1 Nde Pɔli, Alla ka mɛn kili a sawo rɔ, ka n kɛ Isa Ɲenematɔmɔnin na talibidenba ri, n ni an badenma Sɔsitɛni le ɲin sɛbɛla ai ma, 2 ka a lawa Alla la lemɛniya jama ma Korɛnti so kɔndɔ, mɔɔ mɛnilu ra lasɛninya Isa Ɲenematɔmɔnin baraka rɔ, mɛnilu kilinin kosa ii ye kɛ jama sɛniman di, a ni mɔɔ mɛnilu bɛɛ ye Alla matarala yɔrɔ bɛɛ rɔ an Maari Isa Ɲenematɔmɔnin tɔɔ rɔ, ii Maari, a ni an fanan ta.

3 An Fa Alla ni an Maari Isa Ɲenematɔmɔnin ye hina ni jususuma di ai ma.

4 N ye baraka bilala Alla yɛ ai la ko rɔ waati bɛɛ ka a masɔrɔn a ra hina ai la Isa Ɲenematɔmɔnin baraka rɔ. 5 Baa ai la koilu bɛɛ ra sabati Isa baraka rɔ, ai la kuma ni ai la lɔnnin bɛɛ, 6 ka a masɔrɔn an na sereya ra yiraka ai fɛ fewu Ɲenematɔmɔnin na ko rɔ. 7 Wo rɔ, Alla la sɔlifen si dɛsɛnin tɛ ai ma ai wa kɛ an Maari Isa Ɲenematɔmɔnin makɔnɔnna haan a ye bɔ kɛnɛma. 8 A ri ai lamara fanan fewu, haan waati laban kosa an Maari Isa Ɲenematɔmɔnin kana fɛɛ si tɛrɛn ai la a na Lon. 9 Alla mɛn ka ai kili kosa ai ni an Maari Isa Ɲenematɔmɔnin ye bɛn ai ɲɔɔn ma, wo telennin.

10 N badenmailu, n ye ai madiyala an Maari Isa Ɲenematɔmɔnin tɔɔ rɔ, ai bɛɛ ye bɛn ai ɲɔɔn ma, kosa ai kana latalan, kosa ai ye kɛ kelen di, ai miriyailu ni ai kɔndɔ koilu ye kɛ kelen di. 11 N badenmailu, n da a lɔn Kilowe wara mɔɔilu fɛ, ko bɛnbaliya ye ai tɛma. 12 N ye a fɛ ka mɛn fɔ, wo le ten: mɔɔ doilu ye a fɔla ai tɛma ko, «Nde ye Pɔli le kɔfɛ »; do ko, «Nde ye Apɔlɔsi le kɔfɛ»; do fanan ko, «Nde ye Sefasi le kɔfɛ»; do gbɛrɛ fanan ko, «Nde ye Ɲenematɔmɔnin de kɔfɛ.» 13 Ɲenematɔmɔnin latalannin de a ri wa? Pɔli le gbɔngbɔnda jiri kan ai yɛ wa? Ai sunnin ji rɔ Pɔli le tɔɔ rɔ wa?

14 N ye baraka bilala Alla yɛ ko n ma ai foyi sun ji rɔ fɔɔ Kiripusi ni Kayusi 15 kosa mɔɔ si kana a fɔ ko ai sunnin ji rɔ n tɔɔ le rɔ. 16 N tɛrɛ ra Esitefana ni a wara mɔɔilu fanan sun ji rɔ. Kɔni n ma a lɔn butun ni n da mɔɔ gbɛrɛ sun ji rɔ. 17 Ɲenematɔmɔnin ma n kelaya, ko n ye sun ji rɔ kɛ. A ka n kelaya le, ko n ye wa Isa la ko Kibaro Ɲuma lase, adon, n tɛ wo kɛla adamadenilu la waliji kumailu fɛ kosa Ɲenematɔmɔnin na saya ko fanka kana bɔ a la wo rɔ.

18 Baa kelaya mɛn fɔnin ai yɛ, Isa faa ko jiri kan, wo kɛnin hankilidɔɔya le ri mɔɔilu yɛ mɛnilu ye halakila. Kɔni Alla ye andeilu mɛnilu lakisila, a kɛnin Alla fanka le ri andeilu yɛ. 19 Baa ɲin de sɛbɛnin Kitabu rɔ: «N di walijiilu la walijiya tiɲan, ka hankilimailu la hankilimaya rabasan.»* 20 Waliji ye min? Sariya karanmɔɔ ye min? Waati ɲin lɔnninna ye min? Alla ma dunuɲa mɔɔilu la walijiya kɛ ii ma fatɔya le ri wa?

21 Baa Alla, Alla la walijiya rɔ, a ma sɔn dunuɲa mɔɔilu ye a lɔn ii la walijiya rɔ. A ka Alla hɛnɛn de a ye mɔɔ lemɛniyaniilu lakisi kawandili ɲin fɛ mɛn kɛnin ikomin fatɔya jama yɛ. 22 Judiyailu ye tɔɔmasereilu maɲininkala, Kirɛkiilu ye walijiya ɲininna. 23 Kɔni Ɲenematɔmɔnin gbɔngbɔn ko jiri kan, an ye wo le la ko kawandili bɔla. Judiyailu tɛ sɔnna wo le mɛnna, a ni kɔmɔɔya le wo ri siya gbɛrɛilu yɛ. 24 Kɔni Alla ra mɛnilu kili, ni a kɛra Judiya ri wala Kirɛki, Ɲenematɔmɔnin kɛnin Alla fanka ni a la walijiya le ri, wo tiilu yɛ. 25 Baa hali Alla la ko doilu ni hankilidɔɔya munuɲanin, wo hankilidɔɔya taminnin mɔɔilu la walijiya la. Hali Alla la ko doilu ni fankatanɲa munuɲanin, wo fankatanɲa ka bon mɔɔilu fanka ri.

26 N badenmailu, ai ye ai miri a ma, ai kɛnin tɛrɛ mɔɔ su mɛnilu ri Alla ka ai kili waati mɛn na. Waliji siyaman tɛrɛ tɛ ai tɛma adamadenilu ɲakɔrɔ. Fankama siyaman tɛrɛ tɛ ai tɛma, denbaya barakanin siyaman tɛrɛ tɛ ai tɛma. 27 Kɔni mɛn na ko kɛnin hankilidɔɔya ri dunuɲa mɔɔilu yɛ, Alla ka wo le suwandi ka walijiilu lamaloya. Mɛn kɛnin fankatan di dunuɲa mɔɔilu yɛ, a ka wo le suwandi kosa a ye fankamailu lamaloya. 28 Dunuɲa mɔɔilu jonin mɛn ma, ka a bɔrɔbɔ, ii ma mɛn jate fen di, Alla ka wo le suwandi ka dunuɲa namun fenilu halaki, 29 kosa adamaden si ti se a jɛrɛ matɔɔla Alla ɲakɔrɔ. 30 Ai ye Isa Ɲenematɔmɔnin dɔ Alla baraka le rɔ, mɛn ka a kɛ an na waliji ri ka fara Alla la, a ni an na telen ni sɛninya ni kunka. 31 Wo le rɔ, ikomin a sɛbɛnin Kitabu kɔndɔ ko, «Ni mɔɔ mɛn ye a jɛrɛ matɔɔla, a ka kan ka a jɛrɛ matɔɔ Maari la ko le rɔ.»*