1 Wo le rɔ, n badenmailu, Alla la kininkinin na ko kosɔn, n ye ai madiyala ai ye ai faribanku di Alla ma saraka ɲenemayanin di, mɛn sɛninyanin Alla yɛ, ka a hɛnɛ. Wo le kɛnin bato bɛrɛbɛrɛ ri ai ye mɛn kɛla Alla yɛ. 2 Ai kana ai jɛrɛ bila dunuɲa koilu kɔfɛ, kɔni ai ye ai kɛɲa yɛlɛman hankilimaya kura rɔ, kosa ai ye Alla sawo fɛsɛfɛsɛ, a sawo mɛn ka ɲin, a ni mɛn duman, a ni mɛn dafanin.

3 N wa a fɔ ai bɛɛ yɛ Alla la hina rɔ, a ka mɛn di n ma ko, ai kana a miri ai jɛrɛ la ko rɔ ka tamin doilu la, kɔni ai ye ai miri hankilimaya ni jɛrɛ mira rɔ ikomin Alla ka lemɛniya jate mɛn di ai ma. 4 An fari yɔrɔilu siyayanin, kɔni ii bɛɛ ni ii baara. 5 A ye wo ɲa le ma, hali an ka siya, an da kɛ faribanku kelen di Ɲenematɔmɔnin dɔ, an di to an ɲɔɔn fɛ ikomin fari yɔrɔilu. 6 Alla ye an sɔla fen su siyaman de la, ikomin a ka latɛɛ an ma ɲa mɛn ma a la hina rɔ. Ni a ra mɔɔ sɔ nabiya kumailu rɔ, a ye wo labaara a la lemɛniya jate la. 7 Ni baara le a ri jama yɛ, a ye baara kɛ. Ni karan de, a ye karan kɛ. 8 Ni sɛɛbɛ donna le a ri, a ye ii sɛɛbɛ don. Ni sɔlila le a ri, a ye a kɛ fonesereya rɔ. Ni ɲɛmɔɔ le a ri, a ye wo kɛ kelen di. Ni kininkininna le a ri, a ye a kɛ sɛwa rɔ.

9 Ai la kaninteya kana kɛ nafiya ri. Ai ye kojuu kɔn. Mɛn ka ɲin, ai ye wo mira gben! 10 Ai ye ai ɲɔɔn kanin badenmaya kaninteya rɔ, ai ye to ai ɲɔɔn gbiliyala kosɛbɛ. 11 Ai la tunadiya kana kɛ salaya ri. Kɔni ai ye baara Maari yɛ wakali ba rɔ. 12 Ai ye sɛwa ai jii la ko rɔ, ka diɲɛ tɔrɔya rɔ, ka to Alla matarala waati bɛɛ. 13 Ai ye mɔɔ sɛnimanilu donin ta ii makoilu rɔ. Ai ye kusanya mɔɔilu lamirala.

14 Ai ye duwa ai bɛnsɛnkɔnintɛya mɔɔilu yɛ, ai ye duwa, ai kana danka kɛ. 15 Mɛnilu sɛwanin, ai ye sɛwa woilu fɛ. Mɛnilu ye kasila, ai ye kasi woilu fɛ. 16 Ai kɔndɔ koilu ye kɛ kelen di ai ɲɔɔn yɛ. Ai kana ai waso, kɔni mɔɔ si majiinin ai ye wo madon ai la. Ai kana ai jɛrɛ jate lɔnninnailu ri.

17 Ai kana kojuu sara kojuu la. Ai ye a kɛ koɲuma ka ko telennin kɛ mɔɔilu bɛɛ ɲakɔrɔ. 18 Ni a ri bɛn, fanin wo faranin ai la, bɛn ye to ai ni mɔɔilu bɛɛ tɛma. 19 N kaninteilu, ai kana ai ta sara, kɔni ai ye a to Alla la mɔnɛ ma, ka a masɔrɔn a sɛbɛnin Kitabu rɔ, Maari ka a fɔ ko, «Nde le ta saralila ri. N di koilu sara ii ɲɔɔn na.»* 20 Fɔɔ aile ye a kɛ wo ɲa ma: Kitabu ka a fɔ ko, «Ni kɔnkɔ ye i juu la, dɔɔnnifen di a ma; ni min lɔɔ ye a la, ji di a ma, ka a masɔrɔn ni i ka wo kɛ a yɛ, wo ye kɛla le a yɛ ikomin i ye ta kinbi le ladɛnna a kun ma.»* 21 I kana sɔn kojuu ye fanka sɔrɔn i ma, kɔni fɔɔ i ye se kojuu la koɲuma fɛ.