1 Ni kɛlɛ ye mɔɔ fila tɛma lemɛniya jama rɔ, nfenna ai ye susula wo kiti ye la telenbaliilu tɛma, sani a ye la jama sɛniman tɛma? 2 Ai ma a lɔn wa, ko jama sɛniman de dunuɲa kiti tɛɛla? Nba, ni ai ye dunuɲa kitiilu tɛɛla, nfenna ai ti se ko dɔɔmanninilu kiti tɛɛla? 3 Ai ma a lɔn wa ko andeilu le mɛlɛkailu makitila? An di kaɲa dunuɲa ɲin koilu ma wo rɔ wa? 4 Nba, ni kɛlɛilu ye ai tɛma dunuɲa koilu rɔ, ai ri mɔɔilu kɛ kititɛɛlailu ri wo rɔ wa gbiliya tɛ mɛnilu kan lemɛniya jama tɛma? 5 N ye ai maloya ko le fɔla wo rɔ. Waliji si tɛ ai tɛma wa mɛn di se lemɛniya mɔɔ fila tɛma kiti tɛɛla? 6 Kɔni lemɛniya mɔɔ do ra a badenma do kili kiti ma lemɛniyabaliilu ɲakɔrɔ!

7 Ni kitiilu ye ai tɛma, bɔnɔ le wo ri. Yani wo ye kɛ, a bɛnnin tɛrɛ tɛ wa, ai ye sɔn telenbaliya ye kɛ ai la wo rɔ? Wo rɔ, ai tɛrɛ ma kan ka sɔn kansonya ma wa? 8 Fɔɔ aile jɛrɛ le telenbaliya kɛla, ka ai badenmailu bolofenilu kansonya. 9 Ai ma a lɔn wa ko telenbaliilu ti nala cɛ sɔrɔnna Alla la mansaya rɔ? Ai kana ai jɛrɛ majuuwaya. Jalonilu wala joo batolailu wala kaninkɛlailu wala cɛɛ mɛnilu ye laɲɔɔya kɛla ii ɲɔɔn na, 10 wala sonilu wala wasabaliilu wala dɔlɔ minnailu, wala nafiilu, wala kansontenilu, woilu foyi tɛ cɛ sɔrɔnna Alla la mansaya rɔ. 11 Aile doilu tɛrɛ wo ɲa le ma, kɔni ai ra ai ko ka ai la kojuu bɔ ai ma, ka lasɛninya, ka kɛ mɔɔ telenninilu ri an Maari Isa Ɲenematɔmɔnin tɔɔ rɔ a ni Alla la Nii Sɛniman baraka rɔ.

12 «Ko bɛɛ dahanin nde ma.» Kɔni tɔnɔ tɛ ko bɛɛ la. «Ko bɛɛ dahanin nde ma.» Kɔni nde ti nala sɔnna kɛla foyi la jɔn di. 13 «Kɔnɔ le ta ye dɔɔnnifen di, dɔɔnnifen de fanan ta ye kɔnɔ ri.» Kɔni Alla ri ii fila bɛɛ halaki. Mɔɔ faribanku ladannin tɛ jalonya kanma, kɔni Maari le ta ye faribanku ri, a ni Maari fanan ye faribanku le yɛ. 14 Nba, Alla ra Maari lawuli saya rɔ, a ri andeilu fanan nawuli a fanka la. 15 Ai ma a lɔn ko ai faribanku kɛnin Ɲenematɔmɔnin faribanku yɔrɔ do le ri wa? Wo rɔ, n ka kan ka Maari faribanku maa jatɔ fari la wa? Ɛɛn de! 16 Ai ma a lɔn wa ko cɛɛ mɛn ni jatɔ muso ye kafula, ko woilu ra kɛ faribanku kelen di? Baa a sɛbɛnin Kitabu rɔ ko: «Woilu fila ri kɛ faribanku kelen di.»* 17 Kɔni mɛn ye a jɛrɛ tuunna Maari la, wo nii ni Maari nii ra kɛ kelen di.

18 Ai ye ai bori jalonya kɔrɔ. Mɔɔ ye hakɛ gbɛrɛ mɛnilu bɛɛ kɛla woilu tɛ a faribanku rɔ, kɔni mɔɔ mɛn ye jalonya kɛla wo ye hakɛ kɛla a jɛrɛ faribanku le kanma. 19 Ai ma a lɔn wa ko ai faribanku ye Alla la Nii Sɛniman batobon de ri, Nii mɛn ye ai rɔ, Alla ka mɛn di ai ma? Ai ta tɛ ai jɛrɛ ri. 20 Baa a ka ai kunka sɔnkɔ gbɛlɛn de la. Wo rɔ, ai ye Alla gbiliya ai faribanku rɔ.