Josuwe 18

Kabila tɔilu ka yɔrɔ mɛnilu sɔrɔn

1 Isirayɛlikailu bɛɛ wara i ɲɔɔn nadɛn Silo so kɔndɔ, ka Alla la daa makɛ faaninbon nawuli ka a lɔ ye. Wo ka a tɛrɛn jamana bilanin ii la fanka kɔrɔ. 2 Kɔni Isirayɛlikailu kabila wɔrɔnwula tun ma niiyɔrɔ duu sɔrɔn fɔlɔ. 3 Josuwe ka a fɔ Isirayɛlikailu yɛ ko, «Allabatala, ai failu Alla ka duu mɛn don ai bolo, ai ri ta ko bɔ rɔ kɛ haan waati ɲuman wa? 4 Ai ye cɛɛilu suwandi kabilailu bɛɛ rɔ, kabila kelen cɛɛ sawa. N di woilu lawa jamana yɔrɔilu bɛɛ rataamala. Jamana ye ɲa mɛn ma, ii ri wo bɛɛ sɛbɛ an dɛmɛn kanma jamana ratalala. Ii wa ban wo bɛɛ sɛbɛla, ii ri na n tɛrɛn yan. 5 Ai ri jamana ratalan yɔrɔ wɔrɔnwula ri. Juda kabila ri to ii la niiyɔrɔ rɔ tele kankan bolokinin dɔ. Yusufu bɔnsɔnilu ri to ii la niiyɔrɔ rɔ tele kankan bolomaran dɔ. 6 Ai ye niiyɔrɔ wɔrɔnwula wo tɔɔmasere ɲa sɛbɛ, ka na a di n ma. N di kalabe kɛ ai la kabila kelen kelenna yɛ an na Maari Allabatala ɲakɔrɔ. 7 Kɔni Lebi kabila mɔɔilu le ti nala niiyɔrɔ sɔrɔnna jamana kɔndɔ ai tɛma, baa ii ye Allabatala la sarakalaselailu le ri, baa Allabatala la sarakalase ye ii cɛ le ri. Kadi kabila ni Rubɛn kabila ni Manase kabila talantɛ, woilu ra ii la niiyɔrɔ sɔrɔn Juridɛn Ba telebɔ rɔ. Allabatala la baaraden Musa ka ii la niiyɔrɔ di ii ma.»

8 Nba, ii ka mɔɔ mɛnilu suwandi ka wa jamana ragbɛ, woilu ka ii rabɛn wali kanma. Sani ii ye wa, Josuwe ka jamarili di ii ma ko: «Ai ye wa jamana rataama, ka a ragbɛ kosɛbɛ. Jamana ye ɲa mɛn ma, ai ye wo sɛbɛ ka na n tɛrɛn yan. N di kalabe kɛ Allabatala ɲakɔrɔ Silo yan, sa bɛɛ ri a ta sɔrɔn.»

9 Ii bɔra ye ka wa jamana rataama. Jamana ye ɲa mɛn ma, ii ka wo bɛɛ sɛbɛ kitabu lamininnin dɔ, ka so bɛɛ tɔɔilu fanan sɛbɛ, ka jamana ratala yɔrɔ wɔrɔnwula ri. Ii banni wo la, ii ka ii kɔsɛ ka na Josuwe tɛrɛn daa makɛ diya Silo. 10 Josuwe ka kalabe kɛ Allabatala ɲakɔrɔ Silo, ka jamana ratalan Isirayɛlikailu tɛma, kabila bɛɛ ni a ta.

Bɛniyaminu kabila ka niiyɔrɔ mɛn sɔrɔn

11 Kalabe ka niiyɔrɔ fɔlɔ mɛn ta, wo kɛra Bɛniyaminu kabila ta le ri, bonkɔndɔla bɛɛ ni a ta. Niiyɔrɔ wo kɛra Juda kabila la niiyɔrɔ ni Yusufu bɔnsɔnilu la niiyɔrɔ tɛma. 12 Tele kankan bolomaran dɔ fan fɛ, niiyɔrɔ wo dan tɛrɛ ye bɔla Juridɛn Ba le ma, ka wa tamin Jeriko so tele kankan bolomaran fudu fɛ, ka wa telebe rɔ ka tamin koyinkɛ ma yɔrɔ fɛ, ka wa se fɔɔ kiɲɛ fufu kɔndɔ Bɛti-Abeni so da fɛ. 13 A ye bɔla ye ka wa tamin Lusi so tele kankan bolokinin fudu fɛ. Lusi ye kilila fanan ko Beteli. Dan ye bɔla ye ka wa Atirɔti Adari so la, mɛn ye koyinkɛ kun dɔ Bɛti-Hɔrɔn duula rɔ so tele kankan bolokinin dɔ. 14 Koyinkɛ wo telebe rɔ, dan ye tamin ka wa tele kankan bolokinin ma fan fɛ ka se fɔɔ Kiriyati Bahali ma, mɛn ye kilila fanan ko Kiriyati-Jeharimu. A ye Juda kabila la so do le ri. Awa, Bɛniyaminu kabila la niiyɔrɔ dan de tɛrɛ wo ri telebe rɔ.

15 Tele kankan bolokinin dɔ, a dan ye bɔla Kiriyati-Jeharimu so da la ka wa telebe rɔ fan fɛ ka se fɔɔ Nɛfitoha ji bɔ yɔrɔ rɔ. 16 A ye bɔla ye ka wa se koyinkɛ sen ma, koyinkɛ mɛn lɔni Bɛni Hinɔmu dinban da fɛ. Yɔrɔ wo ye Refayilu la dinban tele kankan bolomaran dɔ. Dan ye bɔla ye ka tamin Hinɔmu dinban tɛma Jebusikailu la tindi tele kankan bolokinin fudu fɛ, ka wa se fɔɔ En Rokɛla so ma. 17 A ye bɔla En Rokɛla ka wa tele kankan bolomaran fan fɛ ka se fɔɔ En Semɛsi ma, ka bɔ ye ka wa Keliyɔta so la. So wo ɲabɛnni Adumimu tindi la. Dan ye bɔla ye ka wa Bohan na kabakudun na. Bohan tɛrɛ ye Rubɛn dencɛ le ri. 18 Dan ka a tamin Araba koyinkɛ ɲakɔrɔ a tele kankan bolomaran fan fɛ, ka jii Araba gbɛkannan kɔndɔ 19 ka wa Bɛti-Hɔkila koyinkɛ tele kankan bolomaran fudu fɛ. A ye bɔla ye ka wa se Dalaba Kɔɔjilama ma tele kankan bolomaran dɔ, Juridɛn Ba ye bilala Dala wo rɔ yɔrɔ mɛn. Dan de tɛrɛ woilu ri tele kankan bolokinin dɔ. 20 Juridɛn Ba tɛrɛ ye dan de ri telebɔ rɔ. Awa, Bɛniyaminu kabila la bonkɔndɔlailu ka niiyɔrɔ mɛn sɔrɔn, wo danilu le wo ri a fan bɛɛ rɔ.

21 Bɛniyaminu bonkɔndɔla la soilu le ɲin di: Jeriko, Bɛti-Hɔkila, Emɛka Kesisi, 22 Bɛti-Araba, Semarayimu, Beteli, 23 Abimu, Para, Ofira, 24 Kefara Hamoni, Ɔfini, a ni Keba. Wo bɛɛ ladɛnnin ye so ba tan ni fila le ri, a bɛɛ ni a so mɛsɛnilu.

25 So mɛnilu lara woilu kan, woilu le ɲin: Kibeyɔn, Rama, Beerɔti, 26 Misipa, Kefira, Mosa, 27 Rɛkɛmu, Iripɛli, Tarala, 28 Sela, Helɛfu, Kibeya, Kiriyati a ni Jebusikailu la so, ni a ye Jerusalɛmu ri. Wo bɛɛ ladɛnnin ye so ba tan ni naanin de ri, a bɛɛ ni a so mɛsɛnilu. Bɛniyaminu kabila ka niiyɔrɔ mɛn sɔrɔn ka a kɛ ii ta ri, wo le wo ri, bonkɔndɔla bɛɛ ni a ta.