1 Ai ye an badenma muso Febe jate mɔɔ ɲuma ri, mɛn ye baarala Sankere lemɛniya jama yɛ. 2 Ai ye a ramira Maari tɔɔ rɔ ikomin a bɛnnin jama sɛniman tɛma ɲa mɛn ma, ai ye a dɛmɛn ɲa bɛɛ ma a mako wa kɛ a la yɔrɔ mɛn, baa ale jɛrɛ ra mɔɔ siyaman dɛmɛn a gbengben nde.

3 Ai ye Pirisili ni Akila tuwa, n baaraden ɲɔɔnilu Ɲenematɔmɔnin Isa rɔ. 4 Ii ra susu saya la nde nii la ko rɔ. N kelen tɛ baraka bilala ii yɛ, siya gbɛrɛ lemɛniya jamailu bɛɛ ye baraka bilala ii yɛ. 5 Lemɛniya jama mɛnilu ye ii ladɛnna ii la bon kɔndɔ, ai ye woilu fanan tuwa. Ai ye n kaninte Epayinɛte tuwa, mɛn fɔlɔ lemɛniyara Ɲenematɔmɔnin ma Asi jamana rɔ. 6 Ai ye Mariyamu tuwa mɛn baaranin ai yɛ kosɛbɛ! 7 Ai ye Andironiki ni Juniya tuwa n wara mɔɔilu, an ni mɛnilu bilara kaso la kelen di. Ii jatenin talibidenbailu tɛma. Ii fɔlɔ lemɛniyara Ɲenematɔmɔnin ma nde ko.

8 Ai ye Anpiliyati tuwa n yɛ, n kaninte Maari rɔ. 9 Ai ye Urubani tuwa n yɛ, an baaraden ɲɔɔn Ɲenematɔmɔnin dɔ, a ni n kaninte Satakisi. 10 Ai ye Apelɛsi tuwa mɛn ka a jɛrɛ yiraka Ɲenematɔmɔnin ta ri fɛsɛfɛsɛ rɔ. Ai ye Arisitobula la denbaya tuwa. 11 Ai ye Herodiyon tuwa, n wara mɔɔ. Ai ye Narisisa la denbaya tuwa mɛnilu lanin Maari la.

12 Ai ye Tirifina ni Tirifosa tuwa, muso mɛnilu ye baarala Maari yɛ haan! A ni n kaninte Pɛrasi muso gbɛrɛ mɛn baarara Maari yɛ kosɛbɛ! 13 Ai ye Rufusi tuwa, mɛn suwandinin Maari rɔ, a ni a na, mɛn kɛra ikomin n na. 14 Ai ye Asinkirite ni Filekon ni Hɛrɛmɛ ni Patirobasi ni Herimasi tuwa a ni an badenma mɛnilu ye ii tɔrɔfɛ. 15 Ai ye Filoloke ni Juliya tuwa a ni Nere ni a mamuso, a ni Olimipasi ni jama sɛniman mɛnilu bɛɛ ye ii tɔrɔfɛ.

16 Ai ye ai ɲɔɔn tuwa badenmaya tuwali sunbuli rɔ. Ɲenematɔmɔnin na lemɛniya jamailu bɛɛ ye ai tuwala.

17 N badenmailu, n ye ai madiyala, ai ye a kɛ ai hankili la mɔɔilu la ko rɔ mɛnilu ye mɔɔilu tɛmala farala, ka ii bila fili rɔ. Ai ka karan mɛn sɔrɔn, ii ye wo lalɔ. Ai ye ai mataa woilu la. 18 Baa wo mɔɔ suilu tɛ baarala an Maari Ɲenematɔmɔnin yɛ, kɔni ii jɛrɛ diyanan koilu! Sɔn tɛ mɔɔ mɛnilu la ii ye woilu majuuwayala ii la kuma ɲumailu ni ii la wuya matɔɔ kumailu la. 19 Mɔɔ bɛɛ ra a mɛn ko ai ye Alla la kuma mirala. Wo rɔ, n sɛwanin ai la ko rɔ haan, kɔni n ye a fɛ le ai ye kɛ hankilimailu ri ka koɲuma lɔn, a ni sɛninyabatɔilu la kojuu kɛ la ko rɔ. 20 Sinɛn jususuma Alla ri Setana ramɔɲɔnkɔ ai sen kɔrɔ. An Maari Isa ye hina ai la.

21 N baaraden ɲɔɔn Timote ye ai tuwala a ni Lusiyusu ni Jasɔn ni Sosipateri, n wara mɔɔilu.

22 Nde, Teritiyusi le ka bataki ɲin sɛbɛ Pɔli yɛ, n fanan da ai tuwa Maari tɔɔ rɔ.*

23 Kayusi ye ai tuwala, n londanyatii an ni lemɛniya jama bɛɛ. Erasite, so wodi lamarala a ni an badenma Kuwaratusi ye ai tuwala.

24 An Maari Isa Ɲenematɔmɔnin ye hina ai la. Amina.

25 Alla mɛn di se ai fanka donna n na Kibaro Ɲuma lase fɛ, a ni Isa Ɲenematɔmɔnin na ko kawandi lase fɛ, ka fara wo gbundu ko lɔnna mɛn doonnin tɛrɛ waati jan taminnin, 26 mɛn da bɔ kɛnɛma sisɛn kelalaselailu la kitabuilu fɛ, ka fara Alla ɲenema la jamarili la ko la, a ye lasela siyailu bɛɛ ma, kosa a kan ye mira lemɛniya rɔ,

27 Alla mɛn kelen pe ye lɔnninna ri, an ye wo Alla gbiliya Isa Ɲenematɔmɔnin baraka rɔ habadan! Amina.