1 Isa ka a fɔ ii yɛ ikɔ tuun ko: «N ye tuɲa fɔla ai yɛ. Doilu ye yan, mɛnilu ti nala sala fɔɔ ai wa a yen ai ɲa la ko Alla la mansaya ra na sebaya rɔ.»

2 Nba, tele wɔɔrɔ taminnin kɔ, Isa ka Piyɛri ni Yakuba ni Yuhana kili ka wa ii ri koyinkɛ jan do kan. Mɔɔ gbɛrɛ tun tɛ ye. Ka ii to yɔrɔ wo rɔ, Isa ɲakɔrɔda yɛlɛmanda talibidenba sawa woilu ɲana. 3 A la faaninilu gbɛra kosɛbɛ fɔɔ ka mɛlɛnmɛlɛn. A gbɛni tɛrɛ ɲa mɛn ma, faaninkola si tɛ duukolo kan mɛn di se faanin kola ka a gbɛ ten. 4 Talibiden sawa ka Eliya ni Musa fanan yen. Woilu ni Isa tɛrɛ ye kumala i ɲɔɔn yɛ. 5 Piyɛri ka a fɔ Isa yɛ ko: «Karanmɔɔ, an na yan, wo bɛnnin. An tɛ gba sawa lɔ wa, i ta kelen, Musa ta kelen, a ni Eliya ta kelen.»

6 Ii silannin tɛrɛ kojuuya, Piyɛri ma a lɔn a ye mɛn fɔla. 7 Wo tuma, sanfin nara ka birin ii kun na. Kumakan do bɔra duru rɔ ko: «N dencɛ le ɲin di. A duman n yɛ. Ai ye ai tolo malɔ a la.» 8 Talibidenilu ka ii ɲa lakalan ii laminin dɔ i kɔrɔ, kɔni ii ma mɔɔ si yen butun, fɔɔ Isa kelen pe.

9 Ka Isa ni a la talibidenilu to jiila ka bɔ koyinkɛ kan, a ka ii jamari ka a fɔ ko ii ka fen mɛn yen, ko ii kana wo fɔ mɔɔ si yɛ, fɔɔ Mɔɔ Dencɛ ye wuli ka bɔ saya rɔ fɔlɔ. 10 Talibidenilu ka kuma wo labato. Kɔni ii tɛrɛ i ɲɔɔn maɲininkala ko «ka wuli ka bɔ saya rɔ wo kɔrɔ ye nfen di?»

11 Wo kɔ rɔ, ii ka a maɲininka ko: «Nfenna sariya karanmɔɔilu ye a fɔla ko Eliya fɔlɔ le ka kan ka na?» 12 Isa ka ii jabi ko: «Tuɲa le, fɔɔ Eliya le fɔlɔ ye na, ka fen bɛɛ rabɛn. Kɔni nfenna a sɛbɛnin Alla la Kitabu kɔndɔ ko Mɔɔ Dencɛ ka kan ka tɔrɔ kojuuya, ko mɔɔilu ri a bɔrɔbɔ? 13 N ye a fɔla ai yɛ ko Eliya ra ban nala. Kɔni mɔɔilu ka ii sawona koilu bɛɛ kɛ a la ikomin a sɛbɛnin ɲa mɛn ma a la ko rɔ Alla la Kitabu kɔndɔ.»

14 Nba, Isa ni talibidenba sawa woilu nara karandenilu tɛrɛn ye, ka jama ba lɔnin yen woilu laminin dɔ. Ii ni sariya karanmɔɔ doilu tɛrɛ i ɲɔɔn masɔsɔla. 15 Jama ka Isa yen tuma mɛn na, ii kabannakoyara kosɛbɛ. Ii ka ii bori i kɔrɔ ka wa a tuwa. 16 Isa ka ii maɲininka ko: «Ai ni woilu ye ai ɲɔɔn masɔsɔla nfen ma?»

17 Nba, cɛɛ do lɔnin tora jama tɛma ka Isa jabi: «Karanmɔɔ, n nanin n dencɛ ri i ma. Jena le ye a fɛ mɛn da a kɛ bobo ri. 18 Ni jena wo wulira a la yɔrɔ mɛn, a ri a labe duu ma. Den da kanfa ri bɔ, a ri a ɲin macin. A fari ri ja a ma. N ka i la karandenilu madiya ko ii ye jena wo gbɛn, kɔni ii ma se.» 19 Isa ka a fɔ ko: «Ai, bi mɔɔilu! Ai tɛ lemɛniyala! N di mɛn ai dafɛ fɔɔ tuma ɲuman? N di ai la koilu muɲun fɔɔ waati ɲuman? Ai ye na den di n ma yan.»

20 Ii nara den di. Jena ka Isa yen tuma mɛn na, a ka den nayɛrɛyɛrɛ i kɔrɔ. Den bera duu ma ka a makurukuru. A da kanfa ye bɔla. 21 Isa ka den fa maɲininka ko: «A ye kɛla ten kɛbi waati ɲuman?» Cɛɛ ka a fɔ ko: «Kɛbi a denniya tumana. 22 Jena ka a mira ko siyaman ka a labe ta rɔ, wala ji rɔ, sa a ri a faa. Ni a se ye i yɛ ka ko do kɛ, i ye kininkinin an ma ka an dɛmɛn.» 23 Isa ka a fɔ a yɛ ko: «‹Ni i ri se a la?› A bɛɛ sɔnɔman ni i lemɛniyanin» 24 Den fa ka a kan nabɔ i kɔrɔ ko: «N lemɛniyanin! Kɔni n fanan sikanin. I ye n dɛmɛn n na sika wo rɔ.»

25 Isa ka jama borimantɔ yen, a ye nala a ma. Wo rɔ, a jamanda jena ma, ka a fɔ a yɛ ko: «Jena, ile mɛn ye mɔɔ kɛla bobo ni tolo gbɛdɛn di, n ye a fɔla i yɛ ko i ye bɔ den ɲin fɛ. I kana kɛ a fɛ butun.» 26 Nba, jena wo ka kule ba kɛ ka den nayɛrɛyɛrɛ fanka la ka bɔ a fɛ. Den kɛra ikomin su. Mɔɔ mɛnilu tɛrɛ ye, woilu siyaman ka a fɔ ko den da sa. 27 Kɔni Isa ka a mira a bolo ma ka a lawuli. Den wulira ka a lɔ.

28 Wo kɔ rɔ, Isa donda bon na. Ka a to ye, a la karandenilu ka a maɲininka ii jɛrɛ ma ko: «Nfenna andeilu ma se jena wo gbɛnna?» 29 Isa ka ii jabi: «Mɔɔ ti se jena wo ɲɔɔn gbɛnna ɲa si ma ni Alla matara tɛ.»

30 Isa ni a la karandenilu bɔra ye, ka Kalile mara rataama. Isa tun tɛ a fɛ mɔɔilu ye a diya lɔn, 31 baa a tɛrɛ ye a la karandenilu karanna. A ka a fɔ ii yɛ ko: «Mɔɔ Dencɛ ri don mɔɔilu bolo. Woilu ri a faa. Kɔni tele sawanan a ri wuli.» 32 Kɔni karandenilu ma kuma wo ɲayen. Hali wo, ii ma sɔn ka Isa maɲininka a kɔrɔ ma ka a masɔrɔn ii silannin tɛrɛ.

33 Nba, Isa ni a la karandenilu sera Kapɛrinahumu. Ka ii to bon kɔndɔ, a ka ii maɲininka ko: «Ai tɛrɛ ye kumala nfen de kan sila la?» 34 Ii ka ii makun, baa mɛn ka bon tɔilu ri ii tɛma, ii tun ye i ɲɔɔn masɔsɔla wo ko rɔ sila kan. 35 Awa, Isa ka a sii ka ii mɔɔ tan ni fila kili, ka a fɔ ii yɛ ko: «Ni mɔɔ mɛn ye a fɛ ka kɛ ɲɛmɔɔ ri, fɔɔ wo tii ye kɛ bɛɛ kɔmɔɔ le ri, a ni bɛɛ la baaraden.» 36 Wo kɔ rɔ, a ka dennin do ta ka wo lalɔ ii tɛma, ka a mabɛrɛbɛrɛ, ka ban ka a fɔ ii yɛ ko: 37 «Ni mɔɔ mɛn sɔnda ka dennin ɲin ɲɔɔn mira koɲuma nde kosɔn, wo tii ra n jɛrɛ le mira wo ri. Ni mɔɔ mɛn fanan ka n mira koɲuma, wo tii ma nde gbansan mira. A ka n kelayaba le fanan mira koɲuma.»

38 Yuhana ka a fɔ Isa yɛ ko: «Karanmɔɔ, an ka cɛɛ do yen, mɛn ye jena gbɛnna ka a bɔ mɔɔilu fɛ i tɔɔ rɔ. An ka a fɔ a yɛ ko a ye wo boloka, baa a tɛ an na dɛkuru rɔ.»

39 Isa ka a jabi: «Ai kana wo mɔɔ ragbɛrɛn. Baa mɔɔ si ti se ka kabannako kɛ n tɔɔ rɔ, ka ban ka kuma juu fɔ n ma. 40 Baa mɔɔ mɛn tɛ an juu ri, wo tii ye an ɲiin de ri. 41 N di tuɲa fɔ ai yɛ: Mɔɔ mɛn ka jilafɛ ɲa kelen minninji di ai ma baa ai ye Ɲenematɔmɔnin ta le ri, wo tii tɛ bɔnɔ wo baarayi rɔ fewu. 42 Dennin mɛnilu lemɛniyanin n ma, ni mɔɔ do kɛra sababu ri ka wo kelen nafili, ni mɔɔilu ka kabakudun belebeleba sidi wo tii kan na ka a lafili kɔɔji rɔ, wo ka fisa a ma. 43,44 Ni i bolo kelen ye kɛla sababu ri ka i lɔ kojuu kɛla, i ye wo tɛɛ a la ka a bɔ ye! Baa ni i fɛtɔ donda ɲenemaya jɛrɛ jɛrɛ rɔ, wo ka fisa i ma sani i bolofilatii wa don jahanama kɔndɔ, ta sabali ye yɔrɔ mɛn.* 45,46 Ni i sen kelen ye kɛla sababu ri ka i lafili, i ye a tɛɛ ka a bɔ a la. Baa ni i senkelen donda ɲenemaya jɛrɛ jɛrɛ rɔ, wo ka fisa i ma sani i senfilatii ye lafili jahanama kɔndɔ.* 47 Ni i ɲa kelen ye kɛla sababu ri ka i lɔ kojuu kɛla, i ye a labɔ. Baa ni i ɲakelentii donda Alla la mansaya rɔ, wo ka fisa i ma sani i ɲafilatii ye lafili jahanama kɔndɔ.

48 «‹Tunbu mɛnilu ye suilu dɔɔnna, woilu tɛ faala ye fewu.

Ta fanan tɛ sala ye fewu.›

49 Ta ri kɛ mɔɔ bɛɛ la ikomin kɔɔ ye kɛla dɔɔnnifen na ɲa mɛn ma.

50 Kɔɔ ye fen ɲuma le ri. Kɔni ni a timinya bɔra a la, nfen di se a timinyala ikɔ tuun? Fɔɔ ai ye a to kɔɔ ye kɛ ai kɔndɔ, ka a to hɛrɛ ye kɛ ai ni i ɲɔɔn tɛma.»