1 «N ye rɛsɛn nɔnbɔju ɲuma le ri, n Fa le sɛnɛla ri. 2 Bolon bolon ye n na, ni wo ma den kɛ a la, a ri a tɛɛ. Bolon bolon wa den kɛ a la, a ri wo matɛɛ sa a ri den siyaman kɛ ka tamin fɔlɔman kan. 3 Aile le ra ladaha sisɛn ka fara n na kuma la. 4 Ai ye banban n ma, n fanan banbannin ai ma. Ikomin nɔnbɔbolon ti a den kɛla a jɛrɛ ma, ni a ti banbannin nɔnbɔju ma, wo ɲa kelen ma aile fanan ti se ai denna ai jɛrɛ yɛ na aile ma banbannin nde ma.

5 «N ye nɔnbɔju le ri, ai ye nɔnbɔbolon de ri. Mɛn wa banban n ma, a ni nde wa banban mɛn ma, wo ri a den bakɛ a la, baa ni nde tɛ, ai ti se foyi kɛla. 6 Ni mɔɔ mɔɔ ma banban n ma woilu tii ri fili kɔma ikomin nɔnbɔbolon wa tɛɛla, woilu ri ja ɲa mɛn ma. Wo bolonilu ri matɔmɔ ka bila ta rɔ ka janin. 7 Kɔni ni aile banbannin tora n ma, a ni n kumakan fanan banbannin tora ai ma, ai wa fen fen maɲininka n tɔɔ rɔ, bɛɛ ri kɛ ai yɛ. 8 Ko mɛn ye N Fa gbiliyala, ai wa den siyaman ba kɛ ka wo yiraka wo rɔ ai ye n na karandenilu le ri.

9 «Ikomin n Fa Alla ye n kaninna ɲa mɛn ma, nde fanan da ai kanin wo ɲa ma. Ai ye to n na kaninteya rɔ. 10 Ni ai ka n na jamarili bonya, ai ye to n na kaninteya rɔ, ikomin nde fanan ye n Fa la jamarili bonyala, n ye a la diyaɲɛ wo le rɔ. 11 N tɛrɛ ra wo bɛɛ ɲafɔ, ko sɛwa mɛn ye n dɔ, sa wo ɲɔɔn di kɛ ai rɔ, ai la sɛwa ri kɛ sɛwa dafanin di. 12 N na jamarili ye mɛn di: ai ye diya ai ɲɔɔn yɛ ikomin ai diyani n yɛ ɲa mɛn ma. 13 Mɔɔ mɛn ka a nii di ka sa a duɲɔɔ kosɔn kaninteya si ti tamin wo la. 14 Ai ye n duɲɔɔ le ri, ni ai ka n na jamarili kɛ. 15 N tɛ ai kilila butun ko n na baaraden, ka a masɔrɔn baaraden ma a lɔn baaratii ye mɛn kɛla. N ye ai kilila le ko n duɲɔɔ ka a masɔrɔn n Fa ka n karan fen fen ma, n ka ai lalɔnni wo bɛɛ la. 16 Aile ma n suwandi, kɔni nde ka ai suwandi. N da aile lɔ kelala ka wa a den, den mɛn di mɛn a la, kosa n Fa ri sɔn ai ma a wa foyi maɲininka n tɔɔ rɔ. 17 N ye jamarili ɲinilu dila ai ma kosa ai ri ai ɲɔɔn kanin.

18 «Ni ai gboyara dunuɲa yɛ ai ye a lɔn ko nde le fɔlɔ gboyara a yɛ. 19 Ni ai ni dunuɲa ye kelen de ri, ai ri diya dunuɲa yɛ, baa ai ye dunuɲa ta le ri. Kɔni, ka a masɔrɔn ai tɛ dunuɲa ta ri, a ni n ka ai suwandi dunuɲa tɛma, wo le rɔ ai gboyara dunuɲa yɛ. 20 Ai ye hankili bila n ka mɛn fɔ ai yɛ ko: ‹Baaraden ma bon a baaratii ri›. Ni ii ka n tɔrɔ, ii ri ai fanan tɔrɔya. Ni ii ka n kumakan namɛn ka a lamara, ii ri ai la kumakan namɛn ka a lamara. 21 Kɔni, ko wo bɛɛ ye kɛla ai la n tɔɔ la ko le rɔ, ka a masɔrɔn mɛn ka n kelaya, ii ma wo lɔn. 22 Ni n tɛrɛ ma na a ni n ma kuma, julumun tɛrɛ ti ii yɛ. Kɔni sisɛn, julumun ye ii yɛ. 23 Mɔɔ mɛn ye nde nagboyaɲɛla, wo tii ra n Fa Alla fanan nagboyaɲɛ. 24 Ni n ma kabannakoilu baara kɛ ii ɲana mɔɔ gbɛrɛ ma se mɛn ɲɔɔn kɛla, julumun tɛrɛ tɛ ii ma wo rɔ. Sisɛn ii ka a yen, kɔni n ni n Fa gboyara ii yɛ. 25 Wo rɔ, kumakan mɛn sɛbɛni ii la sariya rɔ, wo ri dafa: ‹N gboyara ii yɛ, kun ti a la.› 26 Awa Lalilila wa na waati mɛn na n Fa ta fan dɔ, Nii Sɛniman, tuɲa tii, mɛn ye bɔla n Fa rɔ, a ri n na sereya bɔ. 27 Aile fanan di kɛ n na sereya ri, baa an da mɛn an ɲɔɔn fɛ kɛbi n na baara damira waati.»