1 Nba, a tun da to tele fila Taminkunna Sali ri kɛ, a ni Buru Fununbali Sali. Alla la sarakalasela kuntiilu ni sariya karanmɔɔilu tɛrɛ a ɲa ɲininna ka Isa mira dokon dɔ ka a faa. 2 Baa ii tɛrɛ a fɔla ko: «An kana a mira sali waati la; ni wo tɛ, mɔɔilu ri wuli ka murunti.»

3 Awa, Isa tɛrɛ ye tola Betani so kɔndɔ, Simɔn Kunatɔ wara. Ka a siinin to dɔɔnnin diya, muso do wulira ka na daa alabasitari ri, mɛn fanin latikɔlɔn tulu dagbɛlɛnna. Latikɔlɔn tulu tɔɔ ko naridi. Muso wo ka daa rate ka latikɔlɔn tulu mun Isa kun ma. 4 Wo ka mɔɔ mɛnilu tɛrɛn ye, doilu mɔnɛra ka a fɔ i ɲɔɔn yɛ ko: «Nfenna muso ɲin da latikɔlɔn tulu tiɲan ten? 5 Tulu ɲin tun di se feerela wodi gbanan kɛmɛ sawa (300) la, ka wodi wo kɛ fantanilu dɛmɛnfen di.» Ii ka muso majaman kojuuya. 6 Kɔni Isa ka a fɔ ii yɛ ko: «Ai ye muso to ye! Nfenna ai ye a tɔrɔla? A ra koɲuma kɛ n yɛ. 7 Baa fantanilu ye ai fɛ waati bɛɛ. Ni waati waati ka ai diya, ai ri se ka ii dɛmɛn. Kɔni n ti nala tola ai fɛ yan haan waati bɛɛ de. 8 Muso ka a se ko le kɛ n yɛ. A ka latikɔlɔn tulu mun n fari ma ka a rabɛn su don kanma sani wo waati ye se. 9 N di tuɲa fɔ ai yɛ, kibaro ɲuma wa lase mɔɔilu ma yɔrɔ yɔrɔ dunuɲa rɔ yan, muso ka mɛn kɛ ɲin di, wo fanan di fɔ ye, sa mɔɔilu hankili ri to a le rɔ.»

10 Wo kɔrɔ, Judasi Sikariyɔti mɛn tɛrɛ ye Isa la talibidenba tan ni fila do ri, wo wara Alla la sarakalasela kuntiilu tɛrɛn ye, ko a le ri Isa don ii bolo. 11 Kuma wo diyara ii yɛ. Ii ka lahidi ta Judasi yɛ ko ii ri wodi di a ma. Wo le rɔ, Judasi ka fɛrɛ ɲinin ka Isa don ii bolo.

12 Nba, Judiyailu dorinin saadenilu kannatɛɛla ka ii kɛ Taminkunna Sali dɔɔnnin di Buru Fununbali Sali lon fɔlɔ rɔ. Wo rɔ, Isa la karandenilu ka a maɲininka ko: «I ye a fɛ an ye Taminkunna Sali dɔɔnnin dabɛn i yɛ min?» 13 Isa ka a la karanden fila kelaya, ka a fɔ ii yɛ ko: «Ai ye wa so kɔndɔ. Ai ri bɛn cɛɛ do ri ye, ji ye daa rɔ a kun ma. Ai ye ai bila a kɔfɛ. 14 Cɛɛ wo wa don bon mɛn na, ai ye a fɔ bontii wo yɛ ko: ‹Karanmɔɔ ka a fɔ ko: «N ni n na karandenilu ri Taminkunna Sali dɔɔnnin kɛ bon mɛn na, wo ye min?»› 15 Cɛɛ wo ri bon ba do yiraka ai la sankaso sanma, mɛn dabɛnnin koɲuma. An mako ye fen mɛnilu la, woilu bɛɛ ri tɛrɛn ye. Ai ye dɔɔnninta wo rabɛn an yɛ ye.» 16 Karandenilu bɔra ye ka wa so kɔndɔ. Ii senin ye, ii ka a tɛrɛn ikomin Isa ka a fɔ ii yɛ ɲa mɛn ma. Ii ka Taminkunna Sali dɔɔnninta rabɛn ye.

17 Fitiri waati, Isa ni a la talibidenba tan ni fila sera ye. 18 Kɔ fɛ, ka ii siinin to dɔɔnninna, Isa ka a fɔ ii yɛ ko: «N di tuɲa fɔ ai yɛ: ai rɔ kelen di n janfa ka n don mɔɔjuuilu bolo. Wo tii ye dɔɔnnin kɛla n fɛ yan.» 19 Karandenilu niilafinda kuma wo kosɔn. Ii bɛɛ ka a fɔ a yɛ kelen kelen ko: «I kan tɛ nde ma, ko di?»

20 Isa ka ii jabi: «Wo tii ye ai mɔɔ tan ni fila rɔ. A ye a bolo bilala muran kelen kɔndɔ n fɛ dɔɔnnin diya yan. 21 Baa Mɔɔ Dencɛ ri faa ikomin a sɛbɛnin a la ko rɔ ɲa mɛn ma. Kɔni mɔɔ mɛn di a janfa ka a don mɔɔjuuilu bolo, gbalo ye wo tii yɛ! Hali ni wo tii sɔrɔnbali tun tora, wo tun ka fisa a ma paaɔn.»

22 Nba, ka ii to dɔɔnninna Isa ka buru ta ka baraka bila Alla yɛ. A ka buru rakadikadi, ka a di ii ma ka a fɔ ii yɛ ko: «Ai ye ɲin mira ka a dɔɔn. N fari le ɲin di.» 23 Wo kɔ rɔ, a ka jilafɛ ta*, ka baraka bila Alla yɛ, ka ban ka jilafɛ di ii ma. Ii bɛɛ ka do min a rɔ. 24 A ka a fɔ ii yɛ ko: «N jeli le ɲin di, mɛn ye teriya jeli ri. A bɔnnin mɔɔ siyaman yɛ. 25 N di tuɲa fɔ ai yɛ. N ti nala rɛsɛnji minna butun fewu, fɔɔ n wa a kura min lon mɛn na Alla la mansaya rɔ.»

26 Awa, ii ka kalaman bɔ, ka ban ka wa Olibiye Koyinkɛ kan.

27 Wo tuma, Isa ka a fɔ ii yɛ ko: «Ai bɛɛ ri n bila ka ai bori, baa a sɛbɛnin ko:

«N di saagbɛnna gbasi ka a faa,

saailu bɛɛ ri jɛnsɛn.

28 «Kɔni ni n wulira ka bɔ saya rɔ, n di wa ai makɔnɔ Kalile mara rɔ.» 29 Piyɛri ka a fɔ Isa yɛ ko: «Hali ni tɔilu bɛɛ ka i bila ka i bori, n kɔni ti nala i bilala muumɛ.» 30 Isa ka a jabi: «N di tuɲa fɔ i yɛ: bi su ɲin dɔ jɛrɛjɛrɛ, sani dondon ye kasi siɲa fila, i ri a fɔ mɔɔilu yɛ fɔɔ siɲa sawa ko i ma n lɔn.» 31 Kɔni Piyɛri ka a fɔ ka a magbɛlɛnya kosɛbɛ ko: «Hali ni ile faara, n fanan di faa wo waati kelenna, n tɛ a fɔ habadan ko n ma i lɔn.» Talibiden tɔilu bɛɛ fanan kan ten.

32 Nba, Isa ni a la karandenilu sera yɔrɔ do rɔ, mɛn tɔɔ ko Kɛtisemani. Isa ka a fɔ ii yɛ ko: «Ai ye ai sii yan fɔɔ n wa ban Alla matarala.»

33 A ka Piyɛri ni Yakuba ni Yuhana kili ko ii ye wa a malɔ. Silan ba ka a mira damira a ni a jusu tɔrɔra kosɛbɛ. 34 A ka a fɔ ii yɛ ko: «Jusukasi ra wara n ma. A ye ikomin n satɔ le. Ai ye n makɔnɔ yan ka to ai ɲana.»

35 A wara ɲɛfɛ dɔɔnin, ka a be duu ma. A ka Alla matara ko ni a tɛrɛ ri bɛn, tɔrɔya waati ɲin tɛrɛ ye a masɛ ale la. 36 A ka a fɔ ko: «Baba, n Fa, i ri se ko bɛɛ kɛla. I ye nii ɲakankatan minninfen ɲin masɛ n na. Kɔni n jɛrɛ sawo kana kɛ fɔɔ i sawo.»

37 Wo kɔ rɔ, Isa ka a kɔsɛ ka wa talibidenba sawa tɛrɛn. Ii ye sunɔɔ rɔ. A ka a fɔ Piyɛri yɛ ko: «Simɔn, i ye sunɔɔ rɔ wa? I ma se tola i ɲana hali waati kelen? 38 Ai ye to ai ɲana ka Alla matara, sa Setana ti nala ai manɛɛnna ka ai lɔ kojuu kɛla. Sika tɛ a rɔ, a lɔɔ ye ai la ai sɔnɔmɛ rɔ ka koɲuma kɛ. Kɔni wo kɛ fanka tɛ ai fari rɔ.»

39 Isa bɔra ii fɛ ka wa ɲɛfɛ ikɔ tuun, ka Alla matara wo ɲa kelen ma. 40 A kɔsɛ mɛn kɛnin ii ma, a ka ii tɛrɛn sunɔɔ rɔ ikɔ tuun. Baa sunɔɔ ba tɛrɛ ii ɲa la. Ii kununnin, ii ma a lɔn ii ka kan ka mɛn fɔ Isa yɛ.

41 Isa wara ka na ii tɛrɛn a siɲa sawana. A ka a fɔ ii yɛ ko: «Ai ye sunɔɔla fɔlɔ ka ai ɲɔɲɔ wa? A ra ban ten. Waati ra se. Sisɛn, Mɔɔ Dencɛ kɛtɔ donna kojuukɛlailu bolo. 42 Ai ye ai wuli, an ye wa. Mɛn di n don mɔɔ juuilu bolo, wo ra na.»

43 Nba, ka Isa to kumala, Judasi sera ye, wo mɛn ye Isa la talibidenba tan ni fila do ri. Jama ba tɛrɛ ye a kɔfɛ, fanmuru ni gbeleke ye ii bolo la. Ii kelayanin Alla la sarakalasela kuntiilu ni sariya karanmɔɔilu ni mɔɔbakɔrɔilu le bolo. 44 (Nba, mɛn kɛtɔ Isa donna ii bolo, a tun ka tɔɔmasere yiraka ii la. A ka a fɔ ko: «N wa n ton mɛn kan ka a sunbu, wo le. Ai ye a mira ka wa a ri, ka ai janto a rɔ kosɛbɛ.») 45 Awa, Judasi senin ye, a ka a madon Isa la i kɔrɔ ka a fɔ ko: «Karanmɔɔ!» A ka a ton a kan ka a sunbu. 46 Wo tuma, mɔɔ doilu ka Isa mira. 47 Mɔɔ do ka a la fanmuru bɔ a laa rɔ ka Alla la sarakalasela kuntiiba la jɔncɛ gbasi, ka a tolo kelen tɛɛ a la. 48 Isa ka a fɔ jama yɛ ko: «Ai nanin n mira diya gbelekeilu ni fanmuruilu ri ikomin mɔɔilu ye bɔla benkaninna kanma ɲa mɛn ma wa? 49 N tɛrɛ mɔɔilu karanna ai dafɛ lon lon Alla batobonba jin kɔndɔ, kɔni ai ma n mira ye. Kɔni mɛnilu sɛbɛnin Alla la kitabu kɔndɔ, fɔɔ woilu bɛɛ ye kanbali. Wo le ka a kɛ, a kɛnin ten.»

50 A la karandenilu bɛɛ ka a to ye ka ii bori ka wa. 51 Kanberen do bilanin tɛrɛ Isa kɔfɛ, birinkan makisali dɔrɔn bilanin a kan na. Ii ka ale mira tuma mɛn na, 52 a fari makolon ka a bori ka wa, ka a la birinkan to ii bolo.

53 Awa, jama wara Isa ri Alla la sarakalasela kuntiiba wara. Alla la sarakalasela kuntiilu ni mɔɔbakɔrɔilu ni sariya karanmɔɔilu bɛɛ nara i ɲɔɔn nadɛn ye.

54 Piyɛri ka bila a kɔfɛ, kɔni ii tɛma ka jan, haan Sarakalasela Kuntiiba la lu ma. A ka a sii kandan mɔɔ tɔrɔfɛ ta fɛ ka ii maja. 55 Alla la sarakalasela kuntiilu ni Judiyailu la kititɛɛla dɛkuru mɔɔilu bɛɛ tɛrɛ ye kuma do ɲininna Isa kanma, mɛn di se kɛla a faa sababu ri. Kɔni ii ma foyi sɔrɔn. 56 Baa mɔɔ siyaman ka wuya la Isa la, kɔni ii kan ma kɛ kelen di. 57 Doilu ka ii lɔ ka wuya la a la ko: 58 «An ka a mɛn a da rɔ ko Alla batobonba mɛn lɔnin mɔɔilu bolo ɲin di, ko ale ri wo te ka dogbɛrɛ lɔ tele sawa kɔrɔ, mɛn ma lɔ mɔɔ bolo la.» 59 Kɔni hali sereya woilu kan ma kɛ kelen di.

60 Wo kɔ rɔ, Alla la sarakalasela kuntiiba wulira jama tɛma ka Isa maɲininka ko: «I tɛ an jabila foyi la? Mɔɔilu ye nfen fɔla i la ko rɔ?» 61 Kɔni Isa ka a makun; a ma jabili kɛ. Alla la sarakalasela kuntiiba ka a maɲininka ikɔ tuun ko: «Ile ye Mɔɔ Ɲenematɔmɔnin de ri, i ye Alla, an ye mɛn bonyala, wo Dencɛ le ri, ?» 62 Isa ka a jabi: «Ɔɔn, nde le. Ai ri Mɔɔ Dencɛ siinin yen Sebɛɛtii Alla bolokinin ma*. Ai ri a natɔla yen duruilu tɛma ka bɔ sankolo rɔ*.»

63 Wo rɔ, Alla la sarakalasela kuntiiba ka a jɛrɛ la durukiba mira ka a rafarafara. A ka a fɔ ko: «An mako tɛ mɔɔilu la sereya la butun. 64 Ai ra Alla tanama kuma wo mɛn a da rɔ! An ye nfen kɛla wo rɔ?» Ii bɛɛ ka a fɔ ko Isa ni saya le ka kan. 65 Mɔɔ doilu wulira ii daji kɛla a ma, ka a ɲa lasidi, ka a gbasi ii bolokudu la. Ii ka a fɔ ko: «Mɛn ka i gbasi, wo tɔɔ fɔ an yɛ!» Kɔnɔgbɛnnailu fanan ka a mira, ka a gbasi.

66 Nba, ka Piyɛri to lu ma ye sankaso bon kɔrɔ, Alla la sarakalasela kuntiiba la jɔnmuso do nara. 67 Wo ka Piyɛri yen, a ye a majala ta da la. A ka Piyɛri ragbɛ kosɛbɛ ka a fɔ a yɛ ko: «Ile fanan tɛrɛ ye Isa kɔfɛ, Nasarɛtika jɔ.» 68 Kɔni Piyɛri ka a sɔsɔ. A ka a fɔ ko: «I ye mɛn fɔla, n ma a lɔn; n ma wo famun.» Wo kɔ rɔ, Piyɛri bɔra ye ka wa i lɔ lu da la. Dondon kasira. 69 Jɔnmuso kelen wo ka Piyɛri yen ye. Wo rɔ, a ka a fɔ ikɔ tuun ye mɔɔilu yɛ ko: «Cɛɛ ɲin ye mɔɔ woilu do le ri.» 70 Kɔni Piyɛri ka a sɔsɔ ikɔ tuun. A ma mɛn, mɔɔ mɛnilu lɔnin tɛrɛ ye, woilu ka a fɔ Piyɛri yɛ ko: «Sika tɛ a rɔ, i fanan ye mɔɔ woilu do le ri, baa i ye Kalileka le ri.» 71 Wo tuma, Piyɛri ka a kali ko: «Ni n ye wuya le fɔla, Alla kana n to ye. Ai ye kumala cɛɛ mɛn na ko rɔ, nde ma wo lɔn fewu.»

72 Wo waati jɛrɛ rɔ, dondon kasira a siɲa filana rɔ. Isa tun ka mɛn fɔ Piyɛri yɛ, a hankili bilara wo rɔ. Baa Isa ka a fɔ a yɛ ko: «Sani dondon ye kasi siɲa fila bi, i ri a fɔ mɔɔilu yɛ siɲa sawa ko i ma n lɔn.» Wo rɔ, Piyɛri kasira kosɛbɛ.