1 N ye ɲininkali ɲin kɛla: Alla ra a ban a la jama rɔ wa? Ɛɛn de! Ka a masɔrɔn Isirayɛlika le nde jɛrɛ ri, Iburahima bɔnsɔn do Bɛniyaminu kabila rɔ. 2 Alla tɛrɛ ma a la jama labila, a ka mɛn suwandi a jɛrɛ yɛ a damira. Eliya ye a dalakasila Alla yɛ Isirayɛlikailu la ko rɔ Kitabu kɔndɔ yɔrɔ mɛn, ai ma yɔrɔ wo lɔn wa? Ko, 3 «Maari, ii ra i la kelalaselailu faa, ka i la saraka bɔ diyailu tiɲan, n kelen pe le tonin sisɛn, ii karannin n fanan faa ko rɔ.»* 4 Alla ka a jabi di? Ko, «N da mɔɔ waa wɔrɔnwula (7,000) lamara n jɛrɛ yɛ mɛnilu ma ii ɲɔnkinnin Bahali joo kɔrɔ.»* 5 A ye wo ɲa le ma ten, Alla la jama tɔ tonin mɛnilu suwandinin a la hina rɔ waati ɲin dɔ. 6 Ni a kɛnin hina le rɔ, mɔɔilu kɛwali tɛ a ri butun. Ni wo tɛ Alla la hina tɛrɛ tɛ hina ri.

7 Nfen kɛnin wo rɔ? Isirayɛlikailu tɛrɛ ye mɛn ɲininna sɛbɛ rɔ, ii ma wo sɔrɔn. Kɔni fɔɔ Alla ka mɛnilu suwandi woilu le ka a sɔrɔn. A tɔilu jusu ragbɛlɛnyanin, 8 ikomin a sɛbɛnin ɲa mɛn ma Kitabu rɔ ko, «Alla ra hankili gbo di ii ma, a ni ɲa mɛnilu tɛ fen yenna a ni tolo mɛnilu tɛ kuma mɛnna haan bi.»* 9 Dawuda ka a fɔ ko, «Alla ye ii la saliilu kɛ julu ri ii ɲɛrɔ a ni nɛɛ ɲankuma mɛn ye ii mirala, a ye a kɛ sennatufen di mɛn ye ii labela ka ii hakɛilu sara ii la. 10 Ii ɲailu ye lafin, kosa ii ti se yennin kɛla! Ii kɔ mabirinnin ye to waati bɛɛ!»*

11 N ye ai maɲininkala, Judiyailu filira waati mɛn na, ii bera le wa habadan? Ɛɛn de! Kɔni ii bera hakɛ le rɔ, baa siya gbɛrɛilu ka kisi ko sɔrɔn, kosa keleya ye Isirayɛlikailu mira. 12 Adon, ni Judiyailu hakɛ kɛra ɲaɲa ba ri dunuɲa mɔɔilu yɛ, ni ii la bɔnɔ kɛra ɲaɲa ri siya gbɛrɛilu yɛ, ii wa a lakanbali waati mɛn na, wo fanan tɛ ɲaɲa ba lana wo rɔ wa?

13 N ye kumala aile siya gbɛrɛilu le yɛ ten. N da kɛ talibidenba ri siya gbɛrɛilu yɛ. N ye n wasola wo baara la, 14 tumadɔ, n di keleya ladon n kabila mɔɔ rɔ kosa ii fanan doilu ye kisi. 15 Baa Isirayɛlikailu labilara waati mɛn na, ni Alla ni dunuɲa mɔɔilu tɛmala rabɛnda, nfen ye kɛla wo rɔ butun ni ii donda a la landaɲa rɔ ikɔ tuun? Wo ye kɛla wuli le ri ka bɔ saya rɔ ka wa ɲenemaya rɔ.

16 Ni buru fɔlɔ lasera Alla ma, a ni mɛnilu gbasinin ii ɲɔɔn fɛ, woilu fanan sɛniman.* Ni jiri lulu sɛniman, a bolonilu fanan ye tola wo ɲa le ma. 17 Kɔni ni a bolon doilu tɛɛra olibiye jiriju ma, ile siya gbɛrɛ mɛn kɛnin ikomin waa rɔ olibiyeju bolon, ka i sidi jiriju ma ii nɔ rɔ, ka to wo jiri lulu ji sɔrɔnna, 18 i kana i jɛrɛ kɔrɔta wo jiri bolon tɛɛninilu ma. Ni i ka wo kɛ, i kana ɲina ko ile tɛ lulu balola de, lulu le ile balola.

19 Wo rɔ, ile ri a fɔ ko, «Jiri bolonilu tɛɛnin de kosa nde ye sidi ii nɔ rɔ.» 20 Tuɲa le wo ri, ii tɛɛnin ii la lemɛniyabaliya la ko le rɔ, i ye lɔla ii nɔ rɔ lemɛniya le rɔ. Wo rɔ, i kana i yanda wo ko rɔ de, kɔni i ye silan. 21 Baa, ni Alla ma Judiyailu lakandan, mɛnilu kɛnin ikomin jiri bolon fɔlɔilu, tumadɔ a ti nala i fanan nakandanna. 22 Wo rɔ, i ye i miri Alla la ɲumaya ni a la ɲakɔrɔ sidi ba ma. Mɛnilu filinin, a la ɲakɔrɔ sidi ba woilu ma, kɔni a la ɲumaya ka ɲin ile ma, kɔni fɔɔ i ye to a la ɲumaya rɔ, ni wo tɛ, a ri i fanan tɛɛ a jiriju ma ikomin jiri bolon. 23 Ni Judiyailu ma to ii la lemɛniyabaliya rɔ, ii ri sidi ii lɔdiya ikɔ tuun, baa Alla ri se ii sidila ii nɔ rɔ ikɔ tuun. 24 Baa, ni ile siya gbɛrɛ kɛnin de ikomin waa rɔ olibiye jiri bolon mɛn tɛrɛ tɛɛnin a jiriju ma, ka i sidi so kɔndɔ olibiye jiri bɛrɛ ma hali i dan ɲa tɛrɛ tɛ a ri, wo rɔ Judiya jɛrɛ mɛnilu kɛnin ikomin so kɔndɔ olibiye jiri bɛrɛ bolonilu, Alla ri kaɲa woilu sidila ii jɛrɛ jiriju ma ii nɔilu rɔ fewu.

25 N badenmailu, n ye a fɛ ka Alla la gbundu ko ɲin yiraka ai la, kosa ai kana ai jɛrɛ jate lɔnninnailu ri: Isirayɛli jama fan kelen bannin Alla rɔ haan siya doilu kasabiya dafanin ye don. 26 Wo rɔ, Isirayɛli bɛɛ ri kisi ikomin a sɛbɛnin Kitabu kɔndɔ ɲa mɛn ma ko,

«Kunka ri bɔ Siyon,

a ri Alla lɔnbaliya bɛɛ bɔ Yakuba bɔnsɔn dɔ.

27 N wa ii julumun bɔ ii ma waati mɛn na,

n ye teriya sidila wo le fɛ ii yɛ.»*

28 Ka bɛn Isa la Kibaro Ɲuma ma ii ra kɛ Alla juuilu ri aile le la ko kosɔn, kosa aile ri Isa la Kibaro Ɲuma sɔrɔn. Kɔni Alla diyanan jama suwandinin de ii ri ii benba kelalasela fɔlɔilu la ko rɔ. 29 Ka a masɔrɔn Alla la sɔliilu ni a la kili tɛ mafalɔnna. 30 Ikomin aile mɛn tɛrɛ ma Alla la kuma mira fɔlɔ, kɔni ai ra Alla la kininkinin sɔrɔn sinɛn Judiyailu la mirabaliya la ko kosɔn 31 wo ɲa ma, sinɛn Judiyailu tɛ Alla kan mirala butun kosa aile siya gbɛrɛilu ka kininkinin mɛn sɔrɔn, ii fanan ye wo sɔrɔn aile siya gbɛrɛilu sababu la. 32 Baa Alla ra mɔɔ bɛɛ kɛ kasola mɔɔilu ri ii la mirabaliya rɔ, kosa a ye kininkinin ii bɛɛ ma.

33 Alla la nɛma ni a la hankilimaya ni a la lɔnnin dun de wo ri! Yon di se Alla la ko latɛɛninilu famunna? Yon di se a la koilu famunna? 34 A sɛbɛnin Kitabu rɔ ko,

«Yon ka Maari miriyailu lɔn? Yon di se kɛla a kawandi mɔɔ ri?* 35 Yon di se Alla julula, kosa a ye a lasɛ a ma ikɔ tuun?»* 36 Baa ko bɛɛ bɔnin ale bolo ale le baraka rɔ ale yɛ. Gbiliya ye ale le yɛ habadan. Amina!