1 Wo rɔ Pilate ka Isa don tɛsidi bolo ka a gbasi gbiɲɛ la. 2 Tɛsidiilu ka nɔnbɔwɔninma ta ka a mɔrɔmɔrɔ i ɲɔɔn ma ka a kɛ mansa fula munuɲa do ri ka wo birin a kun na, a ni ii ka durukiba wulenman ɲalagbɛ do bila a kan na. 3 Ii tora ii madonna a la ka a fɔ a yɛ ko: «Judiyailu la mansa, i ni kɛ!» Ii tora a da gbasila.

4 Pilate bɔra kokura ka a fɔ Judiyailu yɛ ko: «Ai ɲa lɔ! N da na a ri ai ma, sa ai ri a lɔn ko n ma kojuu si yen cɛɛ ɲin na mɛn di kɛ a faa ko ri.» 5 Isa bɔra kɛnɛma. Nɔnbɔ wɔninnama mansa fula birinni a kun na, durukiba wulenman ɲalagbɛ ye a kan na. Pilate ka a fɔ ii yɛ ko: «Ai ɲa lɔ! Cɛɛ ye yan!» 6 Ii ka a yen mɛn kɛ sarakalasela kuntiilu ni lakandanilailu ka wɔyɔwɔyɔ kɛ: «Ka a gbɔngbɔn jiri kan! Ka a gbɔngbɔn jiri kan!» Pilate ka a fɔ ii yɛ ko: «Aile ye a ta aile jɛrɛ yɛ, ai ye a gbɔngbɔn jiri kan, baa nde ma sariya yen mɛn di kɛ a faa ko ri.» 7 Judiyailu ka a jabi: «Sariya kelen ye an bolo wo le a faa ko ri a don ka kan de ka faa, ka a masɔrɔn a ka a fɔ ko a ye Alla dencɛ ri.»

8 Pilate ka kuma wo mɛn tuma mɛn na, do lara a la silan kan. 9 A donda a la mansa bolon na ka a fɔ Isa yɛ ko: «I bɔnin min?» Kɔni Isa ma a jabi. 10 Pilate ka a fɔ a yɛ ko: «I ti kumala nde yɛ? I ma a lɔn ko se ye n yɛ ka i bila? Se ye n bolo ka i gbɔngbɔn jiri kan fanan?» 11 Isa ka a jabi: «Se foyi tɛ i yɛ n kan fɔɔ mɛn bɔni Alla bolo. Wo le rɔ, mɛn ka n don i bolo, wo la kojuu ka bon i ta ri.»

12 Pilate ka wo mɛn tuma mɛn na, a ka Isa bila ɲa ɲinin, kɔni Judiyailu ka ii mankan ba labɔ ko: «Ni i ka a bila, i ti Sesare duɲɔɔ ri. Baa mɔɔ mɛn wa a jɛrɛ kɛ mansa ri, wo tii muruntini Sesari kanma.» 13 A ka kuma wo mɛn tuma mɛn na, Pilate bɔra Isa ri gbɛ ma ka wa a jɛrɛ sii kiti diya, yɔrɔ wo tɔɔ le ko Kabakuru Yɔrɔ, Heburu kan dɔ ko Kabata. 14 Taminkunna Sali dɔɔnninta rabɛn lon de tɛrɛ, teletala, Pilate ka a fɔ Judiyailu yɛ ko: «I ɲa lɔ! Ai la mansa ye yan!» 15 Kɔni ii ka ii mankan nabɔ ko: «Ka a faa! Ka a faa! A ye a gbɔngbɔn jiri kan!» Pilate ka a fɔ ii yɛ ko: «Nde ye ai la mansa gbɔngbɔn jiri kan wa?» Sarakalasela kuntiilu ka a jabi: «Mansa si tɛ an kun na fo mansaba Sesari.» 16 Wo rɔ Pilate ka Isa bila ii bolo a gbɔngbɔn ko rɔ jiri kan kan.

Wo rɔ ii ka Isa mira. 17 A jɛrɛ ka gbɔngbɔn jiri ta, ka wa a ri yɔrɔ mɛn tɔɔ ko Kunkolo. Heburu kan dɔ ii ye a fɔla yɔrɔ wo ma ko Kɔlikota. 18 Ii ye a gbɔngbɔnna jiri kan ye le, a ni mɔɔ fila, do ye a bolokinin ma do ye a bolomaran ma; Isa ye ii tɛma. 19 Pilate ka sɛbɛli kɛ ka wo gbɔngbɔn Isa gbɔngbɔn jiri kan. A tɛrɛ sɛbɛni ko: «Isa Nasarɛtika, Judiyailu la mansa.» 20 Judiyailu siyaman ba le ka sɛbɛ wo karan, ka a masɔrɔn Isa gbɔngbɔnni jiri kan yɔrɔ mɛn dɔ wo ni so tɛma ma jan. Sɛbɛli tɛrɛ ye Heburu kan dɔ, a ni Romu kan dɔ, a ni fanan Kirɛki kan dɔ. 21 Sarakalasela kuntiilu ka a fɔ Pilate yɛ ko: «I kana a sɛbɛ ko: ‹Judiyailu la mansa›, kɔni ‹A ka a fɔ ko: Nde ye Judiyailu la mansa le ri.›» 22 Pilate ka a jabi: «N ka mɛn sɛbɛ, n da ban a sɛbɛla.»

23 Tɛsidiilu ban mɛn kɛra Isa gbɔngbɔnna jiri kan, ka a la faanin ta, ii ka wo ratala sidiyama naanin, tɛsidi bɛɛ ni a ta fan. Ii ka a la duruki kɔrɔbila fanan ta. Duruki kɔrɔbila wo karasila tɛrɛ sa a la, ka a bɔ a sanma fɔɔ a duuma. 24 Ii ka a fɔ i ɲɔɔn yɛ ko: «An kana a rafara, kɔni an ye kalabe kɛ, kala wa mɛn mira wo ri a sɔrɔn.» Wo rɔ sɛbɛli kuma wo ra dafa: «*Ii ra n na faanin ratala i ɲɔɔn na, ii ra kalabe kɛ n na faanin ɲuma la ko rɔ.» Awa tɛsidiilu ka wo le kɛ.

25 Isa la gbɔngbɔn jiri tɔrɔfɛ a na ni a na kɔrɔmuso tɛrɛ ye ye, a ni Kɔlɔpasi la muso Mariyamu ni Mariyamu Makidalaka. 26 Isa la karanden mɛn duman a yɛ kosɛbɛ, wo lɔni tɛrɛ Isa na dafɛ ye. Isa ka wo fila yen tuma mɛn na, a ka a fɔ a na yɛ ko: «Muso, i ɲa lɔ, i dencɛ le ɲin di.» 27 A ka a fɔ a la karanden fanan yɛ ko: «I ɲa lɔ, i na le ɲin di!» Waati kelen wo rɔ karanden wo ka Isa na ta ka wa a ri a la lu ma.

28 Wo taminnin kɔ rɔ, Isa ka a lɔn ko ko bɛɛ ra dafa, a ka a fɔ sani sɛbɛli kuma wo ye dafa, ko: «Ji lɔɔ ye n na.» 29 Ji fɔrɔkɔ do tɛrɛ ye, fanin rɛsɛnji tintiriɲanin. Do ka fuu ta ka a sun rɛsɛnji wo rɔ ka a sidi hisope jiri bolon do la ka a madon a da la. 30 Isa ka rɛsɛnji tintiriɲanin wo sɔrɔn tuma mɛn na, a ka a fɔ ko: «Ko bɛɛ ra dafa.» A ka a kun najii ka a nii di ka sa.

31 Ikomin Ɲɔɲɔ Lon, su kana to jiri kan, a ni sali dakɔrɔla le tɛrɛ ye, baa Ɲɔɲɔ Lon wo ye lon ba le ri, Judiyailu ka a fɔ Pilate yɛ ko a ye sɔn mɔɔ gbɔngbɔnnilu senilu ye rakadi, kosa ii ri faa jonna. Wo rɔ ii ri se lajiila ka bɔ jiri kan. 32 Tɛsidiilu wara ii sen dakadi kanma. Mɔɔ fila mɛnilu gbɔngbɔnni Isa dafɛ, tɛsidiilu ka woilu fɔlɔman sen dakadi, ka ban ka a filanan sen dakadi. 33 Ii se mɛn kɛni Isa ma, ii ka a yen a ra sa, wo rɔ ii ma a sen kadi. 34 Kɔni tɛsidi kelen tɛrɛ ye ye mɛn ka a sɔɔ tanba la a barasa rɔ. Wo ɲa ma ji ni jeli bɔra i kɔrɔkɔrɔ. 35 Mɛn ka a yen wo kɛra a la sereya ri. A la sereya ye tuɲa le ri. Ale ka a lɔn ko a ye tuɲa le fɔla. A ka sereya mɛn bɔ sa ai fanan di lemɛniya Isa ma. 36 Wo bɛɛ kɛra le sa sɛbɛli kuma ri dafa ko: «A kolo si kana kadi.» 37 Wo fanan ko rɔ, sɛbɛli kuma do ko: «Ii ri mɔɔ ragbɛ mɛn ka a sɔɔ.»

38 Wo ban kɔ, Yusufu Arimateka, wara Pilate madiya ko a ni Isa su bɔ jiri kan. Pilate sɔnda wo ma. A nara Isa su lajii. Awa, Yusufu Arimateka tɛrɛ ye Isa la karanden do le ri sutura rɔ, baa a tɛrɛ silanni Judiyailu ɲɔ rɔ. 39 A ni Nikodɛmu nara. Wo le fɔlɔfɔlɔ ka Isa ɲinin su rɔ. A nara latikɔlɔn sumaduman kilo bisawa ni naanin (34), su fila ri: Do tɔɔ ko muri, a to kelen tɔɔ ko alo. 40 Ii fila ka Isa su ta, ka a don kansankɛ rɔ a ni latikɔlɔn sumaduman ka bɛn Judiyailu la su don ɲa namun ma. 41 Awa a gbɔngbɔnda jiri kan yɔrɔ mɛn dɔ jiritu do tɛrɛ ye ye. Jiritu wo rɔ ye, kaburu kura do tɛrɛ ye, mɔɔ si su tɛrɛ ma don wo rɔ fɔlɔ. 42 Judiyailu ɲɔɲɔ lon dabɛn waati tɛrɛ ra se. Kaburu tɛrɛ madonni ii la fanan. Wo rɔ ii ka Isa su don ye.