1 Mɔɔ mɛn na lemɛniya dɔɔman ai tɛma, ai ye wo ramira, ai kana ai miriyailu masɔsɔ. 2 Mɔɔ doilu ye fen bɛɛ dɔɔnna ii la lemɛniya rɔ, kɔni doilu ye nakɔfenilu le dɔrɔn dɔɔnna ii la lemɛniya fankatanya rɔ. 3 Mɔɔ mɛn ye fen bɛɛ dɔɔnna, wo kana mɔɔ lagboyaɲɛ mɛn da a ban a rɔ. Mɛn ka a ban a rɔ, wo kana mɔɔ jalaki mɛn ye fen bɛɛ dɔɔnna, ka a masɔrɔn Alla ra a ramira. 4 Yon ye ile ri, ile mɛn ye mɔɔ gbɛrɛ la jɔn makitila? Ni a benin, wala ni a lɔnin, wo ye a tii le ma. Kɔni a ri lɔ ka a masɔrɔn Alla ri se a lalɔla.

5 Mɔɔ doilu mirinin de, ko lon do taminnin lon do la. Gbɛrɛilu mirinin a ma, ko lon bɛɛ kelen. Fɔɔ bɛɛ ye la a miriya le la a ɲuma la. 6 Mɛn mirinin a ma, ko lon do taminnin lon do la, wo ye a kɛla Maari gbiliya ko le la. Mɛn ye fen bɛɛ dɔɔnna, wo fanan ye wo kɛla Maari gbiliya ko le la, baa a ye baraka bilala Alla yɛ wo dɔɔnnifen na ko rɔ. Mɛn wa a ban dɔɔnnifen do rɔ, wo ye wo kɛla Maari gbiliya ko le rɔ. Wo fanan ye baraka bilala Alla yɛ. 7 Baa an foyi tɛ tola an nii la an jɛrɛ yɛ. An foyi tɛ faala an jɛrɛ yɛ. 8 Ni an tora an nii la, an tonin an nii la Maari le yɛ. Ni an faara, an faanin Maari le yɛ. Wo le rɔ, ni an tora an nii la, wala ni an faara, Maari le ta ye an di. 9 Wo le rɔ Ɲenematɔmɔnin faanin de, ka wuli ka bɔ saya rɔ kosa a ye kɛ mɔɔ faaniilu ni niilamailu Maari ri. 10 Kɔni ile, nfenna i ye i badenmailu jalakila? Nfenna i ye a dɔɔyala? Baa an bɛɛ ri an lɔ kitila diya Alla ɲakɔrɔ. 11 Baa a sɛbɛnin Kitabu rɔ ko,

«Maari ka a fɔ ko,

‹Alla Ɲenemaya le n di,

n da n kali n jɛrɛ la,

kungbelen bɛɛ ri lajii n kɔrɔ,

nɛn bɛɛ ri a lɔ Alla ma.›*»

12 An kelen kelenna bɛɛ ri a jɛrɛ dantɛ Alla yɛ.

13 Wo le rɔ, an ye fara an ɲɔɔn jalakila. Kɔni ai ye karan kosa ai kana foyi kɛ mɛn di ai badenma lafili wala ka a bila julumun dɔ. 14 Baa n ka a lɔn, ka a famun Maari Isa baraka rɔ ko dɔɔnnifen si haramunnin tɛ a jɛrɛ ma, kɔni ni mɔɔ ka a miri ko a haramunnin, wo rɔ a haramunnin ale yɛ. 15 Ni i badenma tɔrɔnin i la dɔɔnnifen do la ko rɔ, i tɛ kaninteya sila kan butun. Ɲenematɔmɔnin faara mɔɔ mɛn na ko la, I kana wo halaki i la dɔɔnnifen na ko rɔ. 16 I kana sɔn ko mɛn ka ɲin ile ma, wo ye kɛ koɲuma mafɔ kun di. 17 Baa Alla la mansaya kɛnin tɛ dɔɔnnifen ni minninfen de ri, kɔni fɔɔ telen ni jususuma ni sɛwa, ka fara Alla la Nii Sɛniman na, 18 baa mɔɔ mɛnilu bɛɛ ye baarala Ɲenematɔmɔnin yɛ wo ɲa ma, woilu ri Alla hɛnɛ, mɔɔilu ri sɔn a ma.

19 Wo le rɔ, ko mɛnilu kɛnin jususuma ni an fanka don di an ma fɔɔ an ye woilu le kɛ. 20 I kana Alla kɛwali tiɲan dɔɔnnifen fɛ. Dɔɔnninfen bɛɛ dɔɔn dahanin, kɔni a ma ɲin ka fen fen dɔɔn mɛn di badenma bila julumun dɔ. 21 A ka fisa, i kana sobo dɔɔn, i kana rɛsɛnji min, i kana foyi kɛ ni a ri i badenma bila julumun dɔ. 22 I lanin mɛn na ko ɲinilu rɔ, wo mara i jɛrɛ yɛ Alla ɲakɔrɔ. Sɛwa ye wo tii yɛ mɛn tɛ a jɛrɛ jalakila a sɔn ko ma. 23 Kɔni ni mɛn ka dɔɔnnifen dɔɔn a sikanin mɛn dɔ, wo tii jalakinin de Alla bolo, ka a masɔrɔn a tɛ ko kɛla lemɛniya rɔ. Wo rɔ, ko si mɛn tɛ kɛla lemɛniya rɔ, julumun de wo ri.