Korɛnti Fɔlɔ Suran 8

Sobo mɛn bɔnin sarakaya la jooilu yɛ

1 Mɛn bɛnnin soboilu la ko ma mɛn bɔnin sarakaya la jooilu yɛ. An ka a lɔn ko «Lɔnnin ye an bɛɛ bolo.» Lɔnnin ye mɔɔ kɛla wasola le ri, kɔni kaninteya ye lemɛniya le lasabatila. 2 Mɔɔ mɛn ye a mirila ko a ka ko lɔn, wo ma ko lɔn fɔlɔ ikomin a ka kan ka a lɔn ɲa mɛn ma. 3 Kɔni, ni mɔɔ mɛn ka Alla kanin, Alla ka wo tii lɔn.

4 Wo le rɔ, ka sobo dɔɔn, mɛn da bɔ sarakayala jooilu yɛ, an ye wo le la ko fɔla butun. An ka a lɔn ko joo kɛnin tɛ foyi ri dunuɲa rɔ. Alla kelen pe le. 5 Hali bato fen siyaman ye duukolo ni sankolo kan, mɔɔ mɛnilu ye a fɔla ko «maariilu,» hali «maari» siyaman ni «faama» siyaman tɛrɛ ye, 6 kɔni andeilu fan fɛ, Alla kelen pe le. Ale le an fa ri mɛn ka fen bɛɛ dan. An ye an na dunuɲaratɛɛ kɛla ale le yɛ. Faama kelen pe le, Isa Ɲenematɔmɔnin. Fen bɛɛ dannin ale le baraka rɔ. An ye an na dunuɲaratɛɛ kɛla ale le baraka rɔ.

7 Kɔni mɔɔ bɛɛ ma ɲin lɔn. Mɔɔ doilu ra dorin joo sɔ koilu la. Hali sisɛn, ii wa kɛ dɔɔnnifen su ɲin dɔɔnna, ii hankili ri to a ko ko ii ye joo sɔ fen de dɔɔnna. Ii la hankili dɔɔya fanan ye ii kɔsɔla. 8 Kɔni dɔɔnnifen tɛ an madonna Alla la. Ni an ma a dɔɔn, an tɛ bɔnɔla foyi rɔ. Ni an ka a dɔɔn, an tɛ tɔnɔ si sɔrɔnna.

9 Kɔni hali koilu kɛ ko hɔrɔya yɛ ai la, ai ye a kɛ ai hankili la, ai kana wo mɔɔilu bila julumun dɔ mɛnilu ma fanka sɔrɔn fɔlɔ lemɛniya rɔ. 10 Baa mɔɔ mɛn fanka ma bon lemɛniya rɔ ko ɲin dɔ mɛn hankili dɔɔyanin, ni wo ka ile lɔnninna tɛrɛn i ye dɔɔnninna joo bon kɔndɔ, wo tɛ wo fanan nawakali wa a fanan ye jooilu sɔ sobo dɔɔn? 11 Nba, wo mɔɔ mɛn ma se sɔrɔn lemɛniya rɔ, Ɲenematɔmɔnin faanin mɛn yɛ, wo ri halaki ile lɔnninna fɛ wo rɔ. 12 Nba, ai wa hakɛ kɛ i badenma la wo ɲa ma, ka a hankili dɔɔyanin madimin, i ye julumun kɛla fanan Ɲenematɔmɔnin na wo hakɛ le fɛ. 13 Wo le rɔ, ni dɔɔnnifen di a kɛ badenma ye bila julumun dɔ, nde fanan tɛ wo sobo dɔɔnna butun, kosa n ti nala a bilala julumun dɔ!