1 A banni wo fɔla, Isa ni a la karandenilu bɔra ka wa Kidirɔn Dinban tɛɛ ka wa a fan kelen ma. A ni a la karandenilu donda jiritu do kɔrɔ ye. 2 Judasi, mɛn di a janfa, wo ka yɔrɔ wo lɔn, ka a masɔrɔn Isa ni a la karandenilu tɛrɛ ye ii ladɛnna waati siyaman dɔ. 3 Judasi kɛra tɛsidi la kuntii ri Isa mira ko rɔ, a ni doilu mɛn kelayanin Alla la sarakalaselailu ni Farisiilu bolo, ii sera jiritu wo rɔ fitinna ye ii bolo a ni kalasidiilu ni kɛlɛkɛfenilu.

4 Isa ka a lɔn ko mɛn bɛɛ ye nala a masɔrɔnna, a ka a madon ii la ka ii maɲininka ko: «Ai ye yon de ɲininna?» 5 Ii ka a jabi: «An ye Isa Nasarɛtika le ɲininna.» A ka a fɔ ii yɛ ko: «Nde le.» Judasi, mɛn ka janfa don a ma, a lɔni tɛrɛ ii dafɛ ye. 6 Isa ka a fɔ ii yɛ waati mɛn na ko: «Nde le,» ii ka sɛ ii kɔnkɔ ma, ka be duu ma. 7 Isa ka ii maɲininka kokura ko: «Ai ye yon ɲininna?» Ii ka a fɔ ko: «Isa, Nasarɛtika.» 8 Isa ka ii jabi: «N da a fɔ ai yɛ ko nde le. Ni ai ye nde le ɲininna, ai ye do ɲinilu to ye.» 9 A tɛrɛ ye kumala ka kuma wo dafa a tɛrɛ ka mɛn fɔ kɔrɔman na ko: «I ka mɔɔ mɛnilu di n ma, wo si ma tunun n bolo.»

10 Simɔn Piyɛri ka fanmuru ta ka sarakalasela la jɔn do bolokinin ma tolo tɛɛ a la. Jɔn wo tɛrɛ tɔɔ le ko Malikusi. 11 Isa ka a fɔ Piyɛri ma ko: «I la fanmuru don a laa rɔ. N Fa ka tɔrɔya mɛn natɛɛ n ma, n di n ban wo rɔ wa?»

12 Tɛsidiilu ni ii la kuntii, a ni Alla la sarakalaselailu kandanilailu ka Isa mira ka a sidi. 13 Ii nara a ri fɔlɔ Anasi wara, baa Kayifasi mɛn ye sarakalasela kuntiiya la san wo la, wo birancɛ le. 14 Kayifasi le ka Judiyailu lalili ko: a bɛnnin mɔɔ kelen ye faa jama nɔ rɔ.

15 Simɔn Piyɛri ni karanden do bilara ii kɔ. Karanden wo ka sarakalasela kuntii lɔn, a donda sarakalasela la lu ma Isa kɔ. 16 Kɔnin Piyɛri ma don. A tora lu da la. Karanden do wo bɔra lu ma, a kumara lu da kɔnɔgbɛnna yɛ, ka Piyɛri ladon. 17 Muso mɛn ye da kɔnɔgbɛnna wo ka Piyɛri maɲininka ko: «Ile, i fanan ye a la karanden do le ri?» A ka a fɔ ko: «Nde tɛ.» 18 Baaradenilu ni lakandanilailu ka ta bila sinkɔn dɔ ka ii maja ta dafɛ, baa nɛnɛ tɛrɛ ye bɔla. Piyɛri fanan tɛrɛ ye woilu tɔrɔfɛ ka a maja ye.

19 Fan kelen ma, Alla la sarakalasela kuntii ka Isa maɲininka a la karandenilu ma a ni a karan ɲa ma. 20 Isa ka a jabi: «N kumara gbɛ le rɔ mɔɔ bɛɛ yɛ, n ka mɔɔilu karan salibonilu la a ni Alla batobonba jin kɔndɔ, Judiya bɛɛ ladɛnnin tɛrɛ ye. N ma foyi fɔ gbundu rɔ. 21 Nfenna i ye n maɲininkala? I maɲininka mɛn ka ii tolo malɔ n na, n ka mɛn fɔ ii yɛ; ii ka a lɔn n ye mɛn fɔla ii yɛ.» 22 Kuma wo rɔ lakandalila do, mɛn lɔni tɛrɛ ye, ka a da gbasi ka a fɔ ko: «I ye sarakalasela kuntii le jabila ɲa wo le ma?» 23 Isa ka a jabi: «Ni n ka kuma juu le fɔ, kuma juu wo yiraka, kɔni n ka kuma mɛn fɔ ni a tuɲa le, nfenna i ye n gbasila?» 24 Wo rɔ Anasi ka Isa sidinin madon sarakalasela kuntii Kayifasi la.

25 Simɔn Piyɛri tora a majala ta dafɛ. Mɔɔ do ka a fɔ a ma ko: «Ile fanan, i ye a la karandenilu do le ri wa?» Kɔni Piyɛri ka a jɛrɛ dakan ko: «Nde tɛ.» 26 Sarakalasela la jɔn mɛn tolo tɛɛra a la Piyɛri bolo wo la mɔɔ do ka a fɔ ko: «N ka i yen de a kɔfɛ jiritu rɔ wa?» 27 Kɔni Piyɛri ka a jɛrɛ dakan kokura, i kɔrɔkɔrɔ dondon kasira.

28 Ii nara ka bɔ Kayifasi wara ka wa mara kunnasiila la mansaya bon na. Sɔɔma da le tɛrɛ. Mɛnilu wara Isa ri, ii ma don mansa bon na sa ii kana ii la sɛninya namun tiɲan. Wo wa kɛ ii ti se Taminkunna Sali dɔɔnnin kɛla. 29 Wo rɔ, Pilate bɔra ka wa ii ma ka a fɔ ko: «Ai ye tɔɔ su ɲuman de lala cɛɛ ɲin na?» 30 Ii ka a jabi: «Ni kojuu kɛla tɛ an tɛrɛ tɛ a mirala ka na a ri i ma.»

31 Pilate ka a fɔ ii yɛ ko: «Ai ye a mira ka a kiti ai la sariya la.» Judiyailu ka a fɔ a yɛ ko: «An tɛ kiti tɛɛla ri ka mɔɔ faa.» 32 Isa tɛrɛ ra a la saya ko kuma wo lase, a la saya ko ye dafala ɲa mɛn ma.

33 Pilate donda mansa bolon kɔndɔ, ka Isa kili ka a fɔ a yɛ ko: «I ye Judiyailu la mansa le ri?» 34 Isa ka a jabi: «Ile le ka wo fɔ, wala mɔɔ gbɛrɛ le ka wo fɔ n na ko rɔ wa?» 35 Pilate ka a jabi: «Nde, Judiya le n di wa? I la jama ni sarakalasela kuntiilu ka i don n bolo. I ka nfen kɛ?»

36 Isa ka a jabi: «N na mansaya bɔni yɔrɔ gbɛrɛ le ka na. A ma bɔ dunuɲa rɔ yan. Ni wo tɛ, n kɔmɔɔilu tun di Judiyailu la ɲɛmɔɔilu kɛlɛ, sa n kana don woilu bolo. N na mansaya ma bɔ dunuɲa ɲin dɔ, fo yɔrɔ gbɛrɛ.» 37 Pilate ka a fɔ a yɛ ko: «I ye mansa le ri!» Isa ka a jabi: «I jɛrɛ le ka a fɔ ko n ye mansa le ri. Ni n da sɔrɔn a ni n da na dunuɲa rɔ, n nani kɛla tuɲa la sereya le ri. Mɔɔ mɔɔ mɛn ye tuɲa ta ri, wo ri n kumakan namɛn.» 38 Pilate ka a fɔ a yɛ ko: «Tuɲa ye nfen di?»

A banni wo fɔla, ale bɔra kokura ka wa Judiyailu ma ka a fɔ ii yɛ ko: «Nde ma cɛɛ ɲin mira kun kelen lɔn mɛn di kɛ a faa ko ri. 39 Kɔni ka bɛn ai la namun ma san san Taminkunna Sali wa se n di kasoden kelen bila; ai ye a fɛ n ye Judiyailu la mansa bila wa?» 40 Ii ka a jabi mankan ba rɔ ko: «Ale tɛ, Barabasi bila!» Awa Barabasi tɛrɛ ye mɔɔ murantiini le ri.