1 Awa, Isa bɔra ye ka wa Jude mara rɔ Juridɛn Ba kɔma. Mɔɔ siyaman ba nara a tɛrɛn ye kokura. A ka a kɛ ii karan di ikomin a dorini a kɛla ɲa mɛn ma kɔrɔman.

2 Farisi doilu nara Isa tɛrɛn ye. Ii nara Isa kɔrɔbɔ kanma. Wo rɔ, ii ka a maɲininka ko: «A dahanin cɛɛ ye a muso bila wa?» 3 Isa ka ii jabi: «Musa ka ai jamari nfen na?» 4 Ii ka a fɔ ko: «Musa sɔnda cɛɛ ye furusa sɛbɛ rabɛn ka a muso bila.»

5 Isa ka a fɔ ko: «Ai ye mɔɔ muruntininilu le ri. Wo le ka a kɛ, Musa ka jamarili wo sɛbɛ ka a di ai ma. 6 Kɔni dunuɲa dantɔla, Alla ka cɛɛ ni muso dan. 7 Wo le kosɔn, cɛɛ ri mataa a fa ni a na la, ka to a muso fɛ. 8 Ii fila ri kɛ mɔɔ kelen di. Wo rɔ, ii tɛ jatela mɔɔ fila ri butun fɔɔ mɔɔ kelen. 9 Wo le kosɔn, Alla ka mɛnilu ladɛn ka ii kɛ kelen di, mɔɔ si kana woilu fara ka ii bɔ i ɲɔɔn na.»

10 Isa ni a la karandenilu donda bon kɔndɔ ikɔ tuun tuma mɛn na, karandenilu ka Isa maɲininka ko wo ma. 11 Isa ka a fɔ ii yɛ ko: «Ni mɔɔ mɛn ka a muso bila ka muso gbɛrɛ furu, wo tii ra kaninkɛ. A ra a muso fɔlɔ hakɛ ta. 12 Ni muso mɛn fanan ka a furusa a cɛɛ ma ka wa sii cɛɛ gbɛrɛ kun, muso wo ra kaninkɛ.»

13 Mɔɔ doilu tɛrɛ ye nala denilu ri Isa ma, sa a ri a bolo la ii kan ka duwa ii yɛ. Kɔni karandenilu jamanda mɔɔilu ma. 14 Isa ka wo yen tuma mɛn na, a mɔnɛra karandenilu kanma. A ka a fɔ ii yɛ ko: «Ai ye a to denilu ye na n ma. Ai kana ii ban, baa Alla la mansaya niiyɔrɔ ye ii ta le ri a ni mɛnilu ye fanan ikomin ɲinilu. 15 N di tuɲa fɔ ai yɛ: ni mɔɔ mɛn ti nala sɔnna Alla la mansaya ma ikomin dennin ye sɔnna ɲa mɛn ma, wo tii ti nala sela niiyɔrɔ sɔrɔnna Alla la mansaya rɔ muumɛ.» 16 Wo kɔ rɔ, a ka denilu ta ka ii mabɛrɛbɛrɛ ka a bolo la ii kan ka duwa ii yɛ.

17 Awa, Isa tamintɔla tuma mɛn na, cɛɛ do borimantɔ nara a ɲɔnkin a kɔrɔ ka a fɔ a yɛ ko: «Karanmɔɔ ɲuma, n ka kan ka nfen kɛ, sa n di ɲenemaya banbali sɔrɔn?» 18 Isa ka a jabi: «Nfenna i kan n ma ko karanmɔɔ ɲuma? Mɔɔ ɲuma si tɛ ye. Alla kelen pe le ka ɲin. 19 I ka Alla la sariyailu lɔn, mɛnilu ye a fɔla ko: ‹I kana mɔɔ faa, i kana kaninkɛ, i kana suɲali kɛ, i kana kɛ sere juu ri, i kana mɔɔ tɔɲɔ, i ye i fa ni i na bonya.›» 20 Cɛɛ ka a fɔ ko: «Karanmɔɔ, n ka woilu bɛɛ labato kɛbi n denninya tumana.» 21 Isa ka a ragbɛ. A diyara Isa yɛ. A ka a fɔ a yɛ ko: «Ko kelen dɛsɛnin i ma fɔlɔ. Wa i bolofenilu bɛɛ fɛrɛ ka a wodi ratala fantanilu tɛma. Wo rɔ, nanfulu ba ri kɛ i bolo sankolo rɔ. Wo kɔ rɔ, i ye na i bila n kɔfɛ.» 22 Kuma wo ka cɛɛ jusu tɔrɔ kosɛbɛ. A niilafinnin wulira ka wa, baa a bolofen ka siya.

23 Wo kɛnin, Isa ka a kɔfɛnɛ ka a fɔ a la karandenilu yɛ ko: «Nanfulutii don Alla la mansaya rɔ, wo gbɛlɛnman de!» 24 Kuma wo ka karandenilu kabannakoya. Kɔni Isa ka a fɔ ii yɛ ikɔ tuun ko: «N denilu, ka don Alla la mansaya rɔ, wo gbɛlɛnman de! 25 Ɲɔɔmɛ don duman sɛlan woo la ka tamin nanfulutii don ko rɔ Alla la mansaya rɔ.» 26 Karandenilu kabannakoyara ikɔ tuun fɔɔ ka a dan natamin. Ii tɛrɛ a fɔla i ɲɔɔn yɛ ko: «Yon di se kisila wo rɔ sa?» 27 Isa ka ii ragbɛ ka a fɔ ii yɛ ko: «Mɔɔ ti se wo kɛla, kɔni Alla ri se; baa Alla ri se ko bɛɛ kɛla.»

28 Wo rɔ, Piyɛri ka a fɔ Isa yɛ ko: «Andeilu don? Andeilu ra fen bɛɛ to ye ka an bila i kɔfɛ.» 29 Isa ka a jabi: «N di tuɲa fɔ ai yɛ: ni mɔɔ mɛn ka a la bon to ye, wala a dɔɔilu ni a kɔrɔilu, wala a na, wala a fa, wala a denilu, wala a la sɛnɛ, nde la ko kosɔn, a ni kibaro ɲuma la ko kosɔn, 30 wo tii ri woilu ɲɔɔn kɛmɛ (100) sɔrɔn dunuɲa ɲin dɔ yan. A ri bonilu sɔrɔn, a ni dɔɔilu ni kɔrɔilu ni nailu ni denilu ni sɛnɛilu. A ri magbɔya fanan sɔrɔn. Sininnatɔ, a ri ɲenemaya banbali fanan sɔrɔn. 31 Kɔni ɲɛmɔɔ siyaman di kɛ kɔmɔɔilu ri. Kɔmɔɔ siyaman di kɛ ɲɛmɔɔilu ri fanan.»

32 Isa ni a la karandenilu tɛrɛ ye sila kan, ii watɔ Jerusalɛmu. Isa tɛrɛ ye ɲɛfɛ. A la karandenilu kabannakoyara. Mɔɔ mɛnilu tɛrɛ ye ii kɔ, woilu silannin tɛrɛ. Isa ka a la talibidenba tan ni fila ta ka wa ii ri ii dan na ikɔ tuun. Ko mɛn kɛtɔ a sɔrɔnna, a ka wo fɔ ii yɛ. 33 «Ai tolo malɔ, an watɔ Jerusalɛmu. Mɔɔ Dencɛ ri don Alla la sarakalasela kuntiilu ni sariya karanmɔɔilu bolo. Woilu ri kiti labe a kan a ka kan ka faa. Ii ri a don siya gbɛrɛ mɔɔilu bolo. 34 Woilu ri a lafɛya, ka ii daji kɛ a kan, ka a gbasi gbiɲɛ la, ka a faa. Kɔni tele sawanan tamin kɔ, a ri wuli ikɔ tuun.»

35 Wo kɔ rɔ, Yakuba ni Yuhana, Sebede dencɛ fila, ka ii madon Isa la ka a fɔ a yɛ ko: «Karanmɔɔ, an wa i tara mɛn na, an ye a fɛ i ye wo kɛ an yɛ.» 36 Isa ka a fɔ ko: «Ai ye a fɛ n ye nfen kɛ ai yɛ?» 37 Ii ka a jabi: «I wa kɛ mansa gbiliyanin di, i ye a to an mɔɔ kelen ye a sii i bolokinin ma, do ri a sii i bolomaran ma.» 38 Kɔni Isa ka ii jabi: «Ai ye ko mɛn tarala, ai ma wo kɔrɔ lɔn. Tɔrɔya mɛn kɛtɔ n sɔrɔnna, ai ri se wo muɲunna wa? N di sun tɔrɔya rɔ ikomin mɔɔilu ye sunna ji rɔ ɲa mɛn ma. Ai ri se sunna wo ɲa ma wa?» 39 Ii ka a fɔ ko: «An di se a kɔrɔ.» Isa ka a fɔ ko: «N di sɔn tɔrɔya mɛn ma, ai fanan di sɔn wo ma. N di sun tɔrɔya rɔ ɲa mɛn ma, ai fanan di sun ten. 40 Kɔni sii diya mɛnilu ye n bolokinin ni n bolomaran ma, nde ti woilu diba ri. Alla ka sii diya woilu rabɛn mɔɔ mɛnilu yɛ, a ri ii di woilu ma.»

41 Talibiden tɔ tan ka kuma wo mɛn tuma mɛn na, woilu mɔnɛra Yakuba ni Yuhana kanma. 42 Wo rɔ, Isa ka ii kili, a ka a fɔ ii yɛ ko: «Ai ka a lɔn ko mɔɔilu ye mɛnilu jatela jamana mansailu ri, woilu le ye kuntiiya kɛla ii la jamanadenilu kan diyagboya la. Jamana mɔɔbailu ri fanka la jamanadenilu kan. 43 Kɔni a ma kan ka kɛ ten ai tɛma. Mɛn ye a fɛ ka kɛ mɔɔba ri ai rɔ, wo tii ka kan ka kɛ ai la baaraden di. 44 Mɛn ye a fɛ ka kɛ ai rɔ ɲɛmɔɔ ri, wo tii ye kɛ ai bɛɛ la jɔn di. 45 Baa Mɔɔ Dencɛ ma na dunuɲa rɔ ko mɔɔilu ye baara kɛ a yɛ. A jɛrɛ nara baara kan de ma, a ni ka a nii di ka kɛ mɔɔ siyaman kunka sara ri.»

46 Wo kɔ rɔ, Isa ni a la karandenilu sera Jeriko so kɔndɔ. Ii ni jama ba bɔtɔla so kɔndɔ, ɲa funyen do siinin sila da la ka tarali kɛ. Wo tɔɔ ko Baritime. A fa tɔɔ ko Time. 47 A ka a mɛn mɛn kɛ ko Isa Nasarɛtika le taminna, a ka a kan nabɔ damira ko: «Isa, Dawuda dencɛ, i ye kininkinin n ma.» 48 Mɔɔ siyaman ka a makuma ko: «I makun.» Kɔni a ka a kan nabɔ ka tamin fɔlɔmanna ka a fɔ ko: «Dawuda dencɛ, i ye kininkinin n ma.»

49 Isa ka a lɔ ka a fɔ ko: «Ai ye a kili.» Mɔɔilu wara ɲa funyen kili ko: «I jusulatɛɛ. I wuli. Isa ye i kilila.»

50 Wo rɔ, cɛɛ ka a la durukiba lafili duu ma ka a wuli i kɔrɔkɔrɔ, ka wa Isa tɛrɛn ye. 51 Isa ka a maɲininka ko: «I ye a fɛ n ye nfen de kɛ i yɛ?» Cɛɛ ka a fɔ ko: «Karanmɔɔ, n ye a fɛ i ye n ɲa laka.» 52 Isa ka a fɔ ko: «Wa. I la lemɛniya ra i lakɛndɛya.» A ɲa lakara i kɔrɔ. A ka a bila Isa kɔfɛ.