fan bɛɛ rɔ.

32 Cɛɛ fila wo bɔra tuma mɛn na ka wa, mɔɔilu nara cɛɛ jenatɔ do ri Isa ma wo waati kelen. Jena tun da cɛɛ wo kɛ bobo ri. 33 Isa ka jena gbɛn mɛn kɛ dɔrɔn, bobo cɛɛ wo kumara. Jama kabannakoyara ka a fɔ ko: «Wo ɲɔɔn ma kɛ Isirayɛlikailu la jamana kɔndɔ fɔlɔ fewu.» 34 Kɔni Farisiilu ka a fɔ ko: «Jenailu la kuntii ye se dila Isa ma ka jenailu gbɛn ka bɔ mɔɔilu fɛ.»

35 Isa tɛrɛ ye soilu ni bondailu bɛɛ rataamala. A tɛrɛ ye mɔɔilu karanna ii la salibonilu la, ka harijeene mansaya kibaro ɲuma lase, ka mɔɔilu lakɛndɛya ka ii bɔ ii la jankarɔ rɔ a ni ii la fɛɛmaya bɛɛ rɔ. 36 A ka jama yen tuma mɛn na, ii kininkinin donda a rɔ. Ii bɛɛ haminnin, ka tunnagboya. Ii ye ikomin saailu, gbɛngbɛnna tɛ mɛnilu la. 37 A ka a fɔ a la karandenilu yɛ ko: «Suman kata ka siya, kɔni baaraden ma siya. 38 Wo le rɔ, ai ye sɛnɛtii madiya, sa a ri baaradenilu lɔ suman kala a la sɛnɛ rɔ.»