1 N badenmailu, n ye a fɛ ai ye a lɔn ko an benbailu bilara le Musa kɔfɛ duru kɔrɔ, ii bɛɛ ka kɔɔji ratɛɛ.* 2 A kɛnin de ikomin ii sunda le ji rɔ Musa bolo duru ni kɔɔji rɔ. 3 Ii bɛɛ ka wo niimaya dɔɔnnifen kelen dɔɔn, 4 ii ka wo niimaya ji kelen min, baa ii ka ji min de ka bɔ Alla la kaba rɔ kaba mɛn kɛnin a la Mɔɔ Ɲenematɔmɔnin di mɛn bilanin tɛrɛ ii kɔfɛ.* 5 Kɔni hali wo, ii siyaman ma Alla hɛnɛn, ii suilu tora kiɲɛ fufu kɔndɔ.*

6 Nba, misali le woilu bɛɛ ri andeilu yɛ kosa an kana nata juu ta ikomin woilu ka a kɛ ɲa mɛn ma. 7 An kana joo bato ikomin wo doilu ka a kɛ ɲa mɛn ma. Baa a sɛbɛnin Kitabu kɔndɔ ko, «Jama ka ii sii dɔɔnnin diya ka ii min, ka ii lawuli ii lamaa kanma.»* 8 An kana jalonya kɛ ikomin wo doilu ka a kɛ ɲa mɛn ma, ii mɔɔ waa muwan ni sawa (23,000) faara tele kelen dɔ.* 9 An kana Ɲenematɔmɔnin kɔrɔbɔ ikomin doilu ka a kɛ ɲa mɛn ma, sailu ka ii faa. 10 An kana an dalakasi ikomin doilu ka a kɛ ɲa mɛn ma, Alla ka Halaki kɛla lana, ka ii faa. 11 Ko ɲinilu bɛɛ kɛra le ii la, ii kɛra misaliilu ri, ka ii sɛbɛ an nalɔnnin fen di, waati laban da se mɛnilu ma. 12 Wo rɔ, mɛn wa a miri ko a lɔnnin kosɛbɛ, wo ye a kɛ a hankili la kosa a kana be.

13 Ai lafili ko mɛnilu ra ai sɔrɔn, woilu dorinnin adamadenilu sɔrɔnna le. Alla telennin: a ti nala sɔnna fili ko ye ai sɔrɔn ka tamin ai fanka jate la. Wo rɔ, fili ko wa kɛ ai kɔfɛ, kɔni Alla ri wo rabɔ fɛrɛ di ai ma, kosa ai ye se a kɔrɔ.

14 Wo le rɔ, n kanintenilu, ai ye ai bori joo bato kɔrɔ. 15 N ye kumala ai yɛ ikomin hankilimailu, ai jɛrɛ ye n na kuma ragbɛ. 16 An wa baraka bila Alla yɛ Maari la jilafɛ la ko rɔ, wo ti an nadɛnna Ɲenematɔmɔnin jeli le fɛ wa? An ye buru mɛn dakadikadila wo waati rɔ, wo ti an nadɛnna Ɲenematɔmɔnin faribanku le fɛ wa?* 17 Baa burukala kelen de a ri, an da kɛ ikomin faribanku kelen pe, hali an ka siya, baa an bɛɛ ye do sɔrɔnna wo burukala kelen de rɔ.

18 Ai ye Isirayɛlikailu ragbɛ, mɛnilu ye saraka soboilu dɔɔnna, bɛn tɛ woilu ni saraka bɔ diya tɛma wa? 19 N ye a fɛ ka nfen fɔ wo rɔ? Joo sɔ kɛnin fanka do le ri wa wala sobo mɛn bɔnin joo yɛ wo kɛnin fen bɛrɛ le ri wa? 20 Wo tɛ wo ri, kɔni joo batolailu ye saraka mɛnilu bɔla, ii ye woilu lasela jenailu le ma, Alla tɛ. Nba, n tɛ a fɛ bɛn ye to ai ni jenailu tɛma. 21 Ai ti se ai minna Maari la jilafɛ la, ka ai min jooilu la jilafɛ la fanan. Ai ti se Maari la dɔɔnnin fenilu dɔɔnna a ni jenailu la dɔɔnnin fenilu. 22 An ye a fɛ ka Maari la keleya lawuli wa? An fanka ka bon a ri wa?

23 «Ko bɛɛ dahanin andeilu yɛ.» Kɔni tɔnɔ tɛ ko bɛɛ la. «Ko bɛɛ dahanin andeilu yɛ,» kɔni ko bɛɛ tɛ an dɛmɛnna. 24 Mɔɔ si kana hɛrɛ ɲinin a jɛrɛ yɛ, fɔɔ a ye a ɲinin mɔɔ gbɛrɛilu yɛ. 25 Fen mɛn bɛɛ ye sanna lɔfɛ rɔ, ai ye wo dɔɔn. Ai kana ɲininkali kɛ ni ai tana tɛ a ri. 26 Baa, «Maari le ta ye duu ni a rakɛ fenilu bɛɛ ri.»* 27 Ni lemɛniyabali do ka ai kili dɔɔnnin diya, ni wa lɔɔ ye ai la, a wa dɔɔnnifen mɛn don ai bolo, ai ye wo dɔɔn. Ai kana ɲininkali kɛ ni ai tana tɛ a ri. 28 Kɔni ni mɔɔ do ka a fɔ ai yɛ ko, «Dɔɔnnifen ɲin da lase joo ma,» wo rɔ, ai kana wo dɔɔnnifen dɔɔn ka a masɔrɔn wo mɔɔ la ko rɔ mɛn ka ai lalɔnnin ka bɛn hankili jate ma. 29 Aile hankili jate tɛ kɔni fɔɔ do hankili. Adon, nfenna nde la hɔrɔya ri kɛ jalaki ri mɔɔ gbɛrɛ hankili rɔ? 30 Ni n ka baraka bila Alla yɛ n na dɔɔnnifen na ko rɔ, nfenna mɔɔ do ri n nafɛya ka bɛn wo dɔɔnnifen na ko ma, n da baraka bila Alla yɛ mɛn na ko rɔ?

31 Wo rɔ, ni ai ye dɔɔnnifen dɔɔnna wala ka ai min, ai wa kɛ foyi kɛla, ai ye a kɛ Alla la gbiliya la ko rɔ. 32 Ai kɛwaliilu kana Judiyailu lafili, wala Kirɛkiilu wala Alla la lemɛniya jama, 33 ikomin nde fanan karannin ka mɔɔ bɛɛ hɛnɛn n na ko kɛ ɲailu bɛɛ rɔ ɲa mɛn ma. N tɛ koɲuma ɲininna n jɛrɛ dɔrɔn yɛ, fɔɔ mɔɔ siyaman yɛ kosa woilu fanan ye kisi.