1 Awa, Isa ka ii karan damira kuma kɔrɔlamailu rɔ. A ka a fɔ ko: «Cɛɛ do ka rɛsɛnfɛ do labɔ ka a laminin sansan na. A ka denka sen, mɛn di kɛ rɛsɛnji bɔ diya ri. A ka gbala mayɛlɛnin do fanan lɔ, mɛn di kɛ sɛnɛ kɔnɔgbɛn diya ri. A bannin wo bɛɛ la, a ka rɛsɛnfɛ karifa sɛnɛkɛla doilu. Wo kɔ rɔ, a wara taama rɔ. 2 Rɛsɛnden kadi waati sera tuma mɛn na, a ka a la jɔn do lawa sɛnɛkɛlailu ma, ko ii ye a niiyɔrɔ di a ma rɛsɛnden kadiniilu rɔ. 3 Kɔni jɔn sera ye tuma mɛn na, sɛnɛkɛlailu ka a mira ka a gbasi, ka a bololakolon nawa. 4 Rɛsɛnfɛ tii ka jɔn gbɛrɛ lawa ii ma ikɔ tuun. Ii ka wo gbasi a kun dɔ, ka a nanin. 5 Rɛsɛnfɛ tii ka jɔn gbɛrɛ lawa ii ma ikɔ tuun. Ii ka wo faa. Rɛsɛnfɛ tii ka jɔn siyaman gbɛrɛilu lawa kelen kelen. Sɛnɛkɛlailu ka doilu gbasi, ka doilu faa. 6 Mɔɔ kelen mɛn tora rɛsɛnfɛ tii bolo, wo tɛrɛ ye a dencɛ ri, mɛn duman a yɛ kosɛbɛ. A laban, a ka wo lawa sɛnɛkɛlailu ma, baa a ka a miri ko: ‹Ii ri a dencɛ bonya.› 7 Kɔni sɛnɛkɛlailu ka a fɔ i ɲɔɔn yɛ ko: ‹Cɛtala le ɲin di. Ai ye na, an ye wa a faa. Ni an ka a faa, cɛ ri kɛ an ta ri.› 8 Wo rɔ, ii ka a mira ka a faa, ka a su lafili kɔkan.»

9 Isa ka a fɔ ko: «A ye di wo rɔ? Rɛsɛnfɛ tii ri nfen kɛ sɛnɛkɛla woilu la? A ri wa sɛnɛkɛlailu halaki ka rɛsɛnfɛ karifa mɔɔ gbɛrɛilu la. 10,11 A sɛbɛnin Alla la Kitabu kɔndɔ ko:

«‹Bon lɔlailu ka ii ban kabakudun mɛn dɔ,

wo le kɛla bon jusii kabakudun di.

Maari nɔ le wo ri.

A kɛra an ɲana kabannako ri.›

Ai ma wo karan fɔlɔ wa?»

12 Ii tun ye a fɛ ka Isa mira, baa ii ka a ɲayen ko a ka kuma kɔrɔlama wo fɔ iile le ma. Kɔni ii silanda jama yɛ. Wo rɔ, ii ka Isa to ye ka wa.

13 Wo kɔ rɔ, Judiyailu la ɲɛmɔɔilu ka Farisi doilu ni mansa Herodi kɔmɔɔ doilu lawa Isa ma, sa ii ri a mira sababu sɔrɔn a jɛrɛ da rɔ kuma doilu fɛ. 14 Ii nara a fɔ Isa yɛ ko: «Karanmɔɔ, an ka a lɔn ko i ye kankelentii le ri. I tɛ silanna mɔɔ si ɲɛ, i tɛ mɔɔ lafisayala mɔɔ ma fanan. Alla la sila ka kan ka taama ɲa mɛn, i ye mɔɔilu karanna wo la tuɲa jɛrɛ jɛrɛ rɔ. A ye di wo rɔ? Ka niisɔnkɔ bɔ ka a di Romu mansa Sesari ma, wo bɛnnin an ma wa, wala wo bɛnnin tɛ? An ka kan ka wo sara wa, wala wo ma kan ka sara?»

15 Kɔni Isa ka a ɲayen ko filanfilanteilu le. Wo rɔ, a ka a fɔ ii yɛ ko: «Nfenna ai ye n ɲaɲininna? Ai ye na wodi gbanan kelen di n ma, n ye a ragbɛ.» 16 Ii nara wodi gbanan kelen di Isa ma. A ka ii maɲininka ko: «Yon munuɲa ni yon tɔɔ ye gbanan ɲin kan?» Ii ka a fɔ ko: «Romu mansa Sesari.» 17 Isa ka a fɔ ko: «Nba, ai ye mansa Sesari la fen di mansa Sesari ma. Ai ye Alla fanan ta di Alla ma.» Isa la jabili ka ii kabannakoya.

18 Awa, Sadusi doilu (mɛnilu ka a fɔ ko mɔɔ ti wulila ka bɔ saya rɔ) woilu le nara Isa tɛrɛn, ka a maɲininka ko: 19 «Karanmɔɔ, Musa ka a sɛbɛ a la sariya rɔ ko ni i nakelenɲɔɔ do sara ka a muso densɔrɔnbali to ye, i ye muso wo ta sa a ri den sɔrɔn i nakelenɲɔɔ yɛ. 20 Awa, dencɛ wɔrɔnwula tɛrɛ ye cɛɛ do bolo. Dencɛ fɔlɔ ka muso do furu. A sara ka a muso densɔrɔnbali to ye. 21 Dencɛ filana ka muso wo ta. A fanan sara ka muso densɔrɔnbali to ye. Dencɛ sawana fanan ta kɛra ten. 22 A kɛra ten haan muso wo siira kanberen wɔrɔnwula kelen kelenna bɛɛ kun ma. Ii bɛɛ sara ka muso densɔrɔnbali to ye. Wo kɔ, muso fanan sara. 23 A ye di? Su lawuli lon, muso ri kɛ yon ta ri? A siira ii kelen kelenna bɛɛ kun ma.»

24 Isa ka ii jabi: «Ai ma Alla la Kitabu kɔrɔ famun. Ai ma foyi lɔn Alla la sebaya ko rɔ fanan. Wo le ka a kɛ, ai filini! 25 Baa suilu wa wuli saya rɔ, cɛɛ tɛna muso furula, muso fanan tɛna siila cɛɛ kun ma. Ii bɛɛ ri kɛ ikomin sankolo rɔ mɛlɛkailu. 26 Su lawuli ko fan fɛ, Musa ka jiri tunin tariku mɛn sɛbɛ Alla la Kitabu kɔndɔ, ai ma wo karan wa? Alla tora jiri tuni rɔ ka a fɔ Musa yɛ ko: ‹N ye i benba Iburahima Maari le ri, a ni i benba Isiyaka ta, a ni i benba Yakuba ta.› 27 Alla tɛ suilu Maari ri. Ɛɛn de! A ye mɔɔ ɲenemailu Maari le ri. Wo le kosɔn, ai filini kojuuya.»

28 Sariya karanmɔɔ do ka Isa ni mɔɔ woilu la sɔsɔli kan mɛn. A ka a yen ko Isa ka ii jabi a ɲumala. Wo rɔ, a ka Isa maɲininka ko: «Alla la sariya ɲuman ɲatɔnɔ ka bon tɔilu bɛɛ ri?» 29 Isa ka a jabi: «Sariya mɛn ɲatɔnɔ ka bon tɔilu bɛɛ ri, wo le ɲin di: ‹Ai Isirayɛlikailu, ai ye ai tolo malɔ: Maari Alla ye an na Alla le ri. Maari Alla kelen pe le ye. 30 Fɔɔ i ye i la Maari Alla kanin i jusukun bɛɛ rɔ, a ni i sɔnɔmɛ bɛɛ rɔ, a ni i miriya bɛɛ rɔ, a ni i fanka bɛɛ rɔ.› 31 Sariya mɛn tuunni wo la, ale le ɲin di: ‹I ye i mɔɔɲɔɔ kanin ikomin i ye i jɛrɛ.› Sariya tɛ ye, mɛn ka bon sariya fila ɲinilu ri.» 32 Sariya karanmɔɔ ka a fɔ ko: «Karanmɔɔ, i ra jabili kɛ koɲuma. I ka a fɔ ko Alla kelen pe le ye, ko Alla gbɛrɛ si tɛ ye ale kɔ. I jo ye wo rɔ. 33 Mɔɔ ka kan ka a kanin a jusukun bɛɛ rɔ, a ni a la miriya bɛɛ, a ni a fanka bɛɛ, ka a mɔɔɲɔɔ kanin ikomin a jɛrɛ. Wo ka bon saraka su bɛɛ bɔ ri Alla yɛ, hali mɛn di kannatɛɛ ka janin ka kɛ buuri ri.» 34 Isa ka a yen mɛn kɛ ko cɛɛ wo ra jabili kɛ famunyali la, a ka a fɔ a yɛ ko: «I ma jan Alla la mansaya la.» Ka a taa waati wo ma, mɔɔ si ma jusulatɛɛ sɔrɔn butun ka Isa maɲininka ko si ma.

35 Nba, ka Isa to mɔɔilu karanna Alla batobonba jin kɔndɔ, a ka mɔɔilu maɲininka ko: «Nfenna sariya karanmɔɔilu ye a fɔla ko Mɔɔ Ɲenematɔmɔnin ye Dawuda bɔnsɔn de ri? 36 Alla Nii Sɛniman ka a kɛ Dawuda jɛrɛ ka a fɔ ko:

«‹Maari Alla ka a fɔ n na maari yɛ ko:

«Na i sii n bolokinin ma,

haan n wa ban i juuilu bilala i sen kɔrɔ.»›

37 Awa, ni Dawuda jɛrɛ ye Alla la Mɔɔ Suwandini kilila ko a la Maari, a don di se kɛla a bɔnsɔn di di?» Jama ba tɛrɛ ye ii tolo malɔla Isa la ka sɛwa.

38 Ka a to karanna, a ka a fɔ ko: «Ai ye ai jɛrɛ kɔrɔsi sariya karanmɔɔilu ma de! A duman ii yɛ ka duruki ba don ka yaalayaala ikomin mɔɔbailu. Ii ye a fɛ mɔɔilu ye ii fo jamama yɔrɔilu rɔ. 39 Ni ii donda salibon na, wala ni ii kilira dɔɔnnin diya, ii ye a fɛ ka ii sii mɔɔbailu la sii diyailu rɔ. 40 Ii ye cɛsamusoilu bolofenilu bɛɛ bɔla ii bolo. Ii ye mɛnna Alla matarala sa mɔɔilu ri ii yen ka ii bonya. Nba, Alla ri kiti labe ii kan, mɛn di juuya mɔɔ gbɛrɛilu ta ko.»

41 Isa ka a sii Alla batobonba jin kɔndɔ ka a ɲasin wodi bila diya la. Ka mɔɔilu to wodi bilala ye, a ka ii di ɲa ragbɛ. Nanfulutii siyaman ka wodi ba bila ye. 42 A ka muso fantan do fanan yen, mɛn cɛɛ sanin. Wo nara ka daɲa gbanan mɛsɛn fila bila wodi bila diya rɔ. Wodi wo ma siya fewu. 43 Isa ka a la karandenilu kili ka a fɔ ii yɛ ko: «N di tuɲa fɔ ai yɛ: muso fantan wo, mɛn cɛɛ sanin, a ra wodi mɛn bila wodi bila diya, wo ka bon tɔilu bɛɛ ta ri. 44 Baa ii bɛɛ ka dɔɔnin de bɔ ii la nanfulu rɔ ka wo di. Kɔni ka muso wo to fantanya rɔ, a ka a la wodi bɛɛ le di. Foyi ma to a bolo, hali a balo.»