Josuwe 11

Josuwe ka mansa siyaman kɛlɛ

1 Nba, Hasɔri so mansa Jabin ka ko woilu mɛn tuma mɛn na, a ka kela lawa Madoni so mansa Jobabu ma, a ni Simirɔn so ni Akisafu so mansailu ma. 2 A ka kela lawa tele kankan bolomaran mansailu ma fanan, mɛnilu siini koyinkɛ ma yɔrɔilu rɔ. A ka kela lawa Araba gbɛkannan mansailu ma, mɛnilu siini Kinerɛti Dala tele kankan bolokinin ma, ka kela lawa gbɛkannan mansailu ma telebe rɔ, ka kela lawa Dori so mansa ma. 3 A ka kela lawa Kanaankailu fanan ma, mɛnilu siini telebɔ rɔ, a ni mɛnilu siini telebe rɔ. A ka kela lawa Amɔrikailu fanan ma, a ni Hɛti bɔnsɔnilu ma, a ni Peresikailu ma, a ni Jebusikailu ma, mɛnilu siini koyinkɛ ma yɔrɔilu rɔ, a ni Hifikailu ma, mɛnilu siini Hɛrimɔn koyinkɛ kɔrɔ Misipa jamana rɔ. 4 Mansa woilu ni ii la tɛsidiilu bɛɛ bɔra kɛlɛ kanma. Ii jama ba le tɛrɛ. Ii ka siya ikomin kɔɔji dala kiɲɛ. Sowontoro siyaman ni soo siyaman tɛrɛ ye ii bolo. 5 Mansa woilu bɛɛ ka i ɲɔɔn nadɛn Merɔmu Kɔ da la ka ii daa makɛ ye. Ii bɛɛ bɛnda kan kelen ma, ko ii ye Isirayɛlikailu kɛlɛla.

6 Allabatala ka a fɔ Josuwe yɛ ko: «I kana silan ii ɲɛrɔ fewu, baa ɲin tuma sini, wo ri a tɛrɛn n da woilu bɛɛ di ai ma, ii su ri to Isirayɛlikailu ɲakɔrɔ. Ai ri ii la sooilu senfasailu tɛɛ, ka ta bila ii la sowontoroilu la.»

7 Nba Josuwe ni a la tɛsidiilu wara bara ii rɔ Merɔmu Kɔ da la ka ii kɛlɛ. 8 Allabatala ka ii di Isirayɛlikailu ma. Josuwe la tɛsidiilu ka ii kɛlɛ ka ii gbɛn ka ii kɔsaran tele kankan bolomaran ma ka wa se fɔɔ Sidɔn so ba ni Misirefɔti Mayimu so ma. Ii ka ii kɔsaran telebɔ rɔ ka wa se fɔɔ Misipa dinban rɔ. Ii ka ii bɛɛ faa, hali mɔɔ kelen ma to. 9 Allabatala tun ka mɛn fɔ Josuwe yɛ, a ka wo bɛɛ kɛ. A ka ii la sooilu senfasailu tɛɛ, ka ii la sowontoroilu bɛɛ janin.

Josuwe ka Hasɔri so kɛlɛ

10 Kɛlɛ wo banni, Josuwe ni a la tɛsidiilu ka ii kɔsɛ ka Hasɔri so kɛlɛ ka a mira ka a mansa faa fanmuru la. Wo tuma, Hasɔri so le tɛrɛ ye jamanailu bɛɛ kun na. 11 Ii ka Hasɔri sokɔndɔ mɔɔilu bɛɛ faa fanmuru la, ka ii halaki fewu. Ii ma woilu si to. Ii ka ta bila so la fanan ka wo bɛɛ janin.

12 Nba, mansa mɛnilu bɛɛ wulira Isirayɛlikailu kanma, Josuwe ni a la tɛsidiilu wara woilu la soilu bɛɛ mira. Ii ka woilu mansailu ni sokɔndɔ mɔɔilu bɛɛ faa fanmuru la. Ii ka ii bɛɛ halaki fewu, ikomin Allabatala la baaraden Musa tun ka a fɔ ii yɛ ɲa mɛn ma. 13 So mɛnilu siini tɛrɛ tindiilu kan, Isirayɛlikailu ma so woilu si janin, ni Hasɔri so kelen tɛ. Josuwe ka Hasɔri so kelen de janin. 14 Josuwe la tɛsidiilu ka so kɔndɔ mɔɔilu la nanfuluilu ni ii la kolofenilu bɛɛ ta. Kɔni ii ka sokɔndɔ mɔɔilu bɛɛ faa fanmuru la, ka ii halaki fewu. Ii ma wo si to. 15 Allabatala tun ka mɛn fɔ a la baaraden Musa yɛ, ale fanan ka wo bɛɛ fɔ Josuwe yɛ. Josuwe ka wo bɛɛ kɛ. Allabatala ka fen fen fɔ Musa yɛ, Josuwe ka wo bɛɛ kɛ a ɲa ma.

Josuwe ka jamana tɔ bɛɛ mira

16 Nba Josuwe ni a la tɛsidiilu ka se sɔrɔn jamana bɛɛ kan ɲa wo le ma. Ii ka se sɔrɔn tindima yɔrɔ kan, a ni Nɛkɛbi kan, a ni Kosɛni mara kan, a ni telebe jamana kan, mɛn ye tindiilu ni kɔɔji tɛma, a ni Araba gbɛkannan dɔ, a ni Isirayɛli la koyinkɛ ma yɔrɔ ni wo gbɛkannan kan, mɛnilu ye tele kankan bolomaran dɔ. 17 Ii ka yɔrɔ bɛɛ mira ka bɔ Halaka Koyinkɛ la, mɛn kɔnin ye Seyiri jamana fan fɛ, ka wa se fɔɔ Bahali Kadi so ma, mɛn ye Lebanon dinban dɔ Hɛrimɔn koyinkɛ kɔrɔ. Ii ka ye mansailu bɛɛ mira ka woilu bɛɛ faa. 18 Josuwe tɛrɛ ye mansa woilu kɛlɛla tele siyaman dɔ. 19 So si ma duɲɔɔya don a ni Josuwe tɛma, ka hɛrɛ ɲinin Isirayɛlikailu fɛ fo Kibeyɔn, Hifikailu siini tɛrɛ yɔrɔ mɛn dɔ. Isirayɛlikailu ka so tɔilu bɛɛ kɛlɛ ka ii bɛɛ mira, 20 baa Allabatala le ka a kɛ so woilu mɔɔilu kun gbɛlɛnyara, fo ii ka Isirayɛlikailu kɛlɛ. Allabatala ka wo kɛ le sa Isirayɛlikailu ri ii halaki fewu ka ii bɛɛ faa hinabaliya rɔ ikomin a tun ka a fɔ Musa yɛ ɲa mɛn ma.

21 Waati wo la, Josuwe ni a la tɛsidiilu wara Anakikailu kɛlɛ koyinkɛ ma yɔrɔilu rɔ. Woilu siini tɛrɛ Heburɔn ni Debiri ni Anabu soilu kɔndɔ, a ni Juda kabila ni Isirayɛli la koyinkɛ ma yɔrɔ rɔ. Josuwe ni a la tɛsidiilu ka ii bɛɛ faa, ka ii ni ii la soilu bɛɛ halaki.

22 Ii ka Anakikailu bɛɛ faa Isirayɛli jamana kɔndɔ fɔɔ mɔɔ dɔndɔ mɛnilu siini tɛrɛ Kasa ni Kati ni Asidɔdi soilu kɔndɔ. 23 A kɛra ten, Josuwe ka jamana wo bɛɛ mira, ikomin Allabatala ka a fɔ Musa yɛ ɲa mɛn ma. Josuwe ka jamana wo rafara Isirayɛlikailu tɛma, kabila bɛɛ ni a la duu. Wo bɛɛ kɔrɔ, kɛlɛ banda jamana kɔndɔ.