Josuwe 13

Yɔrɔ mɛnilu ma mira fɔlɔ

1 Nba, waati wo taminni kɔ, Allabatala kumara Josuwe yɛ ka a tɛrɛn Josuwe ra kɔrɔ kosɛbɛ. Allabatala ka a fɔ ko: «I ra kɔrɔ kosɛbɛ. Kɔni Isirayɛlikailu ka kan ka yɔrɔ mɛnilu mira fɔlɔ, woilu ka siya ba le. 2,3 Ai ma Filisitiilu la jamana bɛɛ mira fɔlɔ, a ni ii la mansaso loolu. So woilu ye Kasa ri, a ni Asidɔdi ni Asakalon ni Kati ni Ɛkɛron, Abakailu la jamana fanan ma bɛɛ mira fɔlɔ. Ai ma Kesurikailu la jamana bɛɛ mira, mɛn ye Misiran jamana telebɔ rɔ. Yɔrɔ mɛn ye bɔla Sihɔri ba la Misiran dan na ka wa tele kankan bolomaran dɔ fɔɔ Ɛkɛron so ma, ai ma wo mira fɔlɔ. Mɔɔilu ye yɔrɔ wo jatela Kanaankailu ta le ri. 4 Ai ma Kanaanka la jamana bɛɛ fanan mira. Wo ye bɔla Mehara so le la, mɛn ye Sidɔnkailu ta ri, ka wa se fɔɔ Afɛki so ma Amɔrikailu la jamana dan na. 5 Ai ma Kɛbalikailu la duu mira fɔlɔ. Telebɔ rɔ, ai ma Lebanon koyinkɛ ma yɔrɔ bɛɛ ta munun. Wo ye bɔla Bahali Kadi so la Hɛrimɔn koyinkɛ kɔrɔ, ka wa se fɔɔ Lebo-Hamati ma. 6 Koyinkɛma yɔrɔ mɛn ye Lebanon ni Misirefɔti Mayimu tɛma, ai ma wo fanan mira fɔlɔ. Ye mɔɔilu ye Sidɔnkailu le ri. Awa, n kan ye yɔrɔ mɛnilu bɛɛ ma ko ai ma woilu mira fɔlɔ, n jɛrɛ ri ii gbɛn ka bɔ ai ɲakɔrɔ. I ri duu wo bɛɛ ratala Isirayɛlikailu tɛma, ka a kɛ ii ta ri, ikomin n ka a fɔ i yɛ ɲa mɛn ma. 7 I ye a ratalan kabila kɔnɔndɔ tɛma, a ni Manase kabila talantɛ.»

Isirayɛlika mɛnilu tora Juridɛn Ba kɔ

8 Nba, Rubɛn kabila ni Kadi kabila ni Manase kabila talantɛ tun ka ii niiyɔrɔ sɔrɔn Juridɛn Ba kɔ. Allabatala la baaraden Musa ka duu di ii ma ye. 9 Ii la yɔrɔ dan bɔni so fila le la. Do ye Arinɔn Kɔ dinban tɛmala rɔ. A tɔ kelen ye Arowɛri so le ri, ni a ye Arinɔn Kɔ da la. Medeba gbɛkannan bɛɛ fanan tɛrɛ ye a rɔ, ka wa se fɔɔ Dibɔn so ma. 10 Ii la yɔrɔ ye wala fɔɔ Amonikailu la jamana dan na. Amɔrikailu la mansa Sihɔn na soilu bɛɛ fanan tɛrɛ ye a rɔ. Sihɔn na mansaso tɛrɛ ye Hɛsibon di. 11 Kiliyadi jamana fanan tɛrɛ ye ie la yɔrɔ rɔ, a ni Kesurikailu la jamana ni Maakakailu la jamana. Hɛrimɔn Koyinkɛ bɛɛ tɛrɛ ye a rɔ, a ni Basan jamana bɛɛ ka wa se fɔɔ Saleka mara rɔ. 12 Basan jamana mansa Ɔki siini tɛrɛ yɔrɔ mɛnilu bɛɛ kun na, woilu bɛɛ tɛrɛ ye a rɔ. Wo la mansasoilu tɛrɛ ye Asitarɔti ni Edereyi ri. Ɔki tɛrɛ Refayilu la siya mɔɔ laban do le ri. Awa, Musa ka mɔɔ woilu bɛɛ kɛlɛ, ka se ii la, ka ii gbɛn, ka ii la jamanailu mira ii la. 13 Kɔni Isirayɛlikailu ma Kesurikailu ni Maakakailu gbɛn. Wo le kosɔn hali bi Kesuri ni Maaka siini Isirayɛlikailu fɛ.

14 Lebi kabila mɔɔilu le kelen pe ma duu sɔrɔn Musa bolo, baa ii cɛ ye bɔla saraka janintailu le rɔ, mɔɔilu ye mɛnilu bɔla ka janin Isirayɛlikailu Maari Allabatala yɛ. Allabatala jɛrɛ le ka wo lahidi ta Lebi kabila mɔɔilu yɛ.

Rubɛn kabila ka yɔrɔ mɛn sɔrɔn

15 Musa tun ka duu do di Rubɛn kabila ma, bɔnsɔn bɛɛ ni a ta. 16 Yɔrɔ wo dan tɛrɛ ye Arowɛri so ri, mɛn ye Arinɔn Kɔ da la. So mɛn ye Arinɔn Kɔ dinban tɛmala rɔ, wo fanan tɛrɛ ye yɔrɔ wo dan do le ri. Gbasan mɛn ye Medeba so laminin dɔ, wo tɛrɛ ye yɔrɔ wo rɔ. 17-20 Hɛsibon so tɛrɛ ye yɔrɔ wo rɔ, a ni a laminin soilu bɛɛ. Woilu le ɲin di: Dibɔn, Bamoti-Bahali, Bɛti-Bahali-Mɛyon, Jahasi, Kedemɔtu, Mefata, Kiriyatayimi, Sibima, Sereti Sahara mɛn ye dinban tindi kan, Bɛti-Peyɔrɔ, Bɛti-Jesimɔti, a ni Pisika koyinkɛ. 21 Ka a la laminin so woilu kan, yɔrɔ mɛnilu bɛɛ tɛrɛ ye Amɔrikailu la mansa Sihɔn bolo ye le kɔrɔman, wo bɛɛ tɛrɛ ye Rubɛn kabila ta le ri. Sihɔn tele rɔ, a la mansaso tɛrɛ ye Hɛsibon de ri. Musa tun ka a kɛlɛ ka se a la, ka se Madiyan jamana kuntiilu fanan na. Kuntii woilu tɔɔ le ko Ebi ni Rɛkɛmu ni Suru ni Huri ni Reba. Ii siini tɛrɛ ye jamana kɔndɔ ye, kɔni ii tɛrɛ ye mansa Sihɔn na fanka le kɔrɔ. 22 Isirayɛlikailu ka mɔɔ woilu kɛlɛ tuma mɛn na, ii ka mɔɔ siyaman faa fanmuru la. Beyɔri dencɛ Balami tɛrɛ ye woilu do le ri. Balami tɛrɛ ye fɛlɛlila le ri. 23 Juridɛn Ba tɛrɛ ye Rubɛn kabila la duu dan de ri telebe rɔ. Awa, so ba ni so mɛsɛn mɛnilu dira Rubɛn kabila ma ka a kɛ ii la niiyɔrɔ ri, woilu le wo ri, bonkɔndɔla bɛɛ ni a ta.

Kadi kabila ka yɔrɔ mɛn sɔrɔn

24 Musa tun ka duu do di Kadi kabila fanan ma, bonkɔndɔla bɛɛ ni a ta. 25 Jasɛri so ye ii la yɔrɔ le rɔ, a ni Kiliyadi jamana soilu bɛɛ. Amonikailu la jamana fan kelen fanan ye a rɔ, ka wa se fɔɔ Arowɛri so ma, ni a ye Raba so da fɛ. 26 Yɔrɔ wo tɛrɛ ye bɔla Hɛsibon na, ka wa se fɔɔ Rama-Misipa ni Betonimu soilu ma. A tɛrɛ ye bɔla Mahanimu so la, ka wa se fɔɔ Lo-Debara. 27 Bɛti-Haramu so fanan tɛrɛ ye a rɔ, a ni Bɛti-Nimira so ni Sukɔti so ni Safon so. A ni so bɛɛ mɛnilu tɛrɛ ye mansa Sihɔn na jamana kɔrɔ kɔndɔ Juridɛn Ba dinban rɔ. Sihɔn na mansaso tɛrɛ ye Hɛsibon de ri. Yɔrɔ wo ye Juridɛn Ba telebɔ rɔ. A ye wala tele kankan bolomaran dɔ ka se fɔɔ Kinerɛti Dala ma. 28 Awa, so ba ni so mɛsɛn mɛnilu dira Kadi kabila ma ka a kɛ ii ta ri, woilu le wo ri, bonkɔndɔla bɛɛ ni a ta.

Manase kabila talantɛ ka yɔrɔ mɛn sɔrɔn

29 Musa tun ka yɔrɔ di Manase kabila talantɛ fanan ma, bonkɔndɔla bɛɛ ni a ta. 30 Ii la yɔrɔ tɛrɛ ye bɔla Mahanimu so le la. Basan jamana bɛɛ tɛrɛ ye a rɔ, a ni Jayiri la so ni biwɔɔrɔ (60) mɛn ye jamana wo kɔndɔ. Basan mansa Ɔki le siini tɛrɛ yɔrɔ wo bɛɛ kun na kɔrɔman. 31 Kiliyadi jamana talantɛ tɛrɛ ye yɔrɔ wo rɔ fanan, a ni Asitarɔti so ni Edereyi so. So fila woilu tɛrɛ ye Basan mansa Ɔki la mansaso kɔrɔilu le ri. Awa, yɔrɔ wo bɛɛ dira Makiri la bonkɔndɔla talantɛ ma, denbaya bɛɛ ni a ta. Makiri tɛrɛ ye Manase dencɛ le ri.

32 Nba, ka Musa to Mowabu jamana gbɛkannan dɔ, a ka ye duu ratala wo ɲa. Yɔrɔ wo ye Jeriko so telebɔ rɔ, Juridɛn Ba kɔ kɔnin. 33 Kɔni Musa ma yɔrɔ si di Lebi kabilailu ma. Isirayɛlikailu Maari Allabatala kɛra woilu niiyɔrɔ ri, ikomin a ka lahidi ta ii yɛ ɲa mɛn ma.