1 Lookun tele fɔlɔ, lahadi lon kɔnin, Mariyamu Makidalaka wara su ba dibi pulan pulan ma kaburu da la. A ka a yen kabakudun bɔni kaburu da la. 2 A ka ibori ka wa Simɔn Piyɛri tɛrɛn a ni karanden do mɛn diyara Isa yɛ, ka a fɔ ii yɛ ko: «Ii ra Maari su bɔ kaburu kɔndɔ. An ma a lɔn fewu, ii ka a lala yɔrɔ mɛn dɔ!» 3 Piyɛri ni karanden wo bɔra ka wa kaburu da la. 4 Ii fila bɛɛ borimantɔ wara i ɲɔɔn fɛ. Kɔni karanden wo tɛrɛ ye borila Piyɛri ko: a fɔlɔ sera kaburu da la. 5 A ka a mabirin ka a ɲa mala kaburu kɔndɔ a ka kansankɛ le dɔrɔn yen, kɔni a ma don. 6 Simɔn Piyɛri, mɛn tɛrɛ ye a kɔfɛ, wo fanan nara. A donda kaburu kɔndɔ, ka kansankɛ yen lani ye. 7 Bitiran mɛn tɛrɛ ye Isa kun na wo ni kansankɛ lani tɛrɛ yɔrɔ kelen, kɔni bitiran tɛrɛ ra kunbɛnni ka a la a ta fan ma. 8 Awa, karanden mɛn fɔlɔ sera kaburu da la, wo fanan donda kaburu kɔndɔ. A ka a yen ka la a la ko Isa ra wuli. 9 Baa ii tɛrɛ ma sɛbɛli kuma wo ɲayen fɔlɔ, ikomin a tɛrɛ sɛbɛni ɲa mɛn ma ko Isa ri wuli ka bɔ suilu tɛma.

10 Wo kɔrɔ, karanden fila ka i kɔsɛ ii wara. 11 Waati wo rɔ Mariyamu tɛrɛ ye kasila kaburu da la. A ye kasila ka a ɲa mala kaburu kɔndɔ. 12 A ka mɛlɛka fila yen a bɛɛ gbɛni, woilu siini tɛrɛ Isa su lani tɛrɛ dinkira mɛn dɔ kaburu kɔndɔ. Do siini a kun kɔrɔ, do siini a sen kɔrɔ. 13 Ii ka a fɔ a yɛ ko: «Muso, i ye kasila nfenna?» A ka a jabi: «Ka a masɔrɔn ii ra Maari su ta ka wa a ri, n ma a lɔn a ye yɔrɔ mɛn dɔ.» 14 A banni wo fɔla, a ka a tintan ɲa mɛn dɔ ka Isa yen, kɔni a tɛrɛ ma a lɔn ni Isa le. 15 Isa ka a fɔ a yɛ ko: «Muso, i ye kasila nfenna? I ye yon ɲininna?» A tɛrɛ ye muso ɲana ikomin jiritu kandanna le, a ka a fɔ ko: «N fa, ni ile le ka a su ta ka wa a ri, a fɔ n yɛ i ka a la yɔrɔ mɛn dɔ, n ye wa a ta.» 16 Isa ka a fɔ a yɛ ko: «Mariyamu!» A ka a ɲa tintan a la, ka a tuwa Heburu kan dɔ ko: «Rabuni» Wo kɔrɔ ye ko Karanmɔɔ. 17 Isa ka a jabi: «I kana ifasa n ma, baa n ma yɛlɛ fɔlɔ n Fa ma. Kɔni wa a fɔ n badenmailu yɛ ko: ‹N watɔ n Fa ma, a ni ai Fa fanan ma, n na Alla ma, a ni ai fanan na Alla ma.›» 18 Mariyamu Makidalaka nara a fɔ karandenilu yɛ ko: «N da Maari yen!» A ka dantɛɛli kɛ ii yɛ a ka mɛn fɔ a yɛ.

19 Lookun lon fɔlɔman kelen wo wura la, karandenilu tɛrɛ ye bon do kɔndɔ, da sɔɔni ii ma ka a masɔrɔn ii silanni Judiyailu ɲɛmɔɔilu ɲɔ rɔ. Isa bɔra gbɛ rɔ ka na i lɔ ii tɛma ka a fɔ ii yɛ ko: «Alla ye ai jususuma!» 20 A ka a fɔ waati mɛn na, a ka a bolo yiraka ii la a ni a barasa. Karandenilu sawa ba kɛra ka a masɔrɔn ii ra Maari yen. 21 Isa ka a fɔ ii yɛ fanan ko: «Alla ye jususuma di ai ma! Ikomin n Fa ka n kelaya ɲa mɛn ma, nde fanan di aile kelaya wo ɲa ma.» 22 A banni kuma wo fɔla a ka fɔɲɔ fɛ ai ma ka a fɔ ko: «Ai ye Nii Sɛniman sɔrɔn. 23 Ni ai ka mɔɔ makoto a la julumun na, wo tii makotoni Alla bolo. Kɔni ni ai ma mɛn makoto, wo tii tɛ makotoni Alla bolo.»

24 Nba, Tomasi ye Isa la karanden tan ni fila do le ri, mɔɔilu ye a fɔla mɛn ma ko Filani. Isa nara a lɔ a la karandenilu tɛma tuma mɛn na, Tomasi tun tɛ ye. 25 Karandenilu ka a fɔ a yɛ ko: «An da Maari yen!» Kɔni a ka ii jabi: «Na n ma poyinti nɔ yen a bolo rɔ, ni n ma n bolokoyini la poyinti nɔ ma, ni n ma n bolo la a barasa kɔndɔ, n ti nala lala a la fewu.»

26 Lookun kelen tamin kɔ rɔ, karandenilu ka ii ladɛn kokura bon na. Ii la ladɛn wo rɔ, Tomasi tɛrɛ ye ii tɛma. Ii tɛrɛ ra da sɔɔ. Isa nara ka i lɔ ii tɛma ka a fɔ ii yɛ ko: «Alla ye jususuma di ai ma!» 27 A ka a fɔ Tomasi yɛ ko: «I bolokoyini laa n bolo ma, i ye n bolo yen; i bolo laa n barasa ma. I kana to lemɛniyabaliya rɔ, kɔni lemɛniya.» 28 Tomasi ka a jabi: «N Maari, a ni n na Alla!» 29 Isa ka a fɔ a yɛ ko: «Ka a masɔrɔn i ra n yen, wo le ka i lemɛniya n ma. Duwawu ye ii yɛ mɛnilu ma n yen a ni mɛnilu lemɛniyara n ma.»

30 Isa ka kabannako siyaman kɛ a la karandenilu ɲakɔrɔ mɛn sɛbɛni tɛ kitabu ɲin kɔndɔ. 31 Kɔni, ɲin bɛɛ tɛrɛ sɛbɛni de sani ai ye lemɛniya Isa ma waati mɛn ko Ɲenematɔmɔnin de, a ni ale le ye Alla Dencɛ ri. Ai wa lemɛniya a ma, ai ri ɲenemaya banbali sɔrɔn ale tɔɔ rɔ.