1 Sɔɔma da la jonna, Alla la sarakalasela kuntiilu ni mɔɔbakɔrɔilu ni sariya karanmɔɔilu ni kititɛɛ dɛkuru bɛɛ ka i ɲɔɔn yen Isa la ko rɔ. Ii ka a sidi, ka wa a don Pilate bolo. 2 Pilate ka a maɲininka ko: «Ile le Judiyailu la mansa ri wa?» Isa ka a jabi: «I jɛrɛ ra a fɔ.»

3 Alla la sarakalasela kuntiilu ka sɔn siyaman la Isa la. 4 Pilate ka Isa maɲininka ikɔ tuun ko: «I tɛ jabili kɛla wa? Ii ra sɔn siyaman la i la. I ma wo mɛn wa?» 5 Kɔni Isa ma jabili si kɛ wo ko rɔ. Wo ka Pilate kabannakoya.

6 Nba, Pilate dorinin kasoden kelen bilala Taminkunna Sali waati san san, jama ye a fɛ a ye mɛn bila. 7 Wo ka a tɛrɛn cɛɛ do ye ye, mɛn tɔɔ ko Barabasi. A ni muruntiba tɔilu bilanin kaso la, baa ii ka mɔɔ do faa jama wuli tumana Romu faamailu kanma. 8 Jama senin Pilate wara, ii ka a madiya ko a ye kasoden do bila ii yɛ ikomin a dorinin a kɛla ɲa mɛn ma. 9 Pilate ka ii maɲininka ko: «Ai ye a fɛ n ye Judiyailu la mansa le bila ai yɛ wa?» 10 Pilate ka a lɔn ko keleya le ka a kɛ Alla la sarakalasela kuntiilu ka Isa don ale bolo. 11 Kɔni Alla la sarakalasela kuntiilu ka jama lasu ko ii ye Pilate madiya ko a ye Barabasi bila. 12 Pilate ka a fɔ ko: «Ai ye mɛn kilila Judiyailu la mansa, ai ye a fɛ n ye nfen kɛ wo la wo rɔ?» 13 Ii bɛɛ ka ii kan nabɔ ko: «A gbɔngbɔn jiri kan!» 14 Pilate ka ii maɲininka ko: «Nfenna? A ka kojuu ɲuman de kɛ?» Kɔni ii ka do la ii la kan nabɔ kan ikɔ tuun ko: «A gbɔngbɔn jiri kan!» 15 Pilate tɛrɛ ye a fɛ ka jama ladiya. Wo rɔ, a ka Barabasi bila, ka ban ka mɔɔilu lɔ Isa gbasila gbiɲɛ la. Wo kɔ rɔ, a ka Isa don tɛsidiilu bolo ko ii ye wa a gbɔngbɔn jiri kan.

16 Tɛsidiilu wara Isa ri jin kɔndɔ mansabolon na, ka tɛsidi tɔilu bɛɛ* kili ko ii ye na. 17 Ii ka durukiba wulenman ɲalagbɛ* do bila Isa kan na, ka wɔnin dabɛn ka a kɛ mansa fula munuɲa ri ka a birin a kun na. 18 Wo kɔ rɔ, ii ka a kɔndɔn damira ko: «Judiyailu la mansa, Jɔ!» 19 Ii tora a gbasila a kun dɔ gbeleke la ka daji tu a kan. Ii ka ii ɲɔnkin a kɔrɔ ka a kɛ ikomin ii ye a bonyala le. 20 Ii banda a lafɛyala tuma mɛn na, ii ka durukiba wulenman ɲalagbɛ bɔ a kan na, ka a jɛrɛ la faaninilu bila a kan na. Wo kɔ rɔ, ii bɔra a ri ka wa a gbɔngbɔn diya.

21 Nba, ii watɔla, ii ka cɛɛ do yen taminna, mɛn bɔtɔ waa rɔ. Cɛɛ wo tɔɔ ko Simɔn mɛn bɔnin Sirɛni. (A dencɛilu tɔɔ ko Alɛsandire ni Rufusi.) Kɛlɛdenilu ka a diyagboya ko a ye Isa gbɔngbɔn jiri ta. 22 Ii wara Isa ri yɔrɔ do rɔ, mɛn tɔɔ ko Kɔlikota. (Wo kɔrɔ le ko Kunkolo Yɔrɔ.) 23 Ii senin ye, ii ka rɛsɛnji di Isa ma, muri * do ɲaaminnin mɛn na. Isa ma sɔn rɛsɛnji wo rɔ. 24 Ii ka Isa gbɔngbɔn jiri kan. Wo kɔ rɔ, ii ka kɛ a la faaninilu ratalan ri i ɲɔɔn tɛma. Ii ka matɛɛli kɛ wo rɔ, sa bɛɛ ri ii ta sɔrɔnta lɔn. 25 Ii ka Isa gbɔngbɔn jiri kan walaharakɔ waati le. 26 A gbɔngbɔn kun sɛbɛnin walan do kan ko, «Judiyailu la Mansa.» 27,28 Ii ka benkaninna fila gbɔngbɔn a tɔrɔfɛ. Ii ka kelen gbɔngbɔn jiri do kan a bolokinin ma, ka a tɔ kelen gbɔngbɔn jiri do kan a bolomaran ma. 29 Taminbatɔilu tɛrɛ ye a naninna, ka ii kun dadɔn a kanma ka a fɔ a yɛ ko: «He! Ile mɛn di se Allabatobonba tela ka a lɔ tele sawa kɔrɔ 30 i jɛrɛ kisi ka bɔ jiri kan!»

31 Wo ɲa kelen ma, Alla la sarakalasela kuntiilu ni sariya karanmɔɔilu fanan tɛrɛ ye a lafɛyala, ka a fɔ i ɲɔɔn yɛ ko: «A ka doilu kisi, kɔni a ti se a jɛrɛ kisila. 32 Ni a ye Ɲenematɔmɔnin de ri, Isirayɛlikailu la mansa kɔnin, a ye jii ka a bɔ jiri kan. Ni an ka wo yen, an di lemɛniya a ma.»

Mɔɔ fila mɛn gbɔngbɔnnin Isa tɔrɔfɛ, woilu fanan tɛrɛ ye a naninna.

33 Nba, tele la telen waati senin, dibi donda jamana fan bɛɛ rɔ. A tora ten haan tele kɔla waati. 34 Wo tuma, Isa ka a kan ba labɔ ko: «Eloyi, Eloyi, lɛma sabakatani?» Wo kɔrɔ le ko: «N Maari, n Maari. Nfenna i ra i ban n dɔ?»

35 Mɔɔ mɛnilu lɔnin tɛrɛ diya wo rɔ, woilu ka wo mɛn ka a fɔ ko: «A ragbɛ, a ye Eliya le kilila.» 36 Do ka a bori ka wa fuu do ta, ka a sun rɛsɛnji tintiriɲanin dɔ. A ka wo dun kala la ka a la Isa da la ko a ye a min. Cɛɛ wo ka a fɔ a duɲɔɔilu yɛ ko: «Ai ye ai lɔ. An ye a ragbɛ, ni Eliya ri na ka a lajii ka a bɔ jiri kan.» 37 Kɔni Isa ka kule kan ba labɔ ka sa.

38 Alla batobonba tɛɛtɛɛ faanin farara fila ri ka bɔ san ma ka se duu ma. 39 Romu tɛsidi kuntii mɛn lɔnin tɛrɛ Isa ɲakɔrɔ ye, wo ka Isa sa ɲa yen ka a fɔ ko: «Tuɲa le, Alla Dencɛ le tɛrɛ cɛɛ ɲin di.»

40 Muso doilu fanan lɔnin tɛrɛ yɔrɔ jan ka ko woilu ragbɛ. Mariyamu Makidalaka tɛrɛ ye muso woilu rɔ, a ni Yakuba dɔɔmanin ni Jose na Mariyamu, a ni Salome. 41 Ka Isa to Kalile mara rɔ, muso woilu bilanin tɛrɛ a kɔfɛ ka a dɛmɛn. Muso gbɛrɛ siyaman fanan lɔnin tɛrɛ ii dafɛ ye, mɛnilu nanin Isa malɔ diya Jerusalɛmu.

42 Nba, su kotɔ le tɛrɛ. Wo lon tɛrɛ ye Ɲɔɲɔ Lon ɲasii lon de ri.* 43 Cɛɛ do tɛrɛ ye, mɛn tɔɔ ko Yusufu. A bɔnin Arimate so kɔndɔ. A tɛrɛ ye Judiyailu la ɲɛmɔɔ dɛkuru mɔɔba do ri. A jii tɛrɛ Alla la mansaya na waati la. Yusufu wara Pilate tɛrɛn ye jusulatɛɛ rɔ, ka a madiya ko a ye diɲɛ a ye wa Isa su lajii ka wa a don. 44 Pilate ka a mɛn, tuma mɛn na, ko Isa ra sa i kɔrɔ, a kabannakoyara. A ka tɛsidi kuntii kili ka a maɲininka ni Isa sa ra mɛn. 45 Tɛsidi kuntii ka a fɔ Pilate yɛ ko a ye ten de. Wo rɔ, Pilate ka Isa su don Yusufu bolo. 46 Yusufu ka gbaasa faanin do san, ka wa Isa su lajii ka a bɔ a gbɔngbɔn jiri kan. A ka su kasanke gbaasa faanin wo rɔ, ka wa a don kaburu do kɔndɔ, mɛn sennin farakolo rɔ. Wo kɔ rɔ, a ka kabakudun ba makurukuru ka a la kaburu da la ka wo datuun. 47 Mariyamu Makidalaka ni Jose na Mariyamu ka Isa su don yɔrɔ yen.