1 Awa, Isa ni a kɔmɔɔilu sudunyara Jerusalɛmu, ka se Olibiye Koyinkɛ ma. Yɔrɔ wo ma jan Bɛtifase ni Betani soilu la. Ka ii to ye, Isa ka a la karanden mɔɔ fila kelaya. 2 A ka a fɔ ii yɛ ko: «So mɛsɛn mɛn ye ai ɲɛfɛ wo ri, ai ye wa ye. Ai wa don so kɔndɔ, ai ri fali den bulan do sidinin yen i kɔrɔ, mɔɔ ma a sii mɛn kan fɔlɔ. Ai ye a fulen ka na a ri yan. 3 Ni mɔɔ do ka ai maɲininka ko nfenna ai ye a fulenna, ai ye wo tii jabi: ‹Maari le mako ye a la. A tɛ mɛn bakɛ, a ri a lasɛ yan.›»

4 Karanden fila woilu wara ka fali den do sidinin tɛrɛn bon do dala sila dala. Ii ka a fulen. 5 Mɔɔ mɛnilu tɛrɛ ye ye, wo doilu ka karandenilu maɲininka ko: «Ai ye nfen de kɛla ɲin di ten? Nfenna ai ye fali den fulenna?»

6 Karandenilu ka ii jabi ikomin Isa ka a fɔ ii yɛ ɲa mɛn ma. Wo rɔ, mɔɔ woilu ka fali den to ii bolo ko ii ye wa a ri. 7 Karandenilu nara fali ri Isa ma. Ii ka ii la durukibailu la fali kɔ kan. Isa yɛlɛra ka a sii a kan. 8 Mɔɔ siyaman ka ii la durukibailu fɛnsɛn sila kan Isa ɲɛfɛ. Doilu ka jiribolon mɛsɛnilu fɛnsɛn sila kan a ɲɛfɛ, ii tun ka mɛnilu tɛɛ tɛɛ waa rɔ. 9 Mɔɔ mɛnilu tɛrɛ Isa ɲɛfɛ a ni mɛnilu tɛrɛ a kɔfɛ, woilu tɛrɛ ii kan ba labɔla ko:

«Tandoli ye kɛ Alla yɛ!

Mɛn ye nala Maari tɔɔ rɔ ten,

Alla ye baraka don wo rɔ.

10 An benba Dawuda la mansaya mɛn natɔ ɲin di,

Alla ye baraka don wo rɔ.

Tandoli ye kɛ Alla yɛ sankolo rɔ!»

11 Wo rɔ Isa donnin Jerusalɛmu, a wara Alla batobonba la ka fen bɛɛ ragbɛ ye. Wo kɔ rɔ, a wara Betani, a ni a la talibidenba tan ni fila, baa su tun da ko.

12 Wo duu sa gbɛni, ii bɔtɔla Betani, kɔnkɔ ka Isa mira. 13 A ka toroju do yen yɔrɔ jan. Fira tɛrɛ ye a la. A wara ka a ragbɛ ni toroden do ri sɔrɔn a la. Kɔni a sera toroju kɔrɔ tuma mɛn na, a ma den si sɔrɔn a la fɔɔ fira gbansan, baa a den waati tun ma se fɔlɔ. 14 Wo rɔ, Isa ka a fɔ toroju yɛ ko: «Mɔɔ si kana den sɔrɔn i la butun ka a dɔɔn.» A la karandenilu ka kuma wo mɛn.

15 Awa, Isa ni a la karandenilu sera Jerusalɛmu tuma mɛn na, Isa donda Alla batobonba jin kɔndɔ. A ka jula ni sanninkɛla mɛnilu tɛrɛn lu kɔndɔ ye, a wulira woilu gbɛnna ka ii labɔ ye. A ka wodifalennailu la tabaliilu labe, ka kanba julailu la siifenilu fanan nabe. 16 A ma sɔn mɔɔ si ye Alla batobonba jin kɔndɔ rataama sanninfenilu ri. 17 A ka ye mɔɔilu karan ko: «A sɛbɛnin tɛ Alla la Kitabu kɔndɔ ko: ‹N na bon di kɛ siyailu bɛɛ la Alla tara diya ri?› Kɔni ai ra a kɛ benkaninnailu dokon diya ri.»

18 Alla la sarakalasela kuntiilu ni sariya karanmɔɔilu ka ko woilu mɛn tuma mɛn na, ii ka fɛrɛ ɲinin damira ka a faa. Ii silannin a yɛ ka a masɔrɔn a la karan tɛrɛ ye jama bɛɛ kun mirala.

19 Su kora tuma mɛn na, Isa ni a la karandenilu bɔra so kɔndɔ.

20 Wo duu sa gbɛ sɔɔma da la, Isa ni a la karandenilu tamintɔla, ii ka toroju wo yen, a janin fɔɔ ka se a luluniilu ma. 21 Isa tun ka mɛn fɔ, Piyɛri hankili bilara wo rɔ. A ka a fɔ Isa yɛ ko: «Karanmɔɔ, a ragbɛ! I ka toroju mɛn danka, a ra ja.»

22 Isa ka ii jabi: «Ai ye lemɛniya Alla ma. 23 N di tuɲa fɔ ai yɛ: ni mɔɔ do ka a fɔ koyinkɛ ɲin yɛ ko; ‹i ye bɔ i nɔ rɔ ka wa be kɔɔji rɔ.› Ni wo tii ma sika don a jusu rɔ fewu fɔɔ ka la a la ko ko wo ri kɛ ikomin a ka a fɔ ɲa mɛn ma, a ri kɛ ten a yɛ. 24 Wo le kosɔn, n di a fɔ ai yɛ ko ai wa Alla matara mɛn na, ai ye la a la ko ai ra wo sɔrɔn, wo rɔ ai ri wo sɔrɔn. 25 Ka ai lɔnin to Alla tarala, ni ai hankili bilara ko mɔɔ do ka ai hakɛ ta, ai ye yafa wo tii ma, sa ai Fa mɛn ye sankolo rɔ ri ai fanan na kojuuilu makoto.» 26 *

27 Awa, Isa ni a la karandenilu sera Jerusalɛmu ikɔ tuun. Ka Isa to a mataamataamala Alla batobonba jin kɔndɔ, Alla la sarakalasela kuntiilu ni sariya karanmɔɔilu ni mɔɔbakɔrɔilu nara Isa tɛrɛn ye. 28 Ii ka a maɲininka ko: «I ye baara mɛn kɛla ɲin di, yon ka i lɔ wo la? I ye yon na se kɔrɔ?»

29 Isa ka ii jabi: «N di ai maɲininka ko kelen ma. Ai wa n jabi, n di a fɔ ai yɛ mɛn ka n lɔ baara ɲin kɛla. 30 Yon de ka Yaya lɔ mɔɔilu sunna ji rɔ? Alla le ka a lɔ wa, wala mɔɔilu? Ai ye n jabi.» 31 Ii ka a fɔ i ɲɔɔn yɛ ko: «Ni an ka a fɔ ko: ‹Alla le ka Yaya lɔ›, a ri a fɔ an yɛ ko: ‹nfenna ai ma la a la kuma la?› 32 Kɔni, ni an ka a jabi ɲa gbɛrɛ ma: ‹Mɔɔilu ma› wo ye di?» (Ii silannin jama yɛ baa mɔɔ bɛɛ ka i miri ko Yaya tɛrɛ ye keladen fisamante le ri.) 33 Wo rɔ, ii ka Isa jabi: «An ma a lɔn.» Isa fanan ka ii jabi: «Nba, ni wo le, n tɛna a fɔla ai yɛ mɛn ka n lɔ baara ɲin kɛla.»