1 Farisiilu ni sariya karanmɔɔ doilu mɛn bɔra Jerusalɛmu, woilu nara ii ladɛn Isa laminin dɔ. 2 Ii ka a yen ko a la karanden doilu ye dɔɔnnin kɛla, ka a tɛrɛn ii bolo *lakɔsɔnnin, ii ma woilu lako ikomin ii la namun kɛɲa.

3 Baa Farisiilu ni Judiya tɔilu ti sɔnna ka dɔɔnnin kɛ na ii ma ii boloilu lako koɲuma ka a bɛn ii benbailu la namun ma. 4 Ii wa bɔ lɔɔfɛ rɔ, ii tɛ dɔɔnnin kɛla na ii ma ii ko fɔlɔ. Ii ye namun gbɛrɛ siyaman ba labatola, misaliya rɔ ye ii la jilafɛ mɛsɛnilu ni jilafɛ bailu a ni nɛɛdaailu fanan dakola.

5 Wo rɔ, Farisiilu ni sariya karanmɔɔilu ka Isa maɲininka ko: «Nfenna i la karandenilu tɛ an benbailu la namun nabatola? Nfenna ii ye dɔɔnnin kɛla ka a tɛrɛn ii ma ii bolo lako fɔlɔ?» 6 Isa ka ii jabi: «Ai jɛrɛmayuwailu, Esayi ka mɛn fɔ ai la ko rɔ fɔlɔfɔlɔ, wo bɛnnin kosɛbɛ. Baa a ka Alla kan sɛbɛ ko:

«‹Mɔɔ ɲinilu ye n bonyala ii da le la,

kɔni ii jusukun ma senin nde la muumɛ!

7 Ii ye n batola fuu.

Ii ye mɔɔilu karanna mɛnilu la,

woilu tɛ foyi ri fɔɔ adamadenilu la jamariliilu.›

8 «Ai ra Alla la jamariliilu to ye, ka mɔɔilu la namunilu labato.»

9 A ka a fɔ ii yɛ ko: «Ai kiyanin, baa ai bannin Alla la jamariliilu ma, sa ai ri to ai la namunilu kan. 10 Musa ka a fɔ ko: ‹I fa ni i na bonya.*› Ko: ‹Ni mɔɔ mɛn ka kuma juu fɔ a fa ma, wala a na, wo tii ka kan de ka faa*.› 11 Kɔni ai ka a fɔ ko mɔɔ ri se a fɔla a fa wala a na yɛ ko: ‹I ka kan ka dɛmɛnfen mɛn sɔrɔn n bolo, wo ra kɛ Kɔrɔban di.› (Wo kɔrɔ le ko ‹n da wo bila a dan na Alla yɛ.›) 12 Ni a ka wo le fɔ, ai ti sɔnna butun a ye a sɔrɔnbailu dɛmɛn. 13 Wo bolo ma, ai ka namun mɛnilu sɔrɔn ai benbailu la, ai ye woilu kɛla ka ii bila Alla la kuma nɔ rɔ. Ai ye wo ɲɔɔn ko siyaman fanan kɛla.»

14 Wo kɔ rɔ, Isa ka jama kili ikɔ tuun, ka a fɔ ii yɛ ko: «Ai bɛɛ ye ai tolo malɔ n na kuma la ka a famun. 15 Mɔɔ ye fen fen donna a da rɔ ka a dɔɔn, wo si ti se mɔɔ nɔɔla. Kɔni fen mɛnilu ye bɔla mɔɔ rɔ, wo le ye mɔɔ nɔɔla.» 16 * 17 Isa bɔra jama fɛ ka wa don bon kɔndɔ tuma mɛn na, a la karandenilu ka a maɲininka kuma kɔrɔlama wo kɔrɔ ma. 18 A ka a fɔ ii yɛ ko: «A ye di? Ai fanan ma se ko ɲayenna wa? Ai ma a ɲayen wa ko fen mɛn ye donna mɔɔ kɔndɔ, wo ti se a tii nɔɔla? 19 Baa dɔɔnnifen si tɛ donna mɔɔ jusukun dɔ fɔɔ a kɔnɔ le. A tii wa wa kɔkan, fen woilu ri bɔ.» Nba, Isa ka a yiraka wo rɔ ko dɔɔnnifen bɛɛ ri se dɔɔnna.

20 A ka a fɔ ii yɛ fanan ko: «Fen mɛnilu ye bɔla mɔɔ rɔ, wo le ye a nɔɔla. 21 Baa miriya juuilu le ye bɔla mɔɔ jusukun dɔ, ikomin jalonya, suɲali, mɔɔfaa, 22 kaninkɛ, natabaya, juuya, mɔɔ lafili, jamuruya, keleya, mɔɔ tɔɔtiɲan, jɛrɛbonya, a ni hankilitanya koilu. 23 Juuya woilu bɛɛ ye bɔla mɔɔ jusukun dɔ. Ii bɛɛ le ye mɔɔ nɔɔla.»

24 Wo kɔ rɔ, Isa bɔra Judiyailu la jamana rɔ ye ka wa Tiri mara rɔ. A senin mɛn kɛ ye, a donda mɔɔ do wara. A tun tɛ a fɛ mɔɔ si ye a lɔn ko a ye ye. Kɔni wo bɛɛ ni a ta, wo ko fɔra. 25 Muso do tɛrɛ ye ye, jena ye a denmuso fɛ. Muso wo ka Isa na ko mɛn tuma mɛn na, a nara Isa tɛrɛn ye i kɔrɔ ka a be a sen kɔrɔ. 26 Muso wo ye Kirɛkika le ri, a sɔrɔnda Siri Fenisi jamana kɔndɔ. Nba, a ka Isa madiya bakɛ ko a ye jena gbɛn ka a bɔ a denmuso fɛ. 27 Kɔni Isa ka a jabi sanda rɔ ko: «A to denilu ye dɔɔnnin kɛ fɔlɔ ka fa. Baa ka denilu la dɔɔnnin ta ka a lafili wuluniilu kɔrɔ, wo ma ɲin.» 28 Muso ka a jabi: «Maari, tuɲa le wo ri. Kɔni denilu wa kɛ dɔɔnninna, dɔɔnnin buruburu mɛn ye bela duu ma tabali kɔrɔ, wuluniilu ye wo le dɔɔnna.» 29 Isa ka a fɔ a yɛ ko: «I la jabili ɲin kosɔn, i ye wa i wara. Jena ra bɔ i denmuso fɛ.» 30 Muso wara a wara, ka a den lanin tɛrɛn lafen kan, jena ra bɔ a fɛ.

31 Nba, Isa bɔra Tiri mara rɔ ka tamin Sidɔn so kɔndɔ, ka bɔ ye ka Dɛkapɔli mara rasan ka wa Kalile Dala fan fɛ. 32 Mɔɔ doilu nara cɛɛ do malɔ Isa ma ye. Cɛɛ wo tolo gbɛdɛnnin. Kuma fanan gbɛlɛnman a ma kosɛbɛ. Ii ka Isa madiya ko a ye a bolo la cɛɛ wo kan ka a lakɛndɛya. 33 Isa wara cɛɛ ri a dan na, ka a mabɔ jama la. A ka a bolokoyinilu don cɛɛ tolo woilu rɔ, ka ban ka a daji tu ka wo kɛ cɛɛ nɛn ma. 34 Wo kɔ rɔ, a ka a ɲakɔrɔta san ma ka a nilakili lajii bakɛ ka a fɔ ii la kan dɔ ko: «Efata.» Wo kɔrɔ le ko: «i ye laka!»

35 Cɛɛ tolo fila bɛɛ lakara i kɔrɔ. A nɛnjuilu fulɛnda, a sera kumala koɲuma. 36 Isa ka a fɔ mɔɔilu yɛ ka a magbɛlɛnya ko ii kana ko wo fɔ mɔɔ si yɛ. Wo bɛɛ ni a ta, hali ni a ka ii da matintin ko tan, ii ma wo lase boloka muumɛ. 37 Mɔɔ woilu kabannakoyara fɔɔ ka a dan natamin. Ii tɛrɛ ye a fɔla ko: «A ye ko ko kɛla, wo bɛɛ ka ɲin. A ye tologbedenilu tolo lakala, ka a kɛ boboilu ye kumala fanan!»